5
Hamoosi ayamamaza
1 E Bahisiraheeri! Muyuvwirize bwija yulu lwimbo lwani lweꞌkigandaaro:
Muyuvwagwe ngiisi kwo ngweti ngamùganyira.
2 Abahisiraheeri, kundu bashubi nonosiri,
halikago, keera bayibumbulika haashi, bataganaki yivyula.
Bakolaga ngoꞌmunyere keera úwahola,
ndaanaye woꞌkumútabaala avyuke.
3 Rurema Nahamwitu adetaga kwokuno:
«Mu Bahisiraheeri, ikyanya abasirikaani kihumbi bagalyoka mu kaaya,
igana naaho bo bagagaluka.
Neꞌkyanya abasirikaani igana bagalyoka mwo,
ikumi naaho, bo bagagaluka.»
4 Kwokwo, Nahano abwira Abahisiraheeri kwokuno:
«Mugalukirage imwani, lyo mulama!
5 Mutakizi gendi njakulira i Beteeri, kandi iri i Girigaali.
Mutanakizi manukira i Beeri-Sheba, mbu mundogeze yo.
Yabo bandu beꞌGirigaali, si bagagendi twalwa imbohe!
Kiri naꞌkaaya keꞌBeteeri, si kagasigala mushaka!»
6 Aaho! Mugalukirage Nahano, lyo mulama.
Buzira kwokwo, agayilala mu beene Yusefu nga muliro.
Gulya muliro, gugajigiivya akaaya keꞌBeteeri,
ndaanaye úgaahasha ukuguzimya.
7 Si mugweti mugashobania íbikwaniini,
Na ngiisi íbiri byoꞌkuli, mugweti mugabinyanyaga haashi.
8 Nahano ye kalema ikiso kyeꞌndonde íkiri mu buuzibwa Kirimya, neꞌHoryoni.
Anagweti agalyosa ikihulu, mu kutanguula izuuba.
Izuuba nalyo, mu kabigingwe ali mu lihindula kihulu.
Kiri naꞌmiiji ga mu nyaaja mbamu, ali mu gakuumania,
anashubi gayonera mu kihugo nga nvula.
Iziina lyage, ye Nahano!
9 Kundu abandu bangabiiri balyagagi bikalage, si ali mu yami bashereeza!
Naꞌkaaya kwakundi, kundu kangabiiri kali neꞌnzitiro ngomu,
ali mu yami zihongola.
10 E Bahisiraheeri! Kundu abandu bali mu bulanira ukuli,
si mwehe muli mu ba mubashombiri bweneene.
Neꞌkyanya bali mu deta ukuli,
si muli mu bagayiriza.
11 Ikyanya abandu bakeniri, muli mu shubi balibata-libata.
Si ikyanya muli mu batangiisa ingano ku kahaati, lyo muli mu bazimba.
Kundu mukakizi yubaka inyumba nyiija zaꞌmabuye mabaaje,
mutâye zituule mwo!
Na kundu muli mu limiisa indalo zeꞌmizabibu miija,
ikyanya bâye gikande mweꞌdivaayi, mutâye ginywe kwo.
12 Ngoli yijagi inooka ngiisi kwo mugweti mugahuba.
Nyiji na ngiisi kweꞌbyaha biinyu keera byaluguuka bweneene.
Abandu, kundu bangabiiri balyagagi bazira buhube,
mugweti mugabalibuza mu kubahuuna ikitulire.
Neꞌkyanya abakeni bali mu looza ukuli imbere lyaꞌbatwi beꞌmaaja,
muli mu kizi bahangirira.
13 Ku kyanya kibi nga kyekino, ndaakwo kundi! Umwenge, ali mu hulika ngana.
14 Mukizi yiyeka noꞌkugira amabi.
Si mube noꞌmwete gwoꞌkukizi gira amiija, lyo mulama.
Haaho, lyo Nahano Rurema woꞌbushobozi bwoshi agamùtabaala,
nga kwokulya muli mu kizi deta.
15 Ngiisi mabi, mukizi gashomba, munabe mukuuziri amiija.
Ikyanya mugakizi buulania abandu, mukizi kulikira ibyoꞌkuli.
Kwokwo, balya beene Yusefu ábasigiiri,
hali ikyanya Nahano Rurema woꞌbushobozi bwoshi angabakejeerera.
16 Nahano Rurema woꞌbushobozi bwoshi agweti agaadeta kwokuno:
«Abandu bagakizi liruuka mu tuguliro, na mu ngiisi injira.
Bagakizi bululuka kwokuno: “Ala twe! Ala twe!”
Bagakizi tabaaza abahiizi, banatange ifwaranga imwaꞌbalizi,
gira bakizi yiji batabaala ukulira.
17 Mu ngiisi ndalo zeꞌmizabibu, mugaaba ikimombo naaho.
Balya booshi, ngabaminika ngana.»
Kwokwo, kwo Nahano adesiri!
Ulusiku lwo Nahano agaatwa kweꞌmaaja
18 Si mugweti mugaadeta:
«Ulusiku lwo Nahano agaatwa kweꞌmaaja, tululindiiri ku kyedu bweneene!»
Yayewe imwinyu! Lulya lusiku, kundu mugweti mugalulindirira,
si lutagamùleetera umulengeerwe, lunabe lwa kihulu naaho.
19 Yulwo lusiku, ikyanya lugaahika, mugaaba ngoꞌmundu úgweti úgatibita indare,
kiziga, agendi yituruuza ku dubu.
Kandi iri, ikyanya agayingira mu mwage,
anayegamire ku kibambaazi, umujoka gunayami múkoma!
20 Ulusiku lwa Nahano, lutagaleeta umulengeerwe.
Si lugaaba naaho lwa kihulu namudidi, buzira kiri noꞌlukeera.
21 Nahano adetaga kwokuno:
«Iri ndi mu bona ngiisi kwo mugweti muganaaka-naaka ku siku ziinyu ngulu,
ndi mu yami zishomba bweneene!
Nyamiri nzinegwiri ngana.
22 Kundu mwangandangira amatuulo goꞌkusiriiza lwoshi, na goꞌmushyano,
ndagagayemeera!
Na kundu mwangandangira ibitugwa, mbu gabe matuulo goꞌkuyerekana ingoome,
ndagagatwaza kiri neꞌhiniini!
23 Mulekage ukumbonga ulujongo, mbu mugweti muganyimbira!
Si ikyanya mugakizi lasa inyimbo, ndâye ziyuvwe!
24 «Niehe, byo ndoziizi naaho, kwo mulekage ukuli kukizi golomba nga lwiji. Kukizi yama kuli mu golomba nga lwiji úlutâye kame.
25 E Bahisiraheeri, ikyanya mukahisa imyaka makumi gana muli mwiꞌshamba, ka nie mwâli kizi tangira amatuulo geꞌbitugwa, naꞌgandi matuulo? Aahabi!
26 Si mwâli kizi kolera imizimu yinyu: ngoꞌmuzimu Sakuti mwami winyu, noꞌmuzimu ndonde Kihuni. Iyo migisi, si mwenyene mwe mukagiyibaajira!
27 Aahago! Buno, ngola ngamùtwalaga imbohe,
mu mbinga za hala ukuhima i Damasiki.»
Kwokwo, kwo Nahano adesiri!
Niꞌziina lyage, ye Rurema woꞌbushobozi bwoshi.