20
Amagambo ga kashatu ga Sofaari
1 Ha nyuma, Sofaari weꞌNahama anashuvya kwokuno:
2 «E Hayubu, ngwaniini ngushuvye.
Si amagambo gaawe, gagweti gaganjengula bweneene.
3 Kundu ugweti uganduka, si ngweti ngagooyera naaho.
Halikago buno, nyiji bwija ngiisi kwo ngakushuvya.
4 «Kwangaba ukoli yibagiiri ngiisi kwo biri mu ba,
ukulyokera ho Rurema akabumbira abandu mu kihugo.
5 Balya banangora-mabi, kundu baki shambiiri,
halikago yukwo kushambaala kwabo, kukola kugaamala.
Kundu baki gweti bagashambaala,
haliko ubushambaale bwabo, butagayama ho.
6 «Balya banangora-mabi, baki gweti bagayikangaata,
halinde banabe nga bashoniri mwiꞌgulu.
Emwe! Amatwe gaabo, gali mu huma ku bibungu.
7 Haliko ha nyuma, bagaki lashwa hala, nga myanda.
Ngiisi ábashubi bayiji, bagakizi yibuuza, ti: “Balyagagi hayi?”
8 «Bali nga birooto naaho,
bali mu fwifwitira, banabe batakiri mu boneka.
Bagasheguuka ngaꞌmabone ga mu bushigi.
9 Kundu abandu bâli kizi babona, haliko batagaki boneka.
Kiri na ho bâli rambiri, naho hatagaki menyeekana.
10 «Kundu bâli kizi zimba ibya beene,
haliko abaana baabo, bagabigalula,
banagendi huuna abakeni ulukogo.
11 Yabo baana, kundu bâli ki riiri misore, banâli ki hiiti imisi,
haliko, iyo misi yabo igamalira mu luvu.
12 «Ikyanya bâli kizi gira ubuligo, yubwo buligo bwananuna nga sukaari.
E ma! Bwâli kizi nuna mu kanwa kaabo.
13 Batanalooza ukubushaaza mwo,
si bâli kizi buhaasa mwo.
14 Kundu kwokwo, ikyanya buli mu yika mu nda,
buli mu hinduka bululu, bunabe bukola nga manjoka-njoka.
15 Kundu bâli kizi mira ubugale, haliko bagayiji bushala.
Rurema yenyene agabushaaza mu nda zaabo,
16 banabe bakola mu yonga amanjoka-njoka.
Umujoka, gugabakoma ngana, gunabayite.
17 «Kundu ubuuki naꞌmata biri mu hinga nga nyiiji,
haliko batâye ki shubi bibona.
18 Kundu bâli kizi shaha ikyuya, mbu balonge byo bagaalya,
haliko yibyo byokulya, bagashubi bigalula.
Na kundu bâli kizi dandaza, ibindu byabo bitagaki bashambaaza.
19 «Si bâli kizi vindagaza abakeni, banabasiga maboko mamaata.
Banakizi nyaga inyumba zo batakayubaka.
20 Na kundu bâli kizi yilundira ibindu bingi,
haliko ndaabyo íbisigiiri kwo.
21 Ndaanabyo bagakizi ki lya.
Ubugale bwabo, butagaki tuula ho.
22 «Kundu bangaba baki gaziri, haliko bagayami longa amakuba,
banayiji kengeera balibuuka ngana.
23 Ikyanya bagaaba bakiri mu yihahala, mbu lyo bahaaza amabunda,
Rurema agabarakarira bweneene.
Agakizi batumuula imbi,
zinabahone kwo nga nvula.
24 «Ikyanya bagayiyeka ingooti íyatulwa mu kyuma,
kiziga bagaberuuzibwa neꞌmyambi yeꞌmiringa.
25 Iyo myambi, bali mu gishogola mu migongo yabo.
Banalyose isongo-songo zaayo mu madiku, ziki langashiini.
Bakoli yobohiri naaho, kwo bakola bagaafwa.
26 «Ubugale bwabo, bugakabulirwa mu kihulu namudidi.
Umuliro gunabujigiivye.
Na íbiki sigiiri mu nyumba zaabo, bigasiriira.
27 Ubuligo bwabo bwoshi, igulu ligabubishuula.
Ikihugo kigabutangira ubumasi, mu kubanyagaza.
28 Yibyo bindu byabo, umwijulire gwaꞌmiiji, gugabibindikira.
Ee! Rurema yenyene agabishaaza ku buraakari bwage.
29 «Yabo banangora-mabi, kwokwo kwo Rurema agabahana.
Kyekyo kyo kihano abashungikiiri.»