2
Godeïe ado neadigilo dolö moholö
1 Nïe nedoo nalifila dili-e, nilïle Dafidilo Geloi Yesu Geleso e bu obëgësegi, nilï ebalä gedomolö amoïe dilima ado afädë gelola säla ïahago.
2 Dolö odoaea dilima sähalea, Dafidilo Geloiïe segeyo amo, hä, besela galaimelëla säsege, bea sälo afädëa amala bea säla säimelëla säsege, amase, dolö afädëa sähalea, Folola ilia beba dëdëi amogi amo gadola dëdëi dibeola säsege, amo nabala fodolofalï säosäola fudugimabio.
3 Ili odoaea amoli säi amo gadola elö elöla sälahilä, dili dahila neloea hedabola idihë namialo. Segeyo amoda memalä made besela galamolömelë. Dafidida, yafiea Godeïe ado made nabala auaula namolöge, amase, ado säla negei neadigilo dolöge maala ulufadigimolömelë. Dolö amoda heli segea moholömelë.
4 Eada udia dolöea wäfalï gode gadoima göa nelegelo nelebo amoli sulubadelabalä ado nimolöge, ea nelebo amoli baagila awäla hïle ëi gauia adogola, Godeïe mosöa nogila digala salea, Neda Godemelëla sämolömelë.
5 Ne dilibalä nelo amogi, amoli hamomolö amo na dilima säla ï amoda, dilia made helësëla, elaboi neale.
6 Waliowegi ado neadigilo dolö amo made misiäia idi gai amoda gowe gadoila dilia dawadigisa maadei. Godea daiai segeyogi e maala ulufadigimolömelë.
7 Ado säla negei neadigilo mala amoda, odoaea walio musügä hamoi hamosa nefolalea. Amaha gaso, neadigilo mala amo walio idi galo dolö amea amala gagala awäha neëgi, Godea e hä, bisilimolömelë.
8 Amala hamoseda, ado säla negei neadigilo dolö amo ulufamolö. Dolö amoda Dafidilo Geloi Yesuea ïe nafiadila hame fisigise amea baagomäia nufulömelë. Ä, hï e yo digalo geloibalä maalahilä, yo digalo amea dolö amo nufudaha maademolömelë.
9 Ado säla negei neadigilo dolö amoda, mugabe Saidaniïe geloigila maalahilä, hïdo elöi hamola, dolöea hamomolöi made gadoige, melëlo made gadoige, wäfalï hamomolömelë.
10 Ea nafade elö elöla wäfalï hamolo dibe amo sulubadelaea, udia dolö nafadegi moholö amoli dahila neala hamomolömelë. Ilia ado dofä amoma boba hamomolö amo habobai amea, ili nafadegi moholömelë. Ilia ado dofä amoma boba hamoi galebeda, Godea ili sigi obëgëlabio.
11 Amai amea, ilia wäfalï säse amo dofä gabula helësëmäiaïe, Godea ilile asigi neala gagaolasisa nea.
12 Amase, udia dolöea ado dofä amo gaula mogola made, mala nafademu obeägïla hamolo nefolalebe amoli sulubadelabaläda, Godea gudila mogemäiamelë.
Godea dili damula moholöïe daiala memelei
13 Nedoo nalifi Dafidilo Geloia boba hamosa neebela dili-e, nilïa dili helësëla segeyo sulubadelagi Godema nesegesa namolöi dialea. Mida, sege föi mi gäwia amila hïle udia dolöfalï namiäia dili nafolala memelei. Eleloi Gesamia ugila negelasisebegi, dilia dilile namolö sulubadela Godegali ïaha maadelahilä eleloi neebe ameage, amase, Godeïe ado amoda dofä gabula helësësa neebe ameage, Godea dili damula moholöla daiala memelei.
14 Amala hamomäiaïe, Ado Mala Hedabi nilïa dilima säla olelesebegi nabi ameada, Godea dili weimelë. Nilïle Dafidilo Geloi Yesu Gelesoïe geloile yo digalo amole diliage gaalu nimäiaïe weimelë.
15 Amai ameada, nïe nedoo nalifila dili-e, gelola namialo. Nilïa dilima Godeïe ado mala säla ï amoge, amase, beba dëdëla ï amogi säla olelei amoge, dilia hedabola bëgëla hamomalo.
16 Nilïle Dafidilo Geloi Yesu Geleso hï emage, nilïle Naado Godemage dilile adolasisa nea. Naado Godea nilï boba hamolahilä, ïe ugila negelasilo amea nilïle asigi neala gelolasila, fisila made, gelolasisamu nea, dofä asigi neala sisiläfülasisio.
17 Ea dilile iso asigi gelolasila, ado hedabolamu sämäiage, mala hedabi dibe amo gadola sulubadela bëgëla hamomäiage, geloi ïmäia adolasisa neamelë.