6
Abanyere beꞌYerusaleemu
1 «E mukazi, si we nonosiri ngana-ngana!
Aahago! Ulya mukundwa wawe, utubwire agenda hayi?
Akagwata injira ya luhande luki,
halinde tutabaalanwe ukumúshakula?»
Umunyere
2 «Ulya mukundwa wani akamanukira iweꞌrya ndalo yage,
iwa migungira yoꞌbwasi bwoꞌmuhongolo.
Âli loziizi ukugendi haragirira, noꞌkuyimbula iyungiyungi.
3 Ndi weꞌmwa mukundwa wani. Naye, ali weꞌmwani.
Agweti agaragirira mu yungiyungi.»
Injusho yoꞌmukundwa wani
Umushosi
4 «E mukundwa, ulangashiini ngaꞌkaaya keꞌTiriza,
unabuyahiri ngaꞌkaaya keꞌYerusaleemu.
Uli wa kahebuuza, ngaꞌbasirikaani ábali niꞌrembera.
5 Utandole kwo, we kongwa we!
Si amasu gaawe, gali mu nvyula mwoꞌlulungumizi.
Umushaku gwawe guli mu jooka,
nga kiso kyeꞌmbene íziri mu lindimuka ku migazi yeꞌGiryadi.
6 Amiino gaawe gali mu ba nga bibuzi
íbiri mu yogoroka ku kyanya keera byashukwa mu miiji.
Ngiisi kiguma kiri niꞌhasha lyakyo,
ndaanakyo íkikafwisa.
7 Mu lushungi lwawe, amatama gaawe gali mu boneka
nga bihande bibiri byaꞌmakomamanga.
8 Ewe! Nangaba ndi naꞌbagoli makumi galindatu,
na mbe naꞌbakazi beꞌmbuga makumi galimunaana,
kiri naꞌbanyere kandaharuurwa.
9 Kundu kwokwo, ha lwani, nangaki toola yolya mukazi muguma naaho.
Noꞌyo mukazi, ali ngunde yani. Ee! Atungiini ngana-ngana!
Mu banyere ba nyina, ye kakundirirwa.
Abaabo banyere, ikyanya bakamúbona,
banamúhuuza kwo ali muhiirwa.
Abaabo bagoli, naꞌbakazi beꞌmbuga ba mwami,
nabo bali mu múyimbira kwokuno:
10 “Nyandi uyu, úlangashiini nga lukula,
anabuyahiri nga mwezi?
Ali mu keyengana ngiꞌzuuba,
anali wa kahebuuza ngaꞌbasirikaani ábali niꞌrembera.”»
Umunyere
11 «Nꞌgamanukira mu ndekeera iwa irya ndalo yeꞌbiti byeꞌloozi,
gira ndole ishibwe zeꞌnaazi.
Nꞌgagendi lola, iri mizabibu keera yaleeta akafundo,
kandi iri amakomamanga keera gayasa.
12 Haliko, mu mitono yani, nanayami tondeera ukukuyifwija,
nanayiyuvwa ngoꞌmundu úgweti úgarongoora igaare liꞌzibo.»