10
Imigani ya Sulumaani
1 Iyi migani iri yeꞌmwa Sulumaani.
Umwana mwitegeereza ali mu shambaaza yishe.
Si umuhwija yehe, ali mu jengeeza nyina.
2 Umundu, kundu angagungana, ndaako kamaro ka ali mu longa.
Haliko, ikyanya agira íbikwaniini, lyoki ali mu kizibwa mu lufu.
3 Umundu úkwaniini, Nahano atali mu múleka mbu ashalike.
Si banangora-mabi boohe, ali mu bahangirira, batalonge byo bayifwijiri.
4 Aboolo bali mu yikululira ubukeni.
Si ikyanya umundu agweti agaakola, lyo ali mu gala.
5 Umutabana mwitegeereza, ali mu yibiikira ikihinda ku kyanya kyoꞌmwimbu.
Si ngiisi úli mu yihuniza ku kyanya kyoꞌmwimbu, yehe, ali mu yiji teezibwa ishoni.
6 Ngiisi ábakwaniini bali mu gashaanirwa bweneene.
Si banangora-mabi boohe, mu magambo gaabo mubishamiri ubwitani.
7 Umundu úkwaniini, ikyanya abandu bali mu múkengeera, bali mu gashaanirwa.
Si nangora-mabi yehe, bali mu múyibagira lwoshi-lwoshi.
8 Umwitegeereza ali mu yemeera ukutegekwa.
Si umulabizi yehe, ali mu folomboka-folomboka, anashereere.
9 Ngiisi útuuziri mu kuli, ali mu genda mu kati koꞌmutuula.
Si ngiisi úli mu nyooka-nyooka, yehe agaki bishuulwa.
10 Ngiisi úli mu bisha ukuli, ali mu libuza abandi.
Haliko, ngiisi úli mu yerekezania ku bweranyange ali mu leeterana umutuula.
11 Umundu úkwaniini, amagambo gaage gali mu leeterana ubugumaana, nga shyoko yaꞌmiiji.
Si amagambo ga nangora-mabi, gali mu yitana.
12 Ubushombani buli mu vyula imilongwe.
Si urukundo lwohe, luli mu bwikira amahube.
13 Ikyanya abandu bali mu ba basobanukiirwi, bali mu deta ku bwitegeereze.
Si umuzira bwenge yehe, ali mu kizi kubulwa iminyaafu mu mugongo, wa kubu!
14 Abitegeereza, kundu bangamenya igambo, batali mu bala byoshi byo bayiji.
Si ikizeeze kyohe, kiri mu yami folomboka, halinde kinashereezibwe.
15 Abagale, ibindu byabo biri mu balanga.
Si ikyanya umukeni ali mu bibula, ali mu shereezibwa.
16 Ngiisi ábakwaniini, bagahembwa ubugumaana.
Si banangora-mabi boohe, ibihembo byabo kuli kuhanwa-hanwa naaho.
17 Ngiisi úli mu yemeera ukuyekerezibwa, ali mu ba ali mugumaana.
Si ngiisi útali mu twaza ihano, yehe, ali mu habuka.
18 Ngiisi úli mu shombana ku bumbishwa, iri ali ndyalya.
Na ngiisi úli mu bangaaniza uwabo, iri ali muhwija.
19 Ngiisi úli mu tyabiriza ululimi, ali mu yami yifunda mu byaha.
Haliko, iri wangahangirira akanwa kaawe, lyoki uli mu ba mwitegeereza.
20 Ikyanya umundu úkwaniini ali mu deta, amagambo gaage gali mu ba nga harija nyiija.
Si nangora-mabi yehe, ndaako kamaro ko ahiiti mu mutima gwage.
21 Umundu úkwaniini, amagambo gaage gali mu tabaala abandu bingi.
Si abahwija boohe, bwo babuziri ubwenge, kyo kitumiri bali mu fwa duba.
22 Ikyanya Nahano ali mu tugashaanira, tuli mu gala.
Atanali mu yushuula ubugale bwitu kwaꞌmalibu.
23 Ikyanya umuhwija ali mu gira amabi, ali mu siima.
Si umunabumenyi yehe, ali mu kizi shambaalira ubwitegeereze.
24 Nangora-mabi, ngiisi byo ali mu yikanga kwo, byo biri mu yiji múgwata.
Si umundu úkwaniini yehe, ngiisi byo ali mu yifwija, ali mu bilonga.
25 Ikyanya ikihuhuuta kiri mu huusa, nangora-mabi ali mu minikwa.
Si ngiisi úkwaniini yehe, agasikama imyaka neꞌmyakuula.
26 Umwolo, imbere lya nahamwabo, ali mu ba nga lukalishi mu miino,
anabaagage nga kyusi mu masu.
27 Ikyanya umundu ali mu ba asimbahiri Nahano, ali mu yushuulirwa imyaka ku bulamu bwage.
Si imyaka ya banangora-mabi, bali mu gitolerania.
28 Umundu úkwaniini alangaliiri kwo agalonga amalega.
Si banangora-mabi boohe, kundu bangaba naꞌmifwije, ndaabyo bagalonga.
29 Ngiisi ábakwaniini, bali mu kulikira Nahano, anakizi balanga.
Si banangora-mabi boohe, ali mu bashereeza.
30 Abandu ábakwaniini, batâye lyosibwe mu kihugo.
Si banangora-mabi boohe, batagabeera mwo.
31 Umundu mwija ali mu deta ku bwitegeereze.
Si umunabibeesha, ululimi lwage lugalyosibwa niꞌkeeta.
32 Ngiisi ábakwaniini, bayiji-yiji íbyangasimiisania.
Si banangora-mabi boohe, bali mu deta naaho íbitali nga byo.