15
Yinsa khwa zowera za mayaahuuti
1 Aphano khulankha Yeruzaleemu, Mafwarizeewu akina na anamanozela a kano khuta omuuzela Yinsa yoori:
2 “Mwaasa aya niini anakhiyoni awo akhijilelaka zowera za attunkhulu a tiini, oja ahinaweeni?”
3 Yinsa khuwaajipu araka: “Mwaasa aya niini mweeyo mwikhijilelaka kano za Nluku, mwaasa wa zowera zenu?
4 Maana Nluku alupa yoori: ‘Onshitahi papaawo na mamaawo’ na ‘antakhaaye onlaani papaawe na mamaawe ona ya ohukhumweliwa ofwa.’
5 Ila mweeyo mwinkhupalela yoori amana ntthu amuuza papaawe ama mamaawe yoori: ‘Wakhula etthu kiniwinkhaanini miiyo zaakha ya omwinkha Nluku;
6 ye khankhanyareliwa theenya onshitahi papaawe khwa nanna nkhama eto.’ Khwa etthiipo, mwaasa wa zowera zenu, mweeyo mwimpeepheyisa nttakhuzi la Nluku.
7 Manaafikhi! Ezaaya ahupiri saaneene monkoni wa mweeyo araka:
8 ‘Atthu apa anikaaputu na milomo,
ila rooho zaya ziri peetiwene khwa miiyo.
9 Mweeyo mwinikaaputu mahala,
mwisomisaka zowera za anaatamu.’ ”
Yinsa onttakhula monkoni wa Otwahareshiwa
10 Yinsa khuwaakhuwela atthu apale khuwooza yoori: “Mwisiile na eweeleyeni.
11 Khahiyo etile entthiwaaye nkhanyo eninharamushaaye ntthu; ila etile enlankhaaye nkhanyo ti eninharamushaaye.”
12 Aphano anakhiyoni awe khulawa khumwaattama khumuuzela yoori: “Wajuwa yoori mafwarizeewu noosiila hapari epile eephiriwa?”
13 Yinsa khuwaajipu yoori: “Miitthi zooshi zihizaliweeni ti Paapa wa pinkuuni zinttela okhuliwa na mitathaari zaya.
14 Mwiwaalikhe, maana yo khanoona na aniweettettisa ananhooni. Amana ntthu woohooni amweettettisa nahooni nzaawe ooshi antta okwela nliphotto.”
15 Aphano Pheeturu khunvekela Yinsa yoori: “Onuuze maana a nlikaniso opo.”
16 Yinsa khuwaajipu yoori: “Kiri na mweeyo nalelo khiniweeleyani?
17 Yoori zooshi zintthiwaaye nkhanyo zineetta mwiijohojoho na khunyiwa?
18 Ila vitthu zinlankhaaye nkhanyo zinlankha va rooho na piitthiipo eninharamushaaye pinaatamu.
19 Maana nroho ti zinlankhaamo shawuri zootakhala nkhama epi: wuula, oraruwa, oshawi akhapa, wiiya, olokova na ohankawaani.
20 Epo pi eninharamushaaye ntthu. Ila oja ohinaweeni khininharamusha ntthu.”
Muukha wa Kanaani onthonyeza amini yawe
21 Paata ya Yinsa olaavo aphale vaya, khusala alawa nti wa Tiiro na Sitooni.
22 Muukha wa Kanaani aari wiikhalaaye nti otthuupule, khuta okutthanana Yinsa eettaka okhuwa yoori: “Mbwana, Mwaana wa Daawuuda, koonele huruma! Mwanaka etta wiiyana masheethwani na ontta ohoowa channu.”
23 Ila Ye khuhinjipu hatha nttakhuzi, anakhiyoni awe khulupa yoori: “Omuuze alawe, ontta onyakula nyuma wetthu.”
24 Yinsa khujipu yoori: “Miiyo kaperekhiwa paasi khwa pwittipwitthi epile zawaashikha za Ezirayiilu.”
25 Muukha otule khuta khukokhora na khuri: “Mbwana, okaawuni!”
26 Aphano Yinsa ajipwaka khuri: “Khahiyo yooshapweya othuula phaawu ya aana khuwenkha aana aanapwa.”
27 Muukha otule khujipu yoori: “Khweele Mbwana, ila na aana aanapwa anja tathela zinkwaaye vameeza wa mweenyewe.”
28 Aphano Yinsa khumuuza yoori: “Oo muukha, amini yawo khuluyeene! Ti erettikhane etile ontakhaaye.” Na wakathi otthuupule mwanawe khwiiya woovona.
Yinsa onrutela pahari ya Kalileya na oniwaavonisa alwele.
29 Yinsa khulaawo okhule waya khulawa mpakha nshini wa pahari ya Kalileya. Khuwela va mwaako khwiikhala attaapho.
30 Khusala ata atthu awaatta, awaatanaka anamarakala, ananhooni, anamakhumuwa, ananhittakhuli na akinoko aya, khuwaalikha nshini wa Yinsa, ye khuwaavonisa.
31 Atthu khwiiya ooshanka wakathi awooniyeevo ananhittakhuli eettaka ottakhula, anamarakala ari oovona, anamakhumuwa eettaka weettetta na ananhooni eettaka woona. Yo khunsifu Nluku wa Ezirayiilu.
Yinsa onjisa khuntti kiina
32 Yinsa khuwaakhuwela anakhiyoni awe na khuwooza yoori: “Kinaaye tthakaraka na atthu apa; zavira siikhu ttatthu ari vamote na miiyo na khana hatha etthu-yoojiwa. Akintakha owaalikha olawa na jala zaya, maana kinoona yoori antta ozileya ntarikhi.”
33 Anakhiyoni awe khujipu yoori: “Ninttela opattha vayi phaawu zoofiyela, atthu apa waatta na mphu n'yaara?”
34 Ye khuwoozela yoori: “Mwina phaawu kavi?” Yo khujipu yoori: “Sapa, na mattaatta vattitthiiru.”
35 Yinsa khuruma yoori atthu apale eekhale.
36 Khuthuula phaawu epile sapa na swi khushukhurwela khumeya khuwenkha anakhiyoni awe, khusala awaawanyeza atthu.
37 Ooshi khuja khurupala. Anakhiyoni apale khukusanya khelenke sapa za pattaasu zasaliyeeyo.
38 Atthu aajiyeeyo aari alufu nne, ohiwaalaki aakha na asimaana.
39 Paata ya oleezanana atthu apale, Yinsa khupakhira mmwaatiya khulokhela nti wa Makata.