3
1 E Bahisiraheeri! Muyuvwagwe ngiisi kwo Nahano agweti agamùkanukira:
«Ubwa mbere, nꞌgamùlyosa i Miisiri.
2 Mu bandu booshi ba mu kihugo, mwehe naaho mwe nâli kizi hahala.
Halikago, bwo mwâli kizi gira ibyaha bweneene,
kyo kitumiri ngamùhaniiriza.»
Umukolwa gwoꞌmuleevi
3 E balya! Abandu babiri batangabalamanwa,
bátanazi lagaana ho bali mu genda.
4 Indare nayo, itali mu lunduma mu kishuka, ítazi yita inyamiishwa.
Itanali mu bwija mwiꞌbundo, ítazi longa byo igaalya.
5 Akanyuni nako, katali mu gwatwa mu mutego buzira kyambo.
Gutanali mu huka, ndaanakyo kindu íkyaguhusa.
6 Ikibuga, iri kyangadihirizibwa mu kaaya, abandu baamwo bali mu yami yoboha.
Kwokwo, noꞌbuhanya, butangagwata akaaya, Nahano átazi kyula.
7 Ku kasiisa, Rurema Nahamwitu atangagira igambo lyoshi,
átazi menyeesa abakozi baage, abaleevi.
8 Indare ku kyanya yalunduma, nyandi útangayoboha?
Buno, Rurema Nahamwitu naye keera adetaga.
Aaho! Nyandi úwangaki lahira ukutanga ubuleevi?
I Samariya yashereezibwa
9 Ino ndumwa, ugimenyeese mu batuuziri mu butwali bweꞌHashidoodi, na mu bweꞌMiisiri:
«Mukuumanage ku migazi ízungulusiri i Samariya,
gira muyibonere ngiisi kwaꞌbandu bali mu kamburugu kingi,
na ngiisi kwo bagweti bagalibuzania.»
10 Nahano adetaga kwokuno:
«Abandu baani, bataki yiji ngiisi kwo bangagira íbikwaniini!
Inyumba zaabo ngomu, si ziyijwiragi mweꞌbindu byo bakanyaga!»
11 Ku yukwo, Rurema Nahamwitu adetaga kwokuno:
«Abagoma bakola bagayiji shereeza ikihugo kiinyu,
banahongolage inyumba ziinyu ngomu-ngomu.
Na íbiri mwo, banabishahule.»
12 Nahano adetaga kwokuno:
«Indare, ikyanya igweti ikibuzi mu kanwa kaayo,
umungere ali mu fuusa amagulu gabiri naaho, kandi iri ikihande kyoꞌkutwiri.
Kwokwo, kwaꞌBahisiraheeri bagakizibwa mu kaaya keꞌSamariya.
Biryagagi kwokwo, kundu baki gweti bagavwagarara ku bitumbi biija, naꞌbandi ku ngingo.
Si ábagasigala, bagaaba bagerwa naaho.»
13 Nahano Rurema woꞌbushobozi bwoshi, adetaga kwokuno:
«Munyuvwirize bwija! Niinyu mukagendi bwira Abahisiraheeri booshi kwokuno:
14 Ngaki mùhana hiꞌgulu lyaꞌmahube giinyu.
Ku lwolwo lusiku, ngashereeza noꞌtutanda útuli i Beteeri.
Yutwo tutanda, utugongo twatwo tugatolwa, tunatibukire haashi.
15 Ngahongola neꞌnyumba zooshi zaꞌbagale,
ziba za kutuula mwo ku kyanya kyeꞌmbeho, kandi iri ku kyanya kiꞌduutu.
Ngahongolaga inyumba mbamu zooshi ízilimbisiibwi naꞌmahembe geꞌnjovu.»
Kwokwo, kwo Nahano adesiri.