3
Foloea Desalonaiga ili gelolasimäia Dimodi fisiga gai
1 Nilïa dili asigila, beaha namolöda dofea made gabugi, hä, alïmu Adenesi namolöla helësëlahilä,
2 alïa nilïle nedoo Dimodi e dili bimäia fisiga gai. Dimodi eda Gelesoïe Ado Mala Hedabi säla ïlo neada, Godebalä nea hamoi gaalu hamosa aligilomelë. Ea dili gelolasila, dilile asigi afädë negei amo iilasimäia, e fisiga gai amoda,
3 dilia yöi gaula, së naha nebego, fologola fudugiloeaïe amai. Yöi amoli gaumäia Godea nilï memelei amoda, dihili dawagomelë.
4 Nilï dafidi dilibalä nelo amogi neada, dilima nilïa gomalä säla ï. Sëi elö elöla nilï mia besela galamolömelëla säla ï amomelë. Segeyo nafade amoda, hä, nilï mia besela galai dibe amoda, dilia dawadigi.
5 Na beaha namolöda dofea made gabugi, dilia asigi afädë negeigo amalasi neebelela bimolöïe, Dimodi e mosalaigomelë. Na helësësaleada, fedogola melëlo mugabe Saidania, dilile asigi afädë negeigo fisimäia, dili säfe negesegi, nilïa hamoi hamosa nelo amo waeaseloeamelë.
Dimodia ado hedabi gaula misi amogi Foloea obeägï
6 Amaimo, Dimodi e dili neebea guila, hädamade maala, nilïbalä nea. Ea sähalea, dilia asigi afädë negei amo amalasi neamelëlage, dihilimu boba hahamosa neamelëlage, ea obeägï ado amo nilïma säla ïasio. Amo gadola säla ïahalea, nilïa dili helësësamu nea, dili bimolöila helësësa neebewe gadola, diliage segeyo sulubadelagi nilï helësëla obeägïlomu nea, nilï siia bimolöila säha neamelëla säi amo nilïa nabimelë.
7 Nïe nedoo nalifila dili-e, amala hamosa neamelëla ea säla ï ameada, nilï yömolöge sëmolöge dibea amila, dilia asigi afädë negei amo amalasi neamelëla säi nabi ameada, nilïle iso asigi neala gelolasimelë.
8 Hä, dilia Dafidilo Geloima dilahilä, gelola namolöi neebe ameada, walio dofä nilïle iso asigi neala obeägïlasi neamelë.
9 Nilïa dili helësëla, nilïle Godeïe sidaia edefademalä obeägïsa nea. Amaha gaso, nilïa helësësaleada, obeägïlo nilïma ï dibe ameada, nilïa Godema nesegela säla, bu dabe abeahäla obëgëmolödula helësësamelë.
10 Nilïa dili bimolöila helësëla, yoba gasigige Godema adosamu neada, dilile asigi afädë negei amo obobaloea, nilïa neala gelolasila moholöïe, adosamu aligilomelë.
Folo e ili neebea moholö amoïe, Godea idi gai doga negemäia, ea Godema adosa nelo
11 Nilïle Naado Godeage, nilïle Dafidilo Geloi Yesueage, nilï dili neebea moholö amo idi doga negemäia hamesa neamelë.
12 Dihilimu boba hamosa neebe goïege, udia dolö sulubadelabalä boba hamosa neebe goïege, Dafidilo Geloia bäulasila, nobala adugaha namiäiala säha. Dilia boba hamolo amoda, nilïa dilima boba hamosebewe gadola hamomäia hamesamelë.
13 Nilïle Dafidilo Geloi Yesula, e fii asigi mogoi sulubadelabalä maasolo amo gala, dili nilïle Naado Godeïe siigi, nafade made baai, mogoifalï namolöïe, ea dilile iso asigi neala gelolasimäiala säha.