2
Umunyere
1 «Ndyagagi kaaso ákayasiizi mu ndekeera yeꞌSharooni.
Ndi kaaso keꞌyungiyungi ya mu tubanda.»
Umushosi
2 «Mu bandi banyere, umukundwa wani aliiri
nga kaaso kiija keꞌyungiyungi mu mihanda-njovu.»
Umunyere
3 «Umukundwa wani ali mu bandi batabana,
nga kweꞌkiti kyeꞌbitumbwe kiri mu biti bya mu kishuka.
Nyifwijiri ukubwatala mwiꞌdako lyeꞌkizunguza kyage.
Kiri neꞌbitumbwe byage, nyuvwiti kwo binuniri bweneene.
4 Keera akandwala halinde mu kisiika kyoꞌkuliira mwo,
anabiika ikimenyeeso hiꞌgulu lyani, mbu anguuziri bweneene.
5 Buno, ngola bu hola, hiꞌgulu lyoꞌkulungumirwa.
Muvwarukage mundiise ku mihuli yeꞌmizabibu, gira imbembulule.
Mumbeereze neꞌbindi bitumbwe, gira njubi kana indege.
6 Ukuboko kwage kweꞌlumosho, kwo kushiziri itwe lyani.
Noꞌkuboko kwage kweꞌlulyo, kwo kunvumbatiiri.»
7 «E banyere beꞌYerusaleemu,
namùyinginga maashi, kwiꞌziina lyeꞌnzobe, neꞌlyaꞌkasa,
mutakolwe mbu muyivyule mwoꞌlulungumizi,
neꞌkihe kyalwo kitazi hika.»
8 «Yuvwagwi! Izu lyoꞌmukundwa wani, yiryo.
Akola mu yija agasimba-simba ku migazi, na ku tugangazi.
9 Uyo mukundwa ali nga nzobe, kandi iri nga kasa kaanuke.
Yoliira ayimaaziri hoofi neꞌkigo kiitu,
agweti agalingulira mu kaazo.
10 Agweti agambwira kwokuno: “E mukundwa!
We mu nzimiisa. Yimukaga, tuyigendere.
11 «“Lolaga! Ikyanya kyeꞌndara, keera kyalenga.
Invula keera yahumba, itanakiri ho.
12 Ibiti keera byayasa hooshi mu kihugo.
Kinakola ikyanya kyoꞌkuyimba.
Kiri naꞌmahumba gagweti gagayuvwikana, ti guugu!
13 Ibiti byoꞌmutiini, keera byatondeera ukutongeka.
Imizabibu nayo, keera yayasa, inakola mu huumura bwija.”»
Umushosi
«“E mukundwa wani, we mu nzimiisa. Yimukaga, tuyigendere.
14 Ulyagagi ngiꞌhumba írigweti ligayibisha mu lwala.
Unyereke amalanga gaawe, unanyuvwise izu lyawe.
Izu lyawe litubereziizi. Naꞌmalanga gaawe, ganonosiri.”»
Abanyere beꞌYerusaleemu
15 «Mutugwatire balya banyambwe baniini,
bátazi tushereegeza indalo yitu yeꞌmizabibu.
Iyo mizabibu, ikoli gweti igayasa.»
Umunyere
16 «Umukundwa wani alyagagi weꞌmwani.
Na naani ndi weꞌmwage.
Ali nga kitugwa íkigweti kigaragira mu twaso tweꞌyungiyungi.
17 E mukundwa wani, ungalukirage maashi!
Ubushigi bútazi kya, neꞌbimbehwa bítazi nyerera.
Uvwarukage nga kasa,
kandi iri nga nzobe nyanuke, íri mu misima.»