16
1 Jisasame lao pituu, “Nyakama isa pyakala naeyalapale lao nambame pii dutupa langilyo.
2-3 Endakali dupame nambapa, nambanya Takangepa, nalimba nakandengema dokonyana, dokaitame lotuu anda dupanya nyakama watao pyatami. Yangimi nyakama pyao kumasetala, Gote kundi maiyoo kalai epe mende pilyamanona lao masetami. Dopa pitami gii doko ene epelyamo.
4 Tee pyao namba nyakama-pipa kateamano dokonya, pii langilyo datupa nambame nyakama langya naeyo. Dopaka doko, angi pita gii dokopa, dopa leana lao nyakamame masetaminopa lao indupa nambame nyakama pii datupa langilyona” lea.
Oli Spiritanya Kalai Dokonya Leamo Doko
5 “Namba puu lea Akali doko katenge dokonya indupa namba pelyona lapupa, nyakamanya mendaipi mendeme, ‘Emba anja pelyepe?’ lao tipa napilyamino.
6 Namba pelyona lao nyakama langilyo dokonya, nyakama etete mona kenda kaelyamino.
7 Dopaka doko, nambame nyakama kiningi langilyo: Nambame nyakama yakinatala pelyo dokome nyakama nisepae nyalapale lao pelyo. Namba napupuli doko, nisepenge Spirita doko nyakama-kisa naipupyali. Dopaka doko, namba pupala, nisepenge Spirita doko epena lato.
8-9 Yuunya endakali dupame namba tungi napilyamino dokonya, mana koopi, mana tolataepi, Goteme endakali dupa yapapengepi, dupa dopalena lao lelyamino doko kopeta lelyaminona lao Spirita doko ipupala lao panata.
10 Nambanya Takange doko katenge dokonya patopa, nyakamame namba kanja naeyalamino dokonya, namba akali tolataena lao Spirita dokome lao panata.
11 Isa yuu dakenya isingi Satane doko Goteme yapatala tenge setapeana lao Spirita dokome lao panataka.
12 “Nambame nyakama pii longo mendapu langipengeaka doko, nyakamame indupa kapa pao soo nyala naeyalamino.
13 Dopaka doko, Spirita kiningi pii lenge doko ipupala, kiningi pii dupa pitaka masalapale lao nyakamanya masingi doko tii piseta. Baame nyakama pii langita dupa baa tangeme masoo langya naeyata. Pii baame setapi, tanga pitapi, dupanya nyakama langita.
14 Spirita dokome namba-kisa pii nyepala panao nyakama langita. Dopa pita dokome namba kenge andake dita.
15 Takange dokonya singi dupa pitaka nambanya. Tenge dokonya nambame dapa lelyo: Spirita dokome namba-kisa pii nyepala nyakama panao langitana” lea.
Mona Kenda Kaengema Dupa Mona Yaepatamina Leamo Doko
16 “Takange doko katenge dokonya namba pelyo. Tenge dokonya, gii kuki mendatupa patatamopa, nyakamame namba kanja naeyalamino. Gii kuki mendatupaka patatamopa, nyakamame namba kandatamina” lea.
17 Dopa leamosa baanya disaipolo dupanya mendapuame nyakama-lapo laloo pyoo, “ ‘Gii kuki mendatupa patatamopa, nyakamame namba kanja naeyalamino. Gii kuki mendatupaka patatamopa, nyakamame namba kandatamina’ lelyamo dokopa, baa ‘Takange katenge dokonya pelyona’ lelyamo dokopa, dolapo baame aipa pyoo lelyape?” leami.
18 Dopa latala dee nyakama-lapo tipa pyoo, “ ‘Gii kuki mendatupana’ lelyamo doko, baame aipa pyoo lelyape lao naimame tenge doko soo nanyilyamanona” leami.
19 Dokopa Jisasame baa tipa pimana lao masiami doko kandatala dokaita lamaiyoo, “ ‘Gii kuki mendatupa patatamopa, nyakamame namba kanja naeyalamino. Gii kuki mendatupaka patatamopa, nyakamame namba kandatamina’ lelyo dokonya nambame aipa pyoo lelyape lao nyakama-lapo tipa pilyamipi?
20 Nambame nyakama etete kiningi langilyo: Isa yuu dakenya endakali dupa eteke pyao mona yaepao katataminopa, nyakama yamataka lao ee lao katatami. Nyakama mona kenda kaeyao katatamiaka doko, tanga nyakama mona yaepao katatami.
21 Enda mende wane manjanya maita pilyamopa, baa tanda andake nenge. Dopa pingiaka doko, baame wane doko isa yuu dakenya mandinya setapala eteke pilya dokome, baa tanda nelya doko kame singi.
22 Dopaleaka joo, indupa nyakama mona kenda kaeyao kalyamino. Dopaka doko, nambame nyakama dee kandatopa, nyakama eteke pyatami. Dopa pitaminopa, endakali mendeme nyakamanya eteke pingi doko nyokonyala naeyata.
23 Gii dokopa nyakamame namba-kisa dopale mende tee laa naeyatami. Takange doko-kisa nambanya kengenya dopale mende nyakamame tee lataminopa baame nyakama ditana lao nambame nyakama etete kiningi langilyo.
24 Wamba pituu indupa tuu lao, nyakamame nambanya kenge dokonya dopale mende Takange doko-kisa tee laa naeyami. Dopana, indupa nyakamame tee lataminopa nyetamina, tee lapape. Tee lataminopa, nyakama etete eteke pyao katataminopa lao baame ditana” lea.
Isa Yuu Dakenya Pupu Lapae Doko Ita Minatelyona Leamo Doko
25 “Wamba nambame nyakama pii langio dupa pitaka kongaliaka lao langio. Dopaka doko, gii mende ene epelyamo dokonya nambame kongaliaka lao langya naeyato. Takange dokonya lao tolao nyakama langito.
26 Gii dokopa nyakamame dopale mende Takange doko-kisa tee lataminopa, nambame nyakamanya kambu alo pyoo Takange doko lamaiyakatopa lao nalelyo. Nyakamame nambanya kenge dokonya baa-kisa tee lataminopa lao lelyo.
27 Namba Gote-kisa katao epea-lamo lao nyakamame masetala auu kaelyamino dokonya, Takange dokome nyakama auwaka kaelyamo.
28 Namba Takange-kisa katao isa yuu dakenya epeo. Indupa isa yuu dake yakinatala Takange katenge dokonya patoana” Jisasame lea.
29 Dokopa baanya disaipolo dupame baa lamaiyoo, “Indupa embame kongali lao nalenya, tolao pii lelyeno.
30 Embame dupa pitaka kandenge dokonya, endakali mendeme emba tipa pyaa naelyamopa, embame wambao baanya tipa pipenge dupa kandenge. Tenge dokonya, kiningi emba Gote-kisa katao epea-lamo lao indupa naimame masilyamanona” leami.
31 Dokopa Jisasame dokaita lamaiyoo, “Indupa nyakamame dopa lao masilyamipi?
32 Salapape! Nyakama mendai-mendai lao nyakamanya andaka dupanya pupale lao, pyao tale pisalamino gii doko indupa ipatelyamo. Nyakamame namba iki kalyale lao yakinatala paka paaminoaka doko, namba iki nakalyapo. Nambanya Takangepa tole kalyambano.
33 Nyakama mona yaepao katataminopa lao nambame pii dutupa langilyo. Nyakama isa yuu dakenya katataminopa nyakama-kisa kenda dupa ipataka doko, nambame isa yuu dakenya pupu lapae doko ita minatelyona, nyakama mona kenda nakaeyalapape” lea.