16
Ubuhyane bwa Hifurahimu, noꞌbwa Manaasi
1 Abandu beꞌkibusi kya Yusefu, ubuhyane bwo bakalonga, bwâli tonderiiri ku lwiji Yorodaani, uluhande lweꞌshyoko zeꞌYeriko. Bwanalenga mwiꞌshamba, halinde mu mbande zeꞌmigazi yeꞌBeteeri.
2 Ukulyoka yaho i Beteeri, bwanagenderera, halinde i Luuzi. Bwanalenga ku mbibi zeꞌHatarooti, imunda Abahariki bâli tuuziri.
3 Ha nyuma, bwanamanuka uluhande lweꞌmuga, mu kihugo kyaꞌBayafuleeti, halinde i Beeti-Horoni yiꞌfwo, neꞌGezeeri. Bwanahekera ku Nyaaja Mediterane.
4 Yubwo bwo buhyane bweꞌkibusi kya Yusefu, kuli kudeta abandu boꞌmulala gwa Manaasi, noꞌgwa Hifurahimu.
Ikihugo kyoꞌmulala gwa Hifurahimu
5 Abandu beꞌkibusi kya Hifurahimu, ubuhyane bwo bakalonga, ulubibi lwabwo lwâli tonderiiri uluhande lweꞌsheere lweꞌHatarooti-Hadaari, halinde i Beeti-Horoni yeꞌlugulu,
6 lwanahekera ku Nyaaja Mediterane. Neꞌmbembe nayo ireeziri hoofi naꞌkaaya keꞌMikimeta, lwanasokereza halinde uluhande lweꞌsheere lwako. Lwanazunguluka uluhande lweꞌsheere lweꞌTanaati-Shiilo, lwanajabuka yako kaaya halinde i Yanwa.
7 Lwanashubi tondeerera yaho i Yanwa, lwanamanuka i Hatarooti, neꞌNara, halinde lwanahika i Yeriko, lwanahekera ku lwiji Yorodaani.
8 Lwanashubi tondeerera i Tapwa, lwanasookera uluhande lweꞌmuga, halinde ku lwiji Kana, lwanahekera ku Nyaaja Mediterane. Yikyo kyo kihugo kyaꞌBahifurahimu nabo bakahaabwa, ukukulikirana naꞌmakondo gaabo,
9 kuguma noꞌtwaya two bakayushuulwa mu kihugo kyoꞌmulala gwa Manaasi, kuguma noꞌtundi twaya tuniini two twâli kizi koza.
10 Abakaanani ábâli tuuziri i Gezeeri, yabo beene Hifurahimu banageregeza ukubayimula, shoobe! Banaki genderiiri ukutuulanwa halinde zeene. Haliko, Abahisiraheeri bayamiri bali mu bakoleesa ku kahaati.