9
Dopa latala Jisasame dokaita lamaiyoo, “Nambame nyakama kiningi langilyo: Endakali asa kalyamino dapuanya mendapu kumala naeyataminopa, Gotenya kingdom doko kyeto doko-pipa panao ipatamopa kandatamina” lea.
Jisasa Waka Jiamo Doko
+Yuu gii tokange pateamopa, Jisasame Pitapi, Jemesapi, Jonepi dutupa iki laminao, yuu manda ketae mendenya lalyoo pea. Pupala dokonya kateaminopa, dutupanya enombanya Jisasa baa waka jia. Baanya yonge pee dupa etete kyeo lao polepole pia. Baanya yonge pee kyeo lea dopa pyoo, isa yuu dakenya endakali mendeme dopale mende kyeo lena lao wasa napingi. Dokopa Ilaijapa, Mosesapa dolapo Jisasa-pipa pii lao kalyu piambinopa kandeami. Kandatala Pitame Jisasa lamaiyoo, “Mana Lenge, naima dakenya katamanopa auu pilyamona, naimame sele anda tepoma pimana. Mende embanya, mende Mosesanya, mende Ilaijanyana” lea. (Dutupa etete paka kaeyapala, Pitame aipa laowape lao masala naeyao lea.) +Dokopa kopa mende ipupala dutupa sanga pia. Dopa piamopa pii mende kopa tambetambe epea dokome lao pituu, “Dake nambanya Ikiningi mona setenge dokona, nyakamame baanya pii doko sakamaiyepape” lea. Dopa lalu piamopa disaipolo tepoma dutupame kandayoko leaminopa, endakali waka mende nakatea. Jisasa baa iki kateamo kandeami.
Yuu manda doko yakinatala lanao ipao pituu, nyakamame kanjamino doko, Akalinya Ikiningi doko kumapala sakatatatamopa, endakali dupa lamaitamina, indupa endakali mende lamaiya naena lao, Jisasame kyeto joo daa lea. 10 Baame pii lea doko dutupa-kisa sina kaeyapala, kumapala sakatapengena lamo dokonya tenge doko aipa pyoo laape lao dutupa yango-lapo leami. 11  +Dokopa dutupame baa tipa pyoo, “Mosesanya loo mana nyepae dupame aipuma Ilaija wambao ipupengena lengemape?” leami. 12 Dopa leaminopa baame dutupanya pii yanu pyakamaiyoo, “Kiningi, Ilaija wambao ipupenge. Ipupala baame dupa pitaka tolaseta. Dopa pitana, aipuma Akalinya Ikiningi doko maka kaeyapala, tanda longo maitamina lao pepa pyapae silya? 13  Ilaija ipateana lao nambame nyakama langilyo. Pii pepa pyapae singili pyoo, baa ipupala kateamopa, endakali dupame masiaminoli pyoo baa tanda maiyamina” lea.
Wane Imambu Koo Paleta Mende Nisiamo Doko
14  +Disaipolo yangi dupa kateami dokonya Jisasa ipupala kandeamopa, endakali kambu andake mendeme disaipolo dupa katao kakopeaminopa, Mosesanya loo mana nyepae mendapu katapala, disaipolo dupa-pipa pii yanda pyoo kateami. 15 Endakali kambu pyao kateami dupa pitakame Jisasa kanju petala walu leami. Dopa petala dokaita alo pyao pupala baa mambo pyao lanyiami. 16 Dokopa Jisasame Mosesanya loo mana nyepae dupa tipa pyoo, “Nyakama aki mendenya pii longo lelyamipi?” lea. 17 Kambu dokonya katao endakali mendeme yanu pyao, “Mana Lenge, nambanya wane doko imambu koo mendeme muumaa jisingi. Tenge dokonya, emba katapi dakenya nambame baa laminao epo. 18 Imambu koo dokome baa minao lungu pilyamoli pyoo baa lombapae singi. Dopa pilyamopa, wane doko nenge-kaita kambapupaka mandyoo, nenge giti-gato lao, kingi mokopi tinokao tui lenge. Embanya disaipolo dupame imambu koo doko watao pyakamaina lao nambame lamaipupa, dupame kapa pao watao pyala naeyalaminona” lea. 19 Dopa leamopa Jisasame baanya pii yanu pyakamaiyoo, “Nyakama Gote tungi napingima dupa, namba nyakama-pipa katao pao gii andukupa yakinato? Nyakama nongo pilyamino doko andukupa tolataminopa lao nambame malisoo katao? Wane doko laminao asa ipupa” lea. 20 Dokopa wane doko laminao Jisasa katea dokonya epeaminopa, imambu koo dokome Jisasa kanju petala, wane doko walumane minao isa yuunya lombanya seteamopa, kapilya mina-mina pyoo nenge-kaita kambapupaka mandea. 