3
Rurema ashuvya amahuuno ga Habakuki
1 Umuleevi Habakuki akahuuna Rurema, kwokuno:
2 E Nahano! Keera nꞌgayuvwa hiꞌgulu lyeꞌmikolezi yawe ya kahebuuza.
Ngiisi byo ukagira, keera byanzoomeza bweneene!
Aahago! Yibyo byoshi, ushubi bikolaga mu siku ziitu,
halinde nyiitu tubimenye bwija.
Kundu uki turakariiri, utuyuvwirwe indengeerwa, maashi!
3 Rurema Mutaluule agweti agayija,
ukushaaga i Temaani, na mu mugazi gweꞌParaani.
Ubulangashane bwage buyijwiri mwiꞌgulu!
Anagweti agayivugwa hooshi mu kihugo.
4 Agweti agayija alangashiini ngiꞌzuuba.
Mu kuboko kwage, mugweti mugalyoka umulengeerwe.
Mwomwo mwo anali mu bisha ubushobozi bwage.
5 Imbere lyage, ali mu tee lungika ikiija kikayu,
ubuhanya nabwo bunayije bumúshalagiiri.
6 Ikyanya ali mu yimanga, ikihugo kinajugumbane.
Neꞌkyanya ali mu lyeguuza amasu, abandu banayami lenga mweꞌkinyukura.
Kundu imigazi iyamiri-yamiri ho, ali mu givungula.
Noꞌtugangazi, kundu tuyamiri ho, ali mu yami tuhongola.
Ee! Yehe ye tuuziri ho imyaka neꞌmyakuula.
7 Nꞌgabona kwaꞌbandu beꞌKushani bakongamiri mu maheema.
NaꞌbeꞌMidyani nabo, bâli gweti bagalenga mwoꞌmusisi hiꞌgulu lyeꞌkihuumula.
8 E Nahano! Ka wâli rakariiri inyiiji?
Ka kiri neꞌnyaaja ukazilangamira,
halinde uyije mu bibungu, nga úli mwiꞌgaare,
neꞌfwarasi zaalyo zikola mu ganga hiꞌgulu lyoꞌbuhimi?
9 Keera ukafwora umuheto gwawe, wanatungira neꞌmyambi yawe.
Emwe! Wanayanuula idaho, kiri neꞌnyiiji zanahinga bweneene.
10 Ikyanya imigazi ikakuloleekeza, yanayami jugumbana,
inyiiji zanagolomba mwo.
Utulingi tweꞌnyaaja tukalunduma,
twanayami vubula imidunda.
11 Ikyanya irya myambi yawe ikayinywerereka, ikayami tanguula, waa!
Itumu lyawe, lyâli kizi kyemula!
Lyeryo, izuuba noꞌmwezi byanayami jingalala.
12 Wâli kizi lenga-lenga mu kihugo, iri unakoli rakiiri.
Wanaminika igindi milala yoshi hiꞌgulu lyoꞌbute.
13 Si abandu baawe boohe, ukagendi bakiza,
wanafuusa kiri noꞌlya mutaluule wawe.
Balya banangora-mabi, wanafuta umutwali wabo,
kiri na ábakamúyibiika kwo booshi.
14 Yabo bagoma, ikyanya bâli tuyijiiri, kwo batushaabule,
emwe! Bâli kasinge-singe nga kihuhuuta.
Banâli toniri kwo bagahikiri tuminika,
nga ábayiji nyomboola abakeni.
Kundu kwokwo, ukakoleesa amatumu gaabo, mu kutumita ikirongoozi kyabo mwiꞌtwe.
15 Ukalenga mu nyaaja,
uli ku fwarasi zaawe, mu midunda mikayu.
16 Iri nꞌgayuvwa kwokwo, ibya mu nda byanalyamuza liguma, gyuu!
Akanwa kaani, kanakizi shushubira.
Neꞌndege zanayami tera!
Balya bandu bagweti bagatuteera,
kundu kwokwo, ngalindirira ku bwigenderezi, halinde balonge ukuminikwa.
17 Ibiti byeꞌmitiini kundu bitahembiri,
neꞌmizabibu inabe ndaabyo bitumbwe byo itongesiri,
neꞌmizehituuni inabe ndaago mavuta ágayezirwi mwo,
neꞌndalo, imimbu yazo inabe ndaayo,
neꞌbibuzi binabe bikakumbululwa mu lugo,
neꞌngaavu mwiꞌruli, banabe bazipiisa!
18 Kundu kwokwo, niehe ngakizi shambaalira Nahano.
Nyamiri ngakizi shagalukira Rurema Lukiza wani.
19 Nahano Rurema, ye misi yani.
Ali mu nzikamya amagulu, nga kasa.
Anali mu ndwala mu marango geꞌmigazi.
Isobaanuro imwa bali mu kizi rongoora abimbi: Luli mu yimbwa, mu kukoleesa ibikolanwa byeꞌmihungo.