5
Abahisiraheeri bahuuna ukukejeererwa
1 E Nahano! Ukengeerage ngiisi kwo twâli kizi libuuka!
Utuloleekeze maashi! Unabonage ngiisi kwo bagweti bagatuteeza ishoni.
2 Ngiisi byo tukahyana, ibinyamahanga keera bikatushahula byo,
byanatunyaga kiri neꞌnyumba ziitu.
3 Bwo badaata batakiri ho, tukolaga fuuvi.
Kiri na bamaawe, nabo bakola banamufwiri.
4 Amagoloovi giitu, leero tukola mu gagula.
Kiri neꞌshaali ziitu, zikola neꞌkishingo kikayu.
5 Ikyanya bali mu tukoleesa ku kahaati, tuli mu himbuka.
Na kundu twangagagara, tutahangwirwi ukuluhuuka.
6 Keera tukayibiikaga mu maboko gaꞌBamiisiri naꞌBahasuriya,
lyo tulonga byo tugaalya.
7 Ala twe! Bashokuluza biitu, bo bâli kizi yifunda mu byaha.
Na bwo batakiri ho, twe tukolaga mu bibetuzibwa.
8 Abaja, bo bakoli ba batwali biitu,
ndaanaye úwangaki tuguluula mu maboko gaabo.
9 Mu kuloozagya ibyokulya biitu, tuli mu yibiika ho twangasiga amatwe.
Abiitani bagweti bagatuhinda-hinda mwiꞌshamba.
10 Buno, tukoli shalisiri bweneene,
halinde kiri noꞌluhu lwitu lukola mu gulumira nga muliro.
11 Mu kaaya keꞌSayuni, kiri na mu kihugo kyoshi kyeꞌBuyuda,
bakiitu na banyere biitu, bakola mu higulirwa kwo.
12 Abatwali biitu bakagendi manikirwa ku maboko gaabo.
Kiri naꞌbashaaja biitu, bakola mu gayirizibwa.
13 Imisore iri mu hidikwa, mbu igendi shya ingano.
Abatabana nabo, bakola mu bambaajira, mu kubetula ishaali nzito.
14 Abashaaja batakiri mu kuumana, mbu bashubi hanuulana.
Kiri neꞌmisore itakiri mu yimba.
15 Imitima yitu itaki shambiiri.
Naꞌmakina giitu, gakoli hindusiri kimombo.
16 Injembe, keera zanyugutulwa ku matwe giitu!
Yayewe imwitu, bwo twâli kizi yifunda mu byaha!
17 Imitima yitu ikoli vunisiri.
Kiri naꞌmasu giitu gakoli fwifwitiiri.
18 Umugazi Sayuni gukolaga mushaka.
Imirunga naaho, yo yasigala ikola mu hinda-hinda mwo.
19 Kundu kwokwo, e Nahamwitu! We yamiri uli mwami.
Ikitumbi kyawe kyoꞌbwami, kigayama ho, ku bibusi byoshi.
20 Aahago! Kituma kiki uki tuyibagiiri?
Si keera wahisa ikyanya kila utujandiriiri!
21 E Nahano! Utugalulirage imwawe, tushubi ba bandu baawe!
Ushubi tushambaaza, nga kwo wâli kizi tushambaaza kare.
22 Aaho! Ka keera wayami tulahira lwoshi-lwoshi?
Ka uki turakariiri halinde ku kino kyanya?