7
Ikihano kyeꞌmbeka kyaꞌBahisiraheeri
1 Nahano anashubi mbwiraga kwokuno:
2 «E mwana woꞌmundu, Rurema Nahamwitu abwira Abahisiraheeri kwokuno:
Kikola kyanya kyeꞌmberuuka!
Ee! Amahanga gooshi gahika ku mbeka!
3 Buno, ulwinyu lwamùhikira!
Na ngola ngamùhana ku buraakari bweneene.
Mukuba mwâli kizi nyaagaza, mu kukizi yifunda mu bitalaalwe.
4 Aahago! Bwo mukoli bihuusiri, ngamùhaniiriza,
naani ndagaki mùkejeerera, kandi iri kumùlekeerera.
Kwokwo, lyo mugaamenya ku kasiisa kwo nie Nahano.
5 «Rurema Nahamwitu adetaga kwokuno:
Mugakizi teerwa neꞌnguuke nyingi-nyingi!
6 Ulwinyu, lwamala,
ndaanakwo kundi! Keera lwamala lwoshi-lwoshi!
7 Mwe mutuuziri mu kino kihugo, mukola mugashereezibwa!
Ikyanya kiinyu, kyahikaga.
Ku migazi yinyu, mutagaki banda akabuuli koꞌbushambaale,
si mukola mugashenguka!
8 Buno, ngola ngamùhaniiriza ku buraakari bwani.
Ee! Ngamùhana ngana-ngana, bwo mwâli kizi gira ibitalaalwe,
halinde mwananyaagaza bweneene.
9 Naani ndagaki mùkejeerera, kandi iri kumùlekeerera.
Si ngamùhana, ukukulikirana naꞌmabi go mwâli kizi yifunda mwo.
Yago mabi ngashombiri bweneene.
Kwokwo, lyo mugaamenya ku kasiisa kwo nie Nahano,
na kwo ndi mu hana abandu babi.
10 «Lolagi! Lulya lusiku, keera lwahika! Ndaanakwo kundi!
Kundu kwokwo, mwehe, mukiri mu komeresania bweneene,
iri munayikangaata.
Ku yukwo, mukola mugashereezibwa.
11 Bwo mukola mu kizi yitana,
mukola mugaahanwa mu kuhimbulwa.
Ndaaye úgasigala! Mukuba mweshi mukoli bihuusiri.
Ubugale bwinyu, bugaamala, mutanâye ki yikangaate.
12 Ikyanya keera kyahikaga!
Ee! Lulya lusiku lukoli yegiiri.
Umuguzi, mutamúleke mbu ashambaale.
Umudandaza naye, atakwaniini ajengeerwe.
Si yabo booshi, uburaakari bwani bugabatibukira kwo.
13 Abadandaza, kundu bangafuushuka,
halikago, batâye galuke mu budandaza bwabo.
Mukuba, ngiisi byo Nahano ashungisiri,
biri hiꞌgulu lya booshi, bitaganahinduka.
Umundu, iri angaba keera abihuuka, atangaki yikiza.
14 «Ikibuga kigweti kigadihirizibwa,
na booshi banabe ibiringiini.
Kundu kwokwo, ndaaye úwangayifunda mwiꞌzibo,
mukuba yabo booshi, ngoli barakariiri bweneene.
15 Ngiisi ábatuuziri imbuga lyaꞌkaaya, bagayitwa ku ngooti.
Na ábatuuziri mu kaaya, bo bakoli shalisiri, banakoli lwaziri.
Kwokwo kwo nabo, bagaminikwa.
16 Ngiisi ábakafuushukira mu migazi, ikyanya bagayiganyira hiꞌgulu lyeꞌbyaha byabo,
abandu bagabayuvwa bali nga ngunde za mu kabanda.
17 Amaboko ga ngiisi mundu, gakola gagalebera hiꞌgulu lyeꞌkyoba.
Naꞌmadwi gaabo, gagaanoga bweneene, nga miiji,
18 banayambale amasuuzu.
Kiri naꞌmatwe gaabo, kwo bali booshi, ganakunguulwe,
mu kuyerekana ngiisi kwo bakoli jengiirwi.
Amalanga gaabo gagazizibala hiꞌgulu lyeꞌshoni,
banakizi teteerwa lwoshi-lwoshi.
19 Ifwaranga zaabo, kiri neꞌnooro, bagazikabulira mu njira,
nga kindu íkikoli yulubiiri.
Ehee! Ku lusiku lwo Nahano agabarakarira kwo,
ifwaranga zaabo neꞌnooro zitagabakiza.
Batanganabikoleesa, mu kuyiliisa,
bitaganabayigusa.
Si yibyo byoshi, byo byâli kizi bahubiisa.
20 Yabo Bahisiraheeri, bâli kizi yiyuvwa hiꞌgulu lyoꞌbungeni-ngeni bwabo,
banakizi bukoleesa mu kutula imigisi, kundu yâli ya kuyagazania bweneene.
Yubwo bugale bwabo bwoshi, ngabuyulubaza.
21 Bulya bugale bwaꞌBahisiraheeri, ibinyamahanga bigabushahula.
Banangora-mabi bagabubiika mu bihinda byabo, banakizi buyulubaza.
22 Abanyazi bagayifunda ahandu haani heeru,
banahayulubaze.
Ku yikyo kyanya, ndagatwaza Abahisiraheeri,
si ngabahindulira ingoto.
23 Mu kaaya keꞌYerusaleemu, abandu baani bali mu komeresania mwo.
Naꞌhandi hooshi mu kihugo, bagweti bagayona umuko.
Aaho! Mukizi tulaga iminyororo, gira mubashweke.
24 Ngaleeta banakuhambwa ukulyoka mu mahanga,
gira bayiji hyana inyumba zaꞌbandu baani.
Na kwakundi, ahandu haabo hoꞌkuyikumbira hagayulubazibwa.
Kwokwo, kwoꞌbwikangaate bwabo, bugaamala.
25 Abandu baani, ikyanya bagalibuuka, bagakizi shenguka.
Kundu bagalooza umutuula, ndaagwo bagalonga.
26 Bagakizi teerwa neꞌnguuke,
halinde abandu banakizi balomboojera umwazi gwa kundi-kundi.
Bagalooza umuleevi woꞌkubatangira ubuleevi.
Banabe keera bateera amigirizo gaꞌbagingi.
Kiri naꞌmahano gaꞌbashaaja, gagaaba gateereka.
27 Mwami agabululuka ku kimombo.
Noꞌmuluzi agavunika umutima.
Abandu bagakizi juguma hiꞌgulu lyeꞌkyoba.
Mukuba ngabahaniiriza, ukukulikirana naꞌmabi gaabo.
Ngiisi kwo bakahana abandi, kwo na kwokwo nabo ngabahana,
halinde banamenye ku kasiisa kwo nie Nahano.»