21 Dokopa Jisasame takange doko tipa pyoo, “Wane dake gii andukupa tee pyao dopa piape?” lea. Dopa leamopa baame yanu pyao, “Koosa tee pyao dopa pia. 22 Paa longosa imambu koo dokome baa soo itatenya yangata, endakinya soo pyandata pyoo kumasalanya pingina, embame dopale mende kapa pao piti-tamo doko, nalimba kondo kaeyao nisepoko” lea. 23 Dopa leamopa Jisasame baa lamaiyoo, “Embame kapa pao Gote tungi pyate-tamo doko, nambame nyakamba nisotoo. Gote tungi pingi endakali dokome kalai dupa pitaka kapa pao pingina” lea. 24 Dopa lalu piamopa, wane dokonya takange dokome puu lao ee lao, “Kamongo, nambame Gote tungi pilyona, nambanya Gote tungi napingi mana doko yakinatoo nisepe” lea. 25 Dokopa endakali kambu mende yapa ipao Jisasa katao kakopeamino kandatala, baame imambu koo doko pyalanya lao, “Emba muumaa kaleketa jisingi imambu koo dokome wane dake yakinatala puu lelyona, emba baa-kisa dee naipupi” lea. 26 Dopa leamopa imambu koo dokome puu lao ae latala, wane doko minao etete walu lasetala, baa yakinatala pea. Dokopa wane doko kumapae joo siamopa, endakali longome lao pituu, “Baa kumatelyamona” leami. 27 Dokopa Jisasame wane dokonya kinginya minatala toeya katasiamopa, wane doko sakatao toeya katea. 28 Dopa peteamopa, Jisasapi, baanya disaipolopi, dupa andaka peami. Dokopa baanya disaipolo dupame elyakalao baa tipa pyoo, “Aipuma naimame imambu koo doko kapa pao watao pyala naeyalamape?” leami. 29 Dopa leaminopa baame dokaita lamaiyoo, “Loma soo nee nanao katenge mana dokonya-kaita iki imambu koo dopale dupa watao pingina” lea.
Jisasame Baa Kumatapa Sakatatapa Dolaponya Lapo Pyoo Leamo Doko
30  +Jisasa disaipolo dupa-pipa yuu doko yakinatala Galali-kaita peami. Peami doko endakali mendeme nakandena lao Jisasame masia. 31 Tenge doko, Jisasame baanya disaipolo dupa mana lamaiyanya dopa lao masia. Baame lao pituu, “Akalinya Ikiningi doko akali dupanya kinginya maiyanya pilyamo. Maitatamopa dupame baa pyao kumasetami. Kumasetataminopa baa yuu gii tepo dokonya malunya sakatatana” lea. 32 Pii dokonya tenge doko disaipolo dupame nyala naeyapala, Jisasa tipa pyaanya paka kaeyami.
Alyasale Joo Katenge Dokonya Leamo Doko
33  +Jisasa Kapename pupala andaka pituu, baanya disaipolo dupa tipa pyoo, “Nyakamame kaitinisa aki mendenya lao, lao ipamipi?” lea. 34  +Dopa leamopa, dokaitame nyakamanya api alyasale joo kalyape lao, nyakama-lapo kaitinisa pii yanda pyoo epeami dokonya ema napiami. 35  +Dokopa Jisasa isa pitipala, 12 disaipolo dutupa tengesale epena latala lamaiyoo, “Endakali mende enomba nyoo katapuli lao masetamo doko, baa maita-kaita katapala, endakali pitakanya kalai akali katapengena” lea. 36 Dopa latala baame wane koo mende lanyepala, dutupanya kainanya katasia. Dopa petala baame wane doko kopinyetala dutupa lamaiyoo, 37  +“Endakali mendeme nambanya kenge dokonya wane koo dapale mende auu kaeyao lanyilya dokome, namba lanyilyamosaka pingi. Endakali mendeme namba auu kaeyao lanyilya dokome namba iki lanyala naenge. Namba puu lea Akali doko lanyilyamosaka pingina” lea.
Nyakama Yanda Pingyala Naenge Endakali Dokome Nyakama Nisingina Leamo Doko
38  +Joneme Jisasa lamaiyoo, “Mana Lenge, embanya kenge dokonya akali naima-pipa napaenge mendeme imambu koo dupa watao pyamupa naimame kandatala, baa naima-pipa napaenge dokonyana kaena lamuana” lea. 39 Dopa leamopa Jisasame baa lamaiyoo, “Nyakamame baa kaena nalalapape. Endakali mendeme nambanya kengenya kalai kyeto mende pita dokome, namba lao yapa pii koo nalata. 40  +Nyakama yanda pingyala naenge endakali dokome nyakama nisingi. 41  +Nyakama Kraisa tata-lamona latala, endakali mendeme nambanya kengenya kapo mendenya endaki kamuu nyakama dita dokonya yole doko alu napyoo, sulu setana lao nambame nyakama kiningi langilyona” lea.
Koo Pina Lao Mapusingi Dokonya Leamo Doko
42  +“Namba tungi pingima wane koo dupanya mende endakali mendeme koo pina lao mapusetamo doko, wita dii indyepenge kana yale mende baanya mangenya kende katatala, solowata lumu mendasa soo pyandamili doko yaka jipyali. 43  +Embanya kingi mendeme emba koo pyaale lao mapusia-kandeno doko, kepanya nepape. Emba kingi tundu katao, lete katenge dokonya kolandateno doko auu pita. Emba kingi lapota katao, itate konjala naenge, ele panda koo dokonya pateno doko auu napita. 44  Ele panda koo dokonya, endakali dupanya yonge dupa nenge nene dupa kumala naenge. Itate tenge doko konjala naengeaka. 45  Embanya moko mendeme emba koo pyaale lao mapusia-kandeno doko, kepanya nepape. Emba moko tundu katao, lete katenge dokonya kolandateno doko auu pita. Emba moko lapota katao, itate konjala naenge, ele panda koo dokonya soo pyandatamo doko auu napita. 46  Ele panda koo dokonya, endakali dupanya yonge dupa nenge nene dupa kumala naenge. Itate tenge doko konjala naengeaka. 47  +Embanya lenge mendeme emba koo pyaale lao mapusia-kandeno doko, lukunya nepape. Emba lenge mendai iki tao, Gotenya kingdom dokonya kolandateno doko auu pita. Emba lenge lapota tao, itate tao katenge, ele panda koo dokonya soo pyandatamo doko auu napita. 48  +Ele panda koo dokonya, endakali dupanya yonge dupa nenge nene dupa kumala naenge. Itate tenge doko konjala naengeaka. 49  Soleme opaa dupa kuni nasina lao pyoo wasingili pyoo, itateme endakali dupa pitaka pyoo waseta. 50  +Sole doko epe. Dopaka doko, sole dokonya tende patamo doko, nyakamame aipa petala dee tende pisetami? Nyakama sole katatae joo katao, nyakama-lapo mona setao kalyepape” lea.
+ 9:2 Matyu 17:1-8; Luku 9:28-36; 2 Pita 1:17-18 + 9:7 Matyu 3:17; Make 1:11; Luku 3:22 + 9:11 Mal 4:5; Matyu 11:14 + 9:14 Matyu 17:14-21; Luku 9:37-43a + 9:30 Matyu 17:22-23; Luku 9:43b-45 + 9:33 Matyu 18:1-5; Luku 9:46-48 + 9:34 Luku 22:24 + 9:35 Matyu 20:26-27; 23:11; Make 10:43-44; Luku 22:26 + 9:37 Matyu 10:40; Luku 10:16; Jone 13:20 + 9:38 Luku 9:49-50 + 9:40 Matyu 12:30; Luku 11:23 + 9:41 Matyu 10:42 + 9:42 Matyu 18:6-9; Luku 17:1-2 + 9:43 Matyu 5:30 + 9:47 Matyu 5:29 + 9:48 Ais 66:24 + 9:50 Matyu 5:13; Luku 14:34-35