8
Biridaadi ashuvya
1 Iri hakatama, Biridaadi weꞌShuha anashuvya Hayubu, ti:
2 «Yaga amagambo, ugakizi gadeta-deta halinde mangoki?
Si galyagagi nga mbuusi naaho!
3 Aahago! Ka utoniri kwo Rurema agweti agashobania ukuli?
Si ali Rurema woꞌbushobozi bwoshi! Yehe atangakushobania.
4 E maashi yaga! Si abaana baawe, keera bakahubira Rurema.
Na buno, keera bakahanwa, nga kwo byâli bakwiriiri.
5 «Ugirage utabaaze Rurema woꞌbushobozi bwoshi.
Umúhuune kwo akukejeerere.
6 Iri wangaba uli mwija, unali woꞌkuli,
lyoki agayimuka, anayiji kugalulira i kaaya.
7 Na kundu wâli tondiiri neꞌbiniini,
haliko ubuzinda, ugaki yiji genduukirwa.
8 «Wangatee buuza bashokuluza ábakatanga imbere lyawe,
halinde lyo naawe ulonga ukumenya ngiisi byo bâli mali yiga.
9 Twehe, twabutwa bigingo naaho, ndaanabyo tuyiji.
Isiku ziitu mu kihugo, ziri mu lenga nga kimbehwa.
10 Si boohe, bo bali noꞌbulyo bwoꞌkukuyigiriza,
halinde lyo usobanukirwa noꞌbwitegeereze bwa keera.
11 Amasanga, gali mu mera naaho ahandu heꞌhinywemeera.
Ee! Gali mu kuludukira mu miiji.
12 Neꞌkyanya gali mu ba naꞌkashala, ganabe gabuziri úgatema,
hali ikyanya gali mu yuma duba ukuhima izindi mbuto zooshi.
13 «Kwo na kwokwo, ikyanya abandu bali mu yibagira Rurema,
bali mu yuma duba-duba.
Ikyanya bali mu ba bataki twaziizi Rurema,
umulangaaliro gwabo, guli mu yami nyerera.
14 Bali mu ba nga bayegamiiri ku nuzi za nalutangulira.
Na kundu bali mu ziyegamira kwo, si ziri mu yami duuduka.
15 Ee! Yizo nuzi, zigatwika ngana.
Kundu bangazigwatirira, haliko zoonyene zitakaniri.
16 «Abandu, ikyanya batali mu twaza Rurema,
bali mu ba ngoꞌmulandira úguli mu mera bwija kwiꞌzuuba.
Guli mu landa, gunayaje,
halinde amatavi gaagwo ganakwire mu ndalo yoshi.
17 Imizi yagwo, inalandire mu mabuye,
halinde inagendi yizinga-zinga mwo.
18 Kundu kwokwo, yugwo mulandira, iri gwangakuulwa ahandu haagwo,
guli mu ba nga gutâli zaazi ba ho.
19 E maashi! Kwoshi kwokwo.
Ahandu haagwo, igindi milandira inashubi yiji mera.
20 «Kwokwo, yuvwagwa! Iri umundu angatuula mu kati koꞌkuli,
Rurema atangagira mbu ayami múlahira.
Si banangora-mabi boohe, atangabatabaala.
21 Aahago! Rurema agashubi yiji kushambaaza,
halinde akanwa kaawe kayijule ibimwemwe.
Ugashubi kizi banda akabuuli ku bushambaale.
22 Kundu abagoma bangaba bakushombiri, si bagaki teezibwa ishoni.
Yabo banangora-mabi, inyumba zaabo zigaashaka ngana-ngana.»