21
Indumwa imweꞌkihugo kyeꞌBabeeri
1 Ino ndumwa idesiri hiꞌgulu lyeꞌkihugo kyeꞌBabeeri. Yikyo kihugo kiri mwiꞌshamba íriri ku nyaaja.
Umugoma akola mu kuyijira mulindi nga kihuhuuta.
Alyosiri mwiꞌshamba, uluhande lweꞌkisaka, mu kihugo kidali-daali.
2 Gano mabone, kiryagagi kihuume ngana!
Nꞌgabona abiira balyalya keera bakuhindukira,
banakola mu kushahula ibindu, babuli kushereeza.
E Bahelamu, kuguma naꞌBamediya!
Mugirage muzunguluke kano kaaya, munakateere!
Abandu baamwo, kundu bagweti bagababaza abaabo,
haliko yukwo kubabala, ngola ngakumala.
3 Ala nie! Ngoli yuvwiti ubulyanirwe mu kibuno.
Bukola mu lyana nga mukero gwoꞌmukazi.
Ngiisi byo ngola mu yuvwa, bikoli nyobohesiizi!
Kiri na byo ngola mu bona, biri mu mbiika uluhuha.
4 Umutima gwani gukola mu puupa.
Neꞌkihuumula kikola mu njugumya.
Njubi yifwijiri akabigingwe kahikage, lyo mboleera.
Si kaako kabigingwe, leero nako kandeera ulushunguti.
5 Bakola mu baza ibyokulya binunu.
Banakola mu yaja imitaara, gira abandu babwatale.
Booshi bakoli vwagariiri ha byokulya neꞌbinywebwa.
Halikago, masaasa atabukwa, banayiji yuvwa, ti:
«E bakulu, muyimuke mweshi!
Mugirage muyabiire ibilwaniiso biinyu.»
6 Ku kyekyo kyanya, Nahano anambwira:
«Ugendi biika inaazi, gira ngiisi byo igaabona, iyiji kumenyeesa byo.
7 Hali ikyanya angabonaga ikiso kyaꞌbasirikaani,
bashoniri ku fwarasi, banali mu genda babiri-babiri.
Kandi iri abona ábashoniri ku punda, kandi iri ku ngamiya.
Iri angabona kwokwo, akizi ba masu!»
8 Haaho, iyo naazi inateerage umulaga, ti:
«E Nahamwitu, ngiisi lusiku ndi mu laliira ku niizo, halinde ku mukyo.
9 Lolaga, baliira bakola mu yija, bashoniri ku fwarasi, banali mu genda babiri-babiri!»
Bali mu deta kwokuno: «Akaaya keꞌBabeeri keera kahongoka!
Ee! Akaaya keꞌBabeeri keera kahongoka.
Imigisi yako, keera yabulirwa, inakoli vungusiri!»
10 E Bahisiraheeri, mukahuulwa nga ngano, mwanayeluulwa.
Kundu kwokwo, mukiri bandu baani.
Kwoku, hali indumwa yo Nahano woꞌbushobozi bwoshi andumiri.
Ee! Ali Rurema waꞌBahisiraheeri.
Amabone hiꞌgulu lyeꞌkihugo kyeꞌHedoomu
11 Ino ndumwa iri hiꞌgulu lyeꞌDuma.
Nayuvwa umundu ali mu mberangira, ukulyoka i Seyiri, ti:
«E mulaliizi, ka butaziba bugaakya?
Ewe! Ka butaziba bugaakya?»
12 Uyo mulaliizi anamúshuvya: «Bukola bugaakya!
Kundu kwokwo, bugaki shubi yira.
Neꞌri wangashubi buuza, bwija naaho!
Ukashubi yiji mbuuza.»
Amabone hiꞌgulu lyeꞌkihugo kyeꞌBuharaabu
13 Ino ndumwa, iri hiꞌgulu lyeꞌkihugo kyeꞌBuharaabu.
Aaho! E badandaza beꞌDedaani, mwe mushumbisiri mu kishuka kyeꞌBuharaabu!
14 Na niinyu, mwe batuulaga beꞌTema! Yaba bandu batibisiri.
Aahago! Mubatwalire amiiji, munabasheegule neꞌbyokulya.
15 Si batibisiri ingooti!
Yizo ngooti zishuba zigabayomeka, neꞌmiheto ishuba igababeruuza.
16 Nahano akambwira kwokuno: «Akaaya keꞌKedaari, ikyanya kagaahisa umwaka muguma naaho, ubulangashane bwako bugaamala. (Yugwo mwaka, guli nga gwo bangalagaania umukozi imbembo.)
17 Mu basirikaani baabo ábali mu fwora umuheto, hali bagerwa naaho ábagaaba basigiiri.» Kwokwo, kwo Nahano Rurema waꞌBahisiraheeri adesiri.