2
Amabone ga kabiri: Amahembe naꞌbatuzi
1 Haaho, nanashubi langiiza, nanabona amahembe gana.
2 Ulya muganda úwâli kizi nganuuza, nanamúbuuza, ti: «Yaga mahembe, biryagagi biki?» Na wa naye, ti: «Yaga mahembe, guli mugani gweꞌbinyamahanga íbiri noꞌbushobozi. Byo bikashaabula Abayuda, naꞌBahisiraheeri, kiri naꞌbandu beꞌYerusaleemu.»
3 Ha nyuma, Nahano anashubi nyereka abatuzi bana.
4 Nanashubi múbuuza: «Yaba bandu, bikagi byo bayiji gira?» Na wa naye, ti: «Yibyo binyamahanga íbikayiji teera ikihugo kyeꞌBuyuda, yabo batuzi bayiji bileeza mweꞌkinyukura, bakabuli biminika.»
Amabone ga kashatu: Umugozi gwoꞌkugera
5 Nanashubi langiiza, nanabona umundu afumbiiti umugozi gwoꞌkugera.
6 Nanamúbuuza: «Ewe! Ugweti ugagenda hayi?» Na wa naye, ti: «Ngweti ngagenda mu kaaya keꞌYerusaleemu, gira ngendi kagera ubula-bula naꞌmatambi.»
7 Ulya muganda úwâli kizi nganuuza, anagendi sanganira uwabo úwâli kizi yija imunda ali.
8 Kwokwo, ulya muganda úwâli kizi nganuuza anabwira uwabo, ti: «Ukwabaduke, ugendi bwira guliira musore úgufumbiiti umugozi gwoꞌkugera: “Yako kaaya keꞌYerusaleemu, kagaaba kataki zungulusirwi neꞌnzitiro. Kagaki yijula mwaꞌbandu neꞌbitugwa, halinde abandu bataganaki kwirwa mwo. Ee! Bandu bingi bakola bagatuula inyuma lyeꞌnzitiro zaako.”
9 «Nahano adesiri kwokuno: “Niehe nienyene, ngababeera nga luzitiro lwoꞌmuliro, úluzungulusiri akaaya. Kiri na mu kati kaabo, ngayerekana mwoꞌbulangashane bwani!”»
Ábakahunga, Nahano abakengeera
10 Nahano adetaga kwokuno: «Mwe nꞌgashabulira mu mbande zooshi zeꞌkihugo! Ngahwe! Mutibitage, mulyoke i Babeeri, uluhande lweꞌmbembe.
11 E bandu beꞌYerusaleemu, mwe mukahungira i Babeeri! Muvwarukage maashi, gira muyifuuse!»
12 Nahano woꞌbushobozi bwoshi, akanduma mu kati koꞌbulangashane, kwo ndete hiꞌgulu lya yibyo binyamahanga, kundu bikamùshahula ibindu, ti: «Ku kasiisa, ngiisi úgamùhuma kwo, iri ahuma ku mboni yiꞌsu lyani.
13 «Yibyo binyamahanga, ngamùyihoolera byo. Si abaja baabo, nabo bo bagayiji bashahula ibindu!» Haaho, lyo mugaamenya kwo Nahano woꞌbushobozi bwoshi, ye kandungika.
14 Nahano adetaga kwokuno:
«E bandu beꞌYerusaleemu, mukizi yimba, iri munabanda akabuuli.
Mukuba, ngayiji mùtuula mwo.
15 Ku yikyo kyanya, ibinyamahanga bingi, bigayiji nyibiika kwo,
halinde nabo banabe bakola bandu baani.
Ee! Nienyene ngola ngayiji mùtuula mwo.»
Kwokwo, lyo mugaamenya kwo Nahano woꞌbushobozi bwoshi ye kandungika.
16 Nahano agashubi yabiira ikihugo kyeꞌBuyuda, kibe kyeꞌmwage,
anashubi toola naꞌkaaya keꞌYerusaleemu kwakundi.
17 Mwe bandu mweshi, mukwaniini muhulike imbere lya Nahano.
Si akola agavyuka, anahuluke ahandu haage heeru!