35
Yaakhumpa oninjeka alitaari wa Nnyizinku Beetele
Nluku khumuuza Yaakhumpa yoori: “Olankhe olawe Beetele weekhale ottuukho, wanjekewo alitaari wa Nluku otu oopuweleliyeeyo wakathi waari ontthiraavo ttwiiyo Ezawu.”
Yaakhumpa khuwooza ajamaaze na atthu apale aariina yoori: “Mweeselele okho miluku zenu epo zoohifwayi mwiriinaazo, mwijitwaharishe mwiwale kuwo kiina. Nilankhe nilawe Beetele, ottuukho kinlawa kanjekewo alitaari woomwaaputuvo Nluku otu aakipuweleliyeeyo siikhu epile kaari mmashakha, otu aakilokoziyeeyo tarikhi zooshi kiviriyeezo.” Yo khumwinkha Yaakhumpa miluku zaya zooshi epile zoohifwayi aariinaazo, na pirinku epile aawaliyeeyo aakha ooshi, ye khuthuula khuthipela nshini wa muutthi nwulweene waari nti wa Shekemu. Wakathi yo alankhiyeevo alawaka, Nluku khuweeshushela woova atthu a sitati epile aattamananiyeezo, mphule aari oviraamo, yo khuhiweekarisi aana a Yaakhumpa.
Yaakhumpa khufiya na atthu awe ooshi nti wa Luuzu oniitthiwaaye Beetele, tuniya ya Kanaani. Khunjeka alitaari, puuro yaya etile khutthajavo nzina la Nluku wa Beetele mwaasa yoori Nluku aajithoonyeziye attaaphale wakathi opule Yaakhumpa aari ontthiraavo ttwiiye.
Deebora, yaaya wa Rapekha khufwa, khuzikhiwa kharipu ya Beetele nshini wa muutthi nwulweene oniittheliwaaye Alooni-Pakuuti*.
Yaakhumpa n'ooruti Paata-Araamu, ari Beetele, Nluku ampuweleliye swaafu yaphiiri khumparikhiya. 10 Khumuuza yoori: “Nzina lawo o Yaakhumpa ila waaza leelo walikha, aphano nzina lawo o Ezirayeele.” Ti nanna Nluku antthajiyeeyo nzina la Ezirayeele.
11 Nluku khumuuza theenya araka:
 
“Miiyo ki Nluku Woowahi Wooshi,
mwivokolelane na mwaattelane.
Khwa peewu yawo weeyo
enteela opuwa khapila
na khuntti ya khapila za waatta
na anlawa apuwevo afwalume.
12 Nti kimwinkhiyeeyo Eburahiima na Esiyaakha
kinteela owinkha weeyo na peewu yