Ikitaabo kya
Hizira
Indangiriro
Yiki kitaabo kiyerekiini ngiisi kwaꞌBahisiraheeri bakalyoka mu mbohe i Babeeri, banagalukira mu kihugo kyabo, kuguma neꞌbirugu bya mu nyumba ya Rurema. Ikyanya bakayusa ukuyubakulula akatanda keꞌyo nyumba, banatondeera ukushubi biika indaliro zaayo. Na kundu abagoma bâli kizi lahira mbu batayubake, haliko Rurema anabashoboleesa, banagiyijuza.
Ha nyuma, ikyanya bakayanga abakazi beꞌkipagaani, umuleevi Hizira anababwira kwo babayimule, gira balonge ukukizi tuula bwija imbere lya Rurema.
Muziizi muguma gwiꞌsikamiro, guli mu Hizira 3.3: «Kundu bâli yobohiragi abatuulaga beꞌyo munda, haliko, banagenderera naaho noꞌkuyubakulula yako katanda haahalya kâli yubasirwi kare. Neꞌri bakayusa ukukayubakulula, banakizi tangira Nahano amatuulo goꞌkusiriiza, ngiisi shesheezi na ngiisi kabigingwe.»
Íbiri mwo ku bwofi
a) Abahisiraheeri bagalukira i Yerusaleemu (1–6)
b) Ukutaaha kwa Hizira (7–8)
c) Hizira alahiza Abahisiraheeri kwo batakizi ki yanga abakazi beꞌkipagaani (9–10)
1
Mwami Kiiro ahanguula Abahisiraheeri kwo bataahe
(2 Kutondobola 36.22-23)
1 Ikyanya mwami Kiiro weꞌPerisiya âli kiri noꞌmwaka muguma atwaziri, lyo Nahano akakwiza igambo lyo âli mali gwanwa adeta ku njira yoꞌmuleevi Yeremiya. Kwokwo uyo Kiiro, Nahano anamúshimya kwo amenyeese mu matwali gaage gooshi yiryo igambo liyandike, ti:
2 Mwami Kiiro weꞌPerisiya akyula kwokuno: «Nahano Rurema úli mwiꞌgulu, keera akambiika kwo mbe mutwali waꞌmaami gooshi ga mu kihugo. Na kwakundi, anambwira kwo nimúyubakire inyumba i Yerusaleemu, mu kihugo kyeꞌBuyuda.
3 «Kwokwo, mwe bandu baage, buno namùhanguula kwo mugalukire i Yerusaleemu, gira mugendi múyubakululira inyumba. Ee! Rurema atuuziri i Yerusaleemu. Kwokwo Rurema, mukizi yamanwa.
4 Ngiisi ho mutuuziri buno, abatuulaga biinyu bakwaniini bamùheereze iharija, neꞌnooro, neꞌbirugu, kiri neꞌbitugwa, naꞌgandi matuulo nga kwoꞌmundu aloziizi. Yibyo byoshi, biri hiꞌgulu lyoꞌkuyubakira Rurema inyumba i Yerusaleemu.»
5 Rurema âli mali gwanwa ahidika abimangizi beꞌmbaga zaꞌBayuda, kwo bagendage, bali kuguma neꞌmbaga za Binyamiini, kiri naꞌbagingi, naꞌBalaawi. Yabo booshi, banayibiika ibiringiini, gira bagendi yubakulula inyumba ya Nahano.
6 Abatuulani baabo, banabatabaala mu kubaheereza ibirugu íbikatulwa mu harija, na mu nooro, kuguma neꞌbindi birugu. Banabaheereza kiri neꞌbitugwa, neꞌbindi bindu byeꞌkishingo, kuguma naꞌgandi matuulo, nga ngiisi kwo bâli loziizi.
7 Na kwakundi, mwami Kiiro anakyula kwo bakuumanie ibirugu bya mu nyumba ya Nahano. Mukuba, mwami Nebukandeneza âli mali gwanwa abiyabiira i Yerusaleemu, anagendi bisingula mu luheero lwage.
8 Yibyo birugu, mwami Kiiro anahanguula umwandisi Miteridaati kwo abiharuure, anabilubulire Sheshibazaari, umutwali waꞌBayuda.
9 Yibyo birugu, umuharuuro gwabyo, gwo gwoguno:
Isahaani mbamu ízikatulwa mu nooro, zâli makumi gashatu.
Neꞌsahaani mbamu ízikatulwa mu harija, zâli kihumbi.
Neꞌzindi sahaani ízikatulwa mu harija, zâli makumi gabiri na mwenda.
10 Neꞌmitanga íkatulwa mu nooro, yâli makumi gashatu.
Neꞌgindi mitanga íkatulwa mu harija, yâli magana gana niꞌkumi.
Neꞌbindi birugu, byâli kihumbi.
11 Yibyo birugu byoshi, bikatulwa mu harija, na mu nooro, byanâli hisiri bihumbi bitaanu na magana gana. Kwokwo, ikyanya bakalyoka mu buja i Babeeri, Sheshibazaari anabigalukana halinde i Yerusaleemu.