9
Ikihano kya Rurema
1 Ha nyuma, nanabonaga Nahano, ayimaaziri ha butambi lyaꞌkatanda, anambwira:
«Ushulikage bukayu ku zirya nguliro zeꞌnyumba ya Rurema,
halinde indaliro zaayo zijugumbane.
Yizo nguliro, uzihongolere haashi, halinde zitibukire ku bandu.
Ngiisi ábagaaba baki sigiiragi, ngabayita ku ngooti.
Mu kati kaabo, ndaaye úgafuushuka, kiri noꞌmuguma!
2 Kundu bangayihumbiraga halinde banahike i nakwere,
ngayisa ukuboko, ninashubi bakulula.
Na kundu bangashona mwiꞌgulu, ngabashungulula yo.
3 Kwakundi, kundu bangayibisha kwiꞌrango lyoꞌmugazi Karimeeri,
ngagendi bashakula yo, na mbabirigishe.
Na kundu bangagendi bishama mu tulingi tweꞌnyaaja,
ngahanguula kirya kihuume kyoꞌmujoka, kigendi bakoma mwo.
4 Kundu abagoma baabo bangabatwala imbohe,
ngakyula kwo babaminikire yeyo munda, ku ngooti.
Emwe! Ngabayuja-yuja. Si keera nahiga kwo ngabayogogoza!
Kutanali mbu mbagirire amiija!»
5 Nahano woꞌbushobozi bwoshi, ikyanya ali mu huma ku kihugo,
kinayami jugumbana.
Ikihugo kiri mu yami heema ngoꞌlwiji Niire ku kyanya kyeꞌnvula,
kinashubi yema.
Kwokwo, abandu booshi banayami bululuka mu kigandaaro.
6 Nahano ayubasiri akaaya kaage iriira munda mwiꞌgulu.
Anayaja ikyanyaanya hiꞌgulu lyeꞌkihugo.
Ali mu kizi hamagala amiiji geꞌnyaaja, mu kugakuumania.
Neꞌkyanya kyeꞌnvula, anashubi gayonera mu kihugo.
Ee ma! Iziina lyage, ye Nahano.
7 Nahano adeta kwokuno: «E Bahisiraheeri, lekagi nimùbuuze.
Ka mwe muli naꞌkamaro imbere lyani, ukuhima abandu beꞌKuushi?
Biri ukuli kwo nꞌgamùlyosa mu kihugo kyeꞌMiisiri.
Si kiri naꞌBafirisiti nabo, nꞌgabalyosa i Kereete.
NaꞌBaharaamu kwakundi, nanabalyosa i Kiiri.
8 «Nie Rurema Nahamwinyu, ngweti ngadetaga kwokuno:
Yaba Bahisiraheeri, beene Yakobo, si balyagagi banabyaha!
Kwokwo, ngweti ngabalangiiza, na mbaminike mu kihugo.
Haliko, ndagayami baminika lwoshi-lwoshi.
9 Ikyanya ngakyula, ibinyamahanga bigayiji yeluula-yeluula Abahisiraheeri,
nga kwo bali mu yeluula ingano, na ndyose mwo ábatakwaniini.
Na mu yabo ábatakwaniini, ndaaye kiri noꞌmuguma úgafuuka.
10 Balya banabyaha booshi, bagayitwa ku ngooti.
Banali bo bâli gweti bagakizi ravwanga, ti: “Twehe, ubuhanya butâye tuhikire!”
11 «Irya nyumba ya Dahudi, kundu ikayihongoleka haashi,
halikago ku lulya lusiku, ngashubi giyubakulula.
Iyo nyumba, kundu gushuba mushaka, ngashubi giyubaka kandi,
inashubi longa ubulangashane, nga kwo yâli yamiri kare.
12 Haaho, Abahisiraheeri bagashubi hyana ngiisi twaya útukasigala mu kihugo kyeꞌHedoomu.
Banahyane kiri noꞌtwaya twaꞌgandi mahanga gooshi.
Yaga gooshi, nie Nahano nie wagadeta, nganagakoleesa.»
13 Nahano adetaga kwokuno:
«Mu yizo siku, mugaaba neꞌbyokulya íbiri tiita.
Ingano neꞌmizabibu, bigayera duba bweneene,
halinde mutanabe neꞌkyanya kyoꞌkuyimbula byoshi.
Imigazi igakizi hinga kweꞌdivaayi nunu, kiri na ku tugangazi.
14 Abandu baani, Abahisiraheeri, kundu bâli twazirwi imbohe mu buja,
halikago, ngabagalulira i kaaya.
Na kundu utwaya twabo twâli mali sherebera,
halikago, bagashubi tuyubakulula, banatutuule mwo.
Bagakizi byala imizabibu, banagikande mweꞌdivaayi, banaginywe.
Kiri neꞌndalo zaabo, bagakizi zilima. Neꞌmimbu yazo, banakizi gilya.
15 Ngashubi basikamya mu kyekyo kihugo kyabo, banagangaale mwo.
Si keera nabaheereza kyo, batanâye ki simuulwe mwo.»
Kwokwo, kwo Rurema Nahamwinyu adesiri.