21
Zaakha ya muukha woofweliwa ti mannawe
1 Yinsa khuwoona mathaajiri alazaka zaakha zaya atthaaka n'yopo ya zaakha.
2 Khumoona theenya nunu mmote wa masikhini woofweliwa ti mannawe, alazaka zaakha ttoosu piiri.
3 Yinsa khulupa yoori: “Kiniwuuzani khweele yoori nunu otu wa masikhini woofweliwa ti mannawe, enkha zayita atthu ooshi.
4 Maana apale ooshi na othaajiri aya enkha tathela na khusalana, ila nunu otu na osikhini awe enkha wooshi aari ororomelaaye.”
Yinsa onlupa monkoni wa woopwechiwa Nyuupa ya Nnyizinku
5 Anakhiyoni awe akina khusala attottopela Nyuupa ya Nnyizinku yaajekaniweeyo mawe ooshapweya na vitthu zaatthiiweemo zoolaziwa nkhama zaakha, Yinsa khuwooza yoori:
6 “Enlawa zafiye siikhu vitthu zaya epo mwinoonaazo zinttelaavo opwecheliwa, maana khalinlawa olikhiwa liwe vatulu wa liwe nzaaya.”
Olupatthiwa na ohoowa
7 Yo khumuuzela yoori: “Mwanliimu, vitthu zaya epo zinteela orettikhana lini? Wala alama-ni enttelaaye onijuwisa yoori zasaleela orettikhana?”
8 Yinsa khuwaajipu yoori: “Phoole! Mwihihatiwe, maana anlawa apuwe atthu a waatta araka, ‘Al-Masiihu ti miyo!’ ama ‘Wakathi wafiya!’ Ila mwihiwaalotte apo aya.
9 Amana mwisiilaka viittha ama nzuuzu mwihoove, maana epo zaya zina yoorettikhana khapula, ila wakathi aya opo khahiyo wiisha w'oolumwenku.”
10 Yinsa khulupa theenya yoori: “Khapila moote enlawa yoomanane na khapila kiina, na ofwalume woomanane ofwalume nzaaya.
11 Phantte za waatta za miti zinlawa zapuwe visikinyaatthi khulu-khulu, jala, marati, vitthu zootikinisa na theenya alama khulu-khulu zoolankha pinkuuni.
12 Khapula zihinarettikhane vitthu zaya epo, mwinlawa mwalupatthiwe, mwilawaniwe mmakhono wa afwalume na mahaakhimu, mwiphukiwe nnyupa woosifwiwamo Nnyizinku, mwifukeliwe mwaasa wookilotta miiyo.
13 Enttela orettikhana yoori wiiye oshaahiti enu.
14 Mwiiye awiitthaaza rooho zenu, mwihishukulikhele etthu mwinttelaaye ojipu mmana ofiya wakathi aya opo.
15 Maana miiyo kinlawa kawinkheni mattakhuzi na ojuwa nanna yoowaajipu maatuwi enu, ahinttelaaye owahi ozukulisa wala okheeti.
16 Mwinlawa mwafukisiwe wa afwalume pi apapazenu, attwiizenu, ajamaazenu na ashirikha enu, akinoko a mweeyo anlawa ooliiwe.
17 Atthu awaatta anttela wiiya awiiphiiriwa ti mweyo mwaasa wa nzina laka.
18 Ila hatha nyuuli yenu moote khinlawa waashikha.
19 Mwiiye woovilela, toowo mwintta wuusurukha.”
Yinsa onrutela olupa opwechiwa Yeruzaleemu.
20 Yinsa khulupa theenya yoori: “Amana moona sitati ya Yeruzaleemu ezukuleliwe pi anajanka, mwijuwe yoori wafiya wakathi woopwechiwa.
21 Aphano apale anttelaaye wiiya nti wa Yudeya atthirele omwaako, apale anttelaaye wiiya nsitati atthiremo na apale anttelaaye wiiya ntthuttu ahirutele ositati.
22 Maana siikhu zaya epo enttela wiiya siikhu za hukhumu khuluyeene yoori erettikhane zooshi epile zaatikhiweezo nkatthi wa nttakhuzi la Nnyizinku.
23 Atakhaliwa muukha otule anttelaaye osikaniwa ari wa wiimittha ama eettaka waamwisa siikhu zaya epo, maana vatuniya anlawa apuwevo mashakha mawulweene na hukhumu vakatthi wa anaatamu ooshi.
24 Awaatta anttela wuuliiwa na phanka, akinoko athuuliwe nkhama anapherezu eettettisiwaka miti zooshi z'oolumwenku. Yeruzaleemu enlawa yakurumuliwe pi amalapo mpakha yenzi ya amalapo wiisha.”
Ota wa Mwaana wa Pinaatamu
25 Yinsa khuvira awoozaka theenya yoori: “Zinlawa zeeyevo alama vanjuwa, vamweezi na vamatthottowa. Atthu a voolumwenku anteela wiiyana huzuni na woova nwulweene mwaasa woottitthima na otapanyeya wa pahari.
26 Anlawa azirikhe atthu a waatta mwaasa wa woova vitthu zinttelaaye orettikhana voolumwenku, maana owahi wa pinkuuni onttela osakhinyeya.
27 Aphano phi anttelaavo wooneya Mwaana wa Pinaatamu ataaka enakatthi-nakatthi ya mawiku na owahi na nuuru khuluyeene.
28 Mmana zaazaka vitthu zaya epo, mwilankhe mwiinuwe mweekese otulu, maana wuusurukha wenu ori kharipu na-mweyo.”
Nlikaniso wa mfikeera
29 Elottelanaka Yinsa khulupa nlikaniso mmote araka: “Moone mfikeera na miitthi zooshi.
30 Amana aazaka ophutuwela mathapa aya, mwinoona na mwinjuwa yoori wasaleela ofiya mwiita.
31 Wa nanna etthiipo, amana moona zirettikhanaka vitthu epo, mwijuwe yoori Ofwalume wa Nnyizinku wasaleela ofiya.
32 Miiyo kiniwuuzani khweele yoori atthu apa aleelo khanlawa ofwa ooshi vitthu epi zihirettikhaneeni.
33 Pinku na vathi zooshi zinteela ovira, ila mattakhuzi aka khanviraru.”
Owahi woojeekesela
34 Yinsa khulupa yoori: “Mwiiye woojeekesela yoori rooho zenu zihipakhire vitthu zoohifwayi, ohapaliwa, ama tafwawuthi za muuhaayi mwenu, yoori siikhu yaya ethiito ehuusikaneleni.
35 Maana siikhu yaya eto enttela owaatela atthu ooshi a voolumwenku nkhama nraakho.
36 Mwiiye woojeekesela na olompa wakhula wakathi, yoori zuuwerawereni vitthu zaya epo zinttelaaye orettikhana na yoori mwapatthe weemela omaasho wa Mwaana wa Pinaatamu amana ata.”
37 Yinsa wakhula siikhu aari onozela vaje wa Nyuupa ya Nnyizinku, mmana oripa aari weettaka vamwaako Oluveera khwiiya ottuukho mpakha ocha.
38 Atthu ooshi supuyeene aari weettaka vaje wa Nyuupa ya Nnyizinku olawa osiila vitthu aari onozelaazo Yinsa.