3
Deka myotu afa ovi rotu ma bira sidovung a veka namaꞌar
1 Terang a valing averi! Naꞌut i itmunuk ana, wol ungrihi nala verin mia wean tamata ovi Ubu Ni Roh nleal ralarira ra. Naꞌuk ungrihi watan verin mia wean tamata ovi rira ininan sian ra rtali tenarira ra ma rorang afa avyai, tevek mia weabira kasikoꞌu yanat ra ma bira inorang a wol nabwaꞌar obin naꞌa Kristus.
2 Kasikoꞌu yanat ra bisma renu susu watan, ba wol bisma raꞌan afamtahan obin. Mia weabira vali inyai. Lan ana, yaꞌa wol air mia ovu vaivatul ovi inovan verin tamata ovi rira inorang rangrebat verin Yesus, tevek mia wol bisma fyan-aran afa avyai obin. Ba ma naran amar ini, na mia wol bisma mryenar ovu fyan-aran vaivatul avyai obin.
3 Mia bira vavaꞌat ra rtali watan bira ininan sian ovi rtali tenabira ra. Ba wean i wol inabira ma msyiꞌik tamata liak rira lolin ra ovu msyingarahi-sikual mia, na inyai nfaturu lahir ne, myorang watan bira ininan sian ovi rtali lanit ivavan a, ma weabira tamata ovi wol rkaꞌa Ubu.
4 Wean i tamata boku rfalak ne, “Ami amorang Paulus,” na liak ra rfalak vali ne, “Ami amorang Apolos,” na inyai nfaturu roak ne, bira afa ovi myotu ra myorang watan bira ininan sian ovi rtali lanit ivavan ini.
5 Ba wean inyai, na fyikir ne yaꞌa ini iki ovu Apolos yai iki, ma msyingarahi-sikual mia? Ami tamata sansinir ami watan verin Duilaꞌa, ma amsurak amair roak mia, boma myorang Kristus. Ba amfabana watan karya i Duilaꞌa nala roak verin lokat ami.
6 Naꞌa Ubu Ni vaꞌi ralan a, na yaꞌa, Paulus, ufamalik Yesus Kristus Ni vaivatul ra, wean tamata ovi rotu rira vaꞌi ma ravuri-rava nabat ra. Apolos nair mia ma bira inorang nmela, wean tamata ovi rala wear ma rtitik nabat ra. Naꞌuk Ubu saꞌi nkarya naꞌa ralabira ra, wean i notu ma nabat avyai rarubu.
7 Naꞌa karya ini, na tamata ovi ravuri-rava te rtitik nabat ra, wol rarekan ira. Trekan aꞌuk Ubu, tevek Ia saꞌi nfarubu nabat ra.
8 Tamata i navuri-nava nabat ra, ovu tamata i nala wear ma ntitik nabat ra, irua wear isa watan. Ubu veka naval rira rala lolin ra lokat ira ma inovan ovu afa ovi rotu ra.
9 Ami amkarya naꞌa Ubu Ni vaꞌi ralan a ovu amotu karya i nala verin ami. Mia ini Ubu Ni vaꞌi a ovu Ni rahan a.
Yesus Kristus neluk fanderen naꞌa dida vavaꞌat ra
10 Ubu nala yabi verin yaꞌa ma ufamalik lan Yesus Kristus verin mia. Ning karya yai wean tamata i ni kakaꞌa dawan ma notu rahan, na nfadoku lan fanderen a. Tamata ovi rair mia, ira wearira tamata ovi rfadiri rahan naꞌa fanderen i otu roak yai ratan a. Naꞌuk tamata ovi rfadiri rahan yai lokat ira musti rsiꞌik ma lolin rira karya ra naꞌa fanderen yai.
11 Ubu kaꞌi nfadoku roak Yesus Kristus ma neluk fanderen verin mia, ma fyadiri bira inorang a. Ba wol tamata isa vali bisma nair mia naꞌa fanderen liak.
12 Wean tamata ovi rma ma rkarya ma lolin, ovu karya i Ubu nala verin ira ma rair mia, na ira wearira watan tamata ovi rfadiri rahan naꞌa fanderen yai ratan a ovu masa, perak, ovu vali vatmasmasa i fyawan urun a. Naꞌuk wean i tamata liak rma ma wol rkarya ma lolin naꞌa karya yai, na ira wearira tamata i nfadiri rahan ovu aa, ria, ovu lavurun ovi rangaran roak a.
13 Lokat tamata rira karya ra veka rvotuk naꞌut amar i Yesus Kristus veka nma ewal a, tevek naꞌa amar yai vali, na Ia veka nma ovu yafu ma nfavotuk lahir lokat tamata rira karya ra. Ia veka nala yafu yai ma al nlanat ira, boma nsiꞌik lahir ne, rira karya ra mngaꞌun te wahal.
14 Ba wean i rira karya ra rtahang nala yafu yai, na Ubu veka naval ira naꞌa rira rala lolin ra.
15 Wean i yafu nasnuri nala rira karya ra, na ira raruki ma dawan. Naꞌuk Ubu veka nsikat ira tali rira salasilan ra, boma rira vavaꞌat kakiwal. Naꞌuk wearira lahir tamata ovi rfaturu lingaꞌan ma raling vatuk tamata ra tali yafu ralan ma rti murin.
16 Mia wol mkyaꞌa ne, mia weabira lahir Ubu Ni Rahan Dawan Falurut? Mia wol mkyaꞌa vali ne, Ubu Ni Roh nleal mia?
17 Mimunuk weabira lahir Ubu Ni Rahan Dawan Falurut i nmerat urun yai. Ba tamata iki watan wean i not-visal Ubu Ni Rahan Dawan Falurut a, na Ia veka not-visal tamata yai.
18 Deka tamata isa vali tali mia kaꞌi nlabir watan tenan a. Wean i tamata boku ranovak ne, rira kakaꞌa dawan wean tamata ovi rnaꞌa lanit ivavan ini rfikir a, na tamata avyai musti rotu ma felarira ra wean tamata boda-badi ra. Ira rotu felarira wean inyai, boma rira vali kakaꞌa dawan tali Ubu.
19 Tamata ovi ranovak ne, rira kakaꞌa dawan wean tamata ovi rnaꞌa lanit ivavan ini, na Ubu nfadoku ne rboda urun. Rtulis roak naꞌa Surat Ralan ne, “Ubu nala rira kakaꞌa ra ma al nfabriang lahir ira ma nfaleka ira.”
20 Rtulis vali naꞌa Surat Ralan wean ini, “Duilaꞌa nkaꞌa munuk lahir tamata ovi rira kakaꞌa dawan rira afa ovi ranovak a. Afa avyai munuk wol ihir akataka.”
21 Wean inyai bi era verin mia ma deka myalang ovu fyakaratat aꞌuk tamata boku, na boku wahal. Deka fyikir wean inyai, tevek Ubu notu afakataka munuk roak verin mia ma naꞌa bira lolin.
22 Ubu nera yaꞌa, Apolos ovu Petrus ma amlobang mia, ba mia bira vali ami. Lanit ivavan ini ovu bira vavaꞌat ra, ovu bira matmatan ra, amar ini ovu amar ovi veka rma ini, Ubu nfadoku munuk roak afa avyai verin mia.
23 Ubu Ni Kristus, ovu Kristus Ni munuk roak mia.