Yuunusa
1
Yuunusa onintthira Nnyizinku
Siikhu moote Nnyizinku anrumiye Yuunusa mwaana wa Amitayi yoori: “Olankhe olawe sitati khuulu ya Neniive, walaleye ottuukhu, yoori miiyo kinjuwa zooshi zootakhala zaya anrettaazo.”
Ila Yuunusa asiiliyeevo toole, khuwaza otthirela tuniya yoolepelana Neniive, antthiraka Nnyizinku. Khulawa mpakha sitati ya Yoope khusikana pankaya vapatari, yaari weettaaye Taarisi. Khuripha pasaji yawe, khweetta mpankaya yoori atthirele Taarisi, antthiraka Nnyizinku.
Aphano, alawaka, Nnyizinku khuperekha pheevo ya waatta na pahari khutakhala khusala esaleela opwecheya pankaya. Mamalinyero ooshi khwiiya awoova, wakhula mmote wayo khusala akhuwa anvekelaka nluku awe, yoori apatthe wuusurukha, na khusala atupweeza mapwattha aya mpahari, yoori eveyaveye pankaya yaya.
Wakathi aya opo Yuunusa, aarettiye eeshukheliye mpurawu eettaka olala ajisahawiye. Nahota khwiishukhela mpurawu mphule aari olalaamo Yuunusa, khumuuzela yoori: “Weeyo! Onlala-ni? Olankhe onvekele nluku awo! Khinjuweya anoonelaka huruma yoori anuusuru nihifwe.”
Paata ya toole, mamalinyero khusiilana yoori: “Nlaweni neekese nasipu, ninjuwe nlupa otu anitotheliye hasara eti.” Yo khweekesa nasipu etile, khusala emoona Yuunusa.
Khuuzeliwa Yuunusa: “Weeyo o nlupa onitotheliyeeyo hasara eti. Nkanuuze! Weeyo onkhola khazi-ni? Wala onlankha vayi? Nti awo nti-ni? Ama lihimo lawo lihimo-ni?”
Ye khujipu araka: “Miiyo ki Mwipereewu, kinimwaaputu Nnyizinku, Mwennyewe pinku, otu ompiye nti na pahari.”
10 Elottelanaka Yuunusa khuwooza yoori aari ontthira Nnyizinku. Wakathi ajuwaziyeevo etthu yaari onrettikhanelaaye, yo khwiiya ootepa woova, na khumuuzela Yuunusa: “Apho niini orettiyeeyo!”
11 Pheevo yeetta otepa yaattaka, khufiyelela mamalinyero omuuzela Yuunusa: “Yoori pheevo na pahari eshapweye, fweeyo nuurettele niini?”
12 Yuunusa khujipu araka: “Miiyo kajuwa yoori pheevo eti yapuwelela mwaasa wa miiyo. Apho, mwikitthempe mwikeeselele mpahari. Mwirettaru toowo, mwintta woona pahari na pheevo zinyamaliye.”
13 Ila mamalinyero apale khuhintupweezazi, khwaaza ofuttha reemu na kuvu zaya zooshi yoori afiye vathi. Khuhisala ewaheya, mwaasa yoori pahari yeetta ovira etepaka otakhala. 14 Yo khukhuwa ankhuwelaka Nnyizinku araka: “Oo, Nnyizinku, ohinilikhelele nifwaka mwaasa wa pinaatamu otu, na ohinikwisele paathuli ofwa wa mwinyi otu. Zooshi zarettikhana khwa nanna olakeliyeezo.” 15 Nawiisha khuntthempaza Yuunusa khumweeselela mpahari. Aphano pahari na pheevo, zooshi khunyamala. 16 Ooniyeevo toole, mamalinyero ooshi khwiiya awoova channu na khumwaaputu Nnyizinku. Khunrettelaza twaha na theenya ahiti.
17 Amweeselelaziyeevo mpahari, Nnyizinku khuperekha swi khuluyeene yoori emmize Yuunusa, ye khwiiya mmatthupo wa swi siikhu ttatthu nthana na osikhu.