27
Animarã babue diabada
1 Idjab̶a animarã babue diabada acacia bacurud̶eda od̶adua. Dji drasoara bicaca juesuma b̶aida b̶ʌa. Dji joub̶ʌa sid̶a bicaca juesuma b̶aida b̶ʌa quĩrã quĩmãrẽena ab̶arica b̶amãrẽã. Dji ʌ̃tʌara bicaca ũbea b̶aida b̶ʌa.
2 Ab̶ari bacurud̶e iquid̶aza cachu quĩrãca od̶aped̶a maʌ̃ animarã babue diabadara bronceba jũma bʌrad̶adua.
3 Idjab̶a tʌbʌ pora ãyã cuabadada, tʌbʌ pora tãĩbadada, oa piabadada, warebada mĩãsuda, tʌbʌdau edebada sid̶a jũma bronced̶eda od̶adua.
4-5 Idjab̶a jʌrrʌjʌrrʌa bronced̶eda od̶adua. Maʌ̃ jʌrrʌjʌrrʌara animarã babue diabadad̶e dji id̶eba ed̶aa ẽsidra cara b̶ʌd̶adua. Maʌ̃be pĩrũ omoa bronced̶eda quĩmãrẽ od̶aped̶a jʌrrʌjʌrrʌa b̶ʌmaa animarã babue diabada iquid̶aza cara b̶ʌd̶adua.
6-7 Maʌ̃be acacia bacuruda umé erad̶aped̶a bronceba bʌrad̶adua. Maʌ̃ bacurura animarã babue diabada orroza pĩrũ b̶ead̶e berajud̶adua jira eded̶i carea.
8 Animarã babue diabadara wãyã uria b̶aya bacuru ʌrrad̶ad̶eda od̶i bẽrã. Ara mʌ̃a naʌ̃ eyad̶e unubid̶a quĩrãca jũma daucha od̶adua.
Ãcõrẽ wua de aud̶u jũrã b̶ʌd̶a
9-11 Mʌ̃ wua dera aud̶u jũrã b̶ʌd̶adua dji biara b̶ʌ lino wuaba. Maʌ̃ aud̶u jũrã b̶ʌ orroza veinte bronce od̶a uria b̶eada b̶ʌd̶aped̶a bacuru tẽnara maʌ̃gʌd̶e ed̶a wẽãju nũmʌnadua. Maʌ̃ bacuru quẽbʌra parataba bʌrad̶adua idjab̶a wua jũẽbari parata od̶a sid̶a cara b̶ʌd̶adua. Lino wuara maʌ̃ne eatʌ jũẽcuad̶adua. Mʌ̃ wua de aud̶u jũrã b̶ʌ drasoara cien bicaca b̶aya.
12 Jẽdaare bid̶a bronce od̶a uria b̶eada die b̶ʌd̶aped̶a maʌ̃ne bacuru tẽnara ed̶a wẽãju nũmʌnadua. Lino wuara maʌ̃gʌd̶e eatʌ jũẽcuad̶adua. Mʌ̃ wua de aud̶u jũrã b̶ʌ jẽdaarebemara cincuenta bicaca b̶aya idjab̶a ʌ̃mãdau b̶aebariare b̶aida b̶ʌa.
13 Dji nocoarebemara ʌ̃mãdau odjabariare b̶aida b̶ʌa. Maʌ̃ sid̶a cincuenta bicaca b̶aya.
14-15 Maʌ̃ne dji ed̶a wãbadara ẽsidra b̶aya. Dji ed̶a wãbada jʌwa acʌare bronce od̶a uria b̶eada ũbea b̶ʌd̶aped̶a bacuru tẽnara maʌ̃ne ed̶a wẽãju nũmʌnadua. Jʌwa araare bid̶a ab̶ari quĩrãca od̶adua. Maʌ̃ne lino wuara eatʌ jũẽcuad̶adua. Dji ed̶a wãbada orro ab̶aare wuara quince bicaca b̶aya idjab̶a dewarabema orroare bid̶a quince bicaca b̶aya.
16 Mʌ̃ wua de aud̶u jũrã b̶ʌd̶e ed̶a wãbadara veinte bicaca b̶aya. Bronce od̶a uria b̶eada quĩmãrẽ dji ed̶a wãbadama b̶ʌd̶aped̶a bacuru tẽnara wẽãju nũmʌnadua. Maʌ̃be dji biara b̶ʌ lino wuada edad̶aped̶a maʌ̃ wuad̶e ed̶a oveja cara nayãna pãwãrã od̶ada, pursupursua od̶ada, purea od̶a sid̶a cad̶adua. Maʌ̃ wuaba dji ed̶a wãbadara jũãtrʌ b̶ʌd̶adua.
17-18 Jũma mʌ̃ wua de aud̶u jũrã b̶ʌ bacuru tẽnara bronce od̶a uria b̶ead̶e ed̶a wẽãju nũmeania. Bacuru quẽbʌza parata od̶a wua jũẽbarida erob̶ead̶ia idjab̶a parataba bʌrá b̶ead̶ia. Maʌ̃ bacurud̶e eatʌ jũẽ b̶ʌ lino wua joub̶ʌara bicaca juesuma b̶aya. Mʌ̃ wua de aud̶u jũrã b̶ʌ ẽjũã drasoara cien bicaca b̶aya. Dji jed̶eara cincuenta bicaca b̶aya.
19 Jũma mʌ̃ wua de dajadaarebema sid̶a bronce od̶a baya. Dji egorod̶e cachid̶i careabema sid̶a bronce od̶a baya.
Olivo draga ĩbĩrã coad̶i careabema
20 Israelerãa jaradua olivo draga idji awa quiruda enenamãrẽã. Maʌ̃ dragara ĩbĩrãne wead̶ia urua b̶amãrẽã.
21 Aaroʌ̃ba idji warrarã bid̶a mʌ̃ wua ded̶e b̶ʌ ĩbĩrãra quewaraza coad̶ida panʌa mʌ̃ quĩrãpita urua b̶amãrẽã quewara ed̶aʌba ab̶a ʌ̃nadrʌbʌrʌd̶aa. Maʌ̃ ĩbĩrãra mʌ̃ baurude quĩrãpe b̶aya dji wua eatʌ jira b̶ʌ nocoare. Mʌ̃a ĩbĩrã coabi b̶ʌ leyra bãrã israelerãba, bãrã warrarãneba yõbʌdarã bid̶a ewariza ĩjã o pananida panʌa.