22
Enda Kelyao Nee Andake Yangeana Lao Kongali Leamo Doko
1-2 Jisasame kongali pii mendapu deaka dokaita lamaiyoo, “Kingdom kaiti-kisa singi doko dapale: Kiŋi mendenya ikiningi doko enda kelyeamopa, takangeme nee andake mende yangakamaiya.
3 Yangatakamai kiŋi dokome endakali epena latae dupa baanya kalai akali dupame lanyala pena lea. Dopa lateamopa, dokaita pupala nee nala epena lao nee napenge latae dupa lamaiyaminopa, dokaita daa leami.
4 Dopa leaminosa, baame kalai akali waka mendatupa pena latala lao pituu, ‘Endakali nee napenge latae dupa lamaiyoo, “Kao maipapi, kao andapaepi dupa pyapalamo. Dupa pitaka depa latae sepelyamona, nyakama nee nala ipupa” lapape’ lea.
5 Dokopa kalai akali dupame dopa lamaiyamiaka doko, endakali nee napenge latae dupame pii nepatala, dokaitanya masiamili pyoo, mende baanya eenya pea, mende baanya bisinisa pyaa pea.
6 Yangimi kalai akali dupa minatala, mana koo minao pyao kumasiami.
7 Dopa piami doko kiŋi dokome sepala, baa imbu kaeya. Imbu kaeyapala baanya amii dupa pena leamopa, dupame baanya kalai akali pyao kumasiami endakali dupa pyao kumasetala, dupanya siti doko yangeami.
8 Dokopa kiŋi dokome baanya kalai akali dupa lamaiyoo, ‘Nambanya nee andake doko depa latae sepelyamoaka doko, nee napenge latae endakali dupa kooma-lamo.
9 Dopana, nyakama kaitini kembo dupanya pupala, endakali kandatami dupa pitaka nee andake dakenya nala epena lamaiyepape’ lea.
10 Dopa lateamopa, kalai akali dokaita kaitini kembo dupanya pupala, endakali koopi, epepi kandeami dupa pitaka laminao ipao kambu piaminopa, nee andake napenge panda doko tumbia.
11 “Tumbao peteami dokonya kiŋi doko ipupala endakali dokaita kandeamopa, akali mende yonge pee enda kelyengesa pingi doko napyoo peteamo kandea.
12 Kandatala kiŋi dokome baa lamaiyoo, ‘Kaimii, embanya yonge pee enda kelyengesa pingi doko napyene-lamo doko, emba aipa petala dakenya epepe?’ lea. Dopa leamopa akali dokome pii mende nalea.
13 Dokopa kiŋi dokome baanya kalai akali dupa lamaiyoo, ‘Akali dakenya kingi mokopi dupa yaki petala, baa nyoo kamalya iminjetae dokonya pyale lapa. Panda dokonya endakali dupa ee lao, nenge giti-gato lao nao katatamina’ lea.
14 Salapape! Goteme endakali longo epena lengeaka doko, baame endakali kuki yapao nyingina” lea.
Takisa Dupa Sisa Maipengepe Daape Lao Tipa Piamino Doko
15 Dokopa Jisasame pii mende kopeta latamopa baa minamana latala, Parasi dupa pupala pii lao kambuiyami.
16 Kambutala Parasi dupame nyakamanya disaipolo mendapupi, Erote tata mendapupi, dupa Jisasa katea dokonya pena leami. Akali dupa pupala baa lamaiyoo, “Mana Lenge, embame endakali mende mona setapala, mende maka kaeyala naenge. Endakali kenge singipi, nasingipi dupanya mendeme emba mende latamini-lao paka nakaeyao, kiningi pii doko lao, Gotenya mana dupa tolao mana lengena lao naimame masilyamano.
17 Dopana, embame aipa lao masilyi? Sisa doko takisa maipengena lao loome latae singipi, nasingipi?” leami.
18 Dopa leaminopa, Jisasame dokaitanya koo kalai pimana lao masiamino doko kandatala, baame lao pituu, “Nyakama mana tolatae miningi manemane pingima dupame aipuma namba makande pilyami?
19 Takisa maipenge muni konde mende nambame kandatoo panalapa” lea. Dokopa dokaitame muni konde mende nyoo ipateaminopa,
20 Jisasame dokaita lamaiyoo, “Muni konde dokonya apinya lenge-lyaapi, kengepi dupa kalyape?” lea.
21 Dopa leamopa dokaitame baa lamaiyoo, “Sisanya kalyamona” leami. Dokopa baame dokaita lamaiyoo, “Sisanya dupa Sisa tange maiyakamaiyepape. Gotenya dupa Gote tange maiyakamaiyepape” lea.
22 Pii doko sepala, dokaita paka kaeyao walu latala, baa yakinatala peami.
Endakali Kumapae Dupa Sakatatami Dokonya Sadyusi Dupame Tipa Piamino Doko
23 Endakali kumapae dupa sakatala naeyatamina lengema, Sadyusi dupa gii dokopaka Jisasa katea dokonya ipupala baa lamaiyoo,
24 “Mana Lenge, Mosesame lao pituu, ‘Akali mendeme wane manja naeyao kumatamo doko, baanya kaiminingi dokome enda walyakae doko pisetala, kaiminingi dokonya lao wane manjakamaipengena’ lea-pyaa.
25 Dopana, kaiminingi kalange naima-pipa kateama. Kaiminingi mupa doko enda nyepala, wane manja naeyao baa kumia. Kumateamopa, kaiminingi lapo dokome enda walyakae doko pisetala,
26 wane manja naeyaowaka baa kumia. Kaiminingi tepo dokome enda walyakae dokoaka pisetala, wane manja naeyaowaka baa kumia. Kaiminingi kalange dutupa pitakame enda walyakae dokoaka pisetala, wane manja naeyaowaka dutupa kumiami.
27 Dutupa pitaka kumao ete dokonya, enda doko kumiaka.
28 Kaiminingi kalange dutupa pitakame enda mendai dokoaka nyiamino dokonya, endakali kumapae dupa sakatatami gii dokopa enda doko apinya jetape?” lao tipa piami.
29 Dokopa Jisasame dokaitanya pii yanu pyakamaiyoo, “Nyakamame Gotenya pii pepa pyapae singi doko masala naeyao, Gotenya kyeto doko masala naeyaowaka pingima dokonya, nyakamame kopeta lelyamino.
30 Endakali kumapae dupa sakatatami gii dokopa, akali dupa enda nyala naeyao, wanaku dupa akali nyala paa naeyao, Gotenya enjele kaiti-kisa katenge dupa katengemali pyoo katatami.
31 Endakali kumapae dupa sakatatami dokonya, Goteme nyakamanya pii lanya setekeamo dake itaki napiamipi?
32 Goteme lao pituu, ‘Abraamepi, Aisakepi, Jekopepi dutupanya Gote doko nambana’ lea. Gote baa kumapae dupanya Gote daa. Baa saka katenge dupanya Gotena” lea.
33 Dopa leamopa, endakali kambu piami dupame Jisasanya mana leamo dupa sepala, walu lao paka kaeyami.
Mosesanya Loo Dupanya Mupa Doko
34 Jisasame Sadyusi dupa pii nalena lao, etete auu pyoo yanu pyakamaiyamo sepala, Parasi dupa Jisasa katea dokonya ipao kambu piami.
35-36 Kambu piaminopa, looya mendeme Jisasa makande pyoo, “Mana Lenge, Mosesanya loo dupanya anduku etete andakepe?” lao tipa pia.
37 Dokopa Jisasame baa lamaiyoo, “ ‘Embanya monapi, embanya imambupi, embanya masingipi, dutupa pitakame embanya Kamongo Gote doko auu kaeyape.’
38 Loo doko etete andake-kisa mupa doko.
39 Loo lapo pyoo dake dopaleaka: ‘Emba tange auu kaengeli pyoo, embanya patali maki dupa auu kaeyape.’
40 Mosesanya loo dupapi, propeta dupame pepa piami dupapi, dupa pitaka loo lapoma dolaponya koko palelyamona” lea.
Kraisa Doko Baa Apinya Ikiningipi Lao Jisasame Tipa Piamo Doko
41 Parasi dupa kambu pyatae kateaminopa Jisasame dokaita tipa pyoo,
42 “Nyakamame Kraisa doko apina lao masilyami? Baa apinya ikiningipi?” lea. Dopa leamopa dokaitame lao pituu, “Baa Dapitanya ikiningina” leami.
43 Dopa leaminopa Jisasame dokaita lamaiyoo, “Spirita dokome masepae maiyamopa, Dapitame kaitini andukunya-kaita Kraisa doko Kamongona lea?
44 Dapitame dapa lea: ‘Kamongome nambanya Kamongo doko lamaiyoo, “Emba nambanya kingi tolaetena piti. Dokonya pititinopa, nambame embanya yandapipi dupa embanya moko setenge toko jina latona” leana’ lea.
45 Dapitame Kraisa doko Kamongona lea-lumu doko, kaitini andukunya-kaita Kraisa doko Dapitanya ikiningipi?” lea.
46 Dopa lateamopa, endakali mendeme Jisasanya pii doko kapa pao yanu pyapenge nanjia. Gii dokonya pituu, endakali mendaipi mendeme baa pii mende dee tipa pyaanya paka kaeyami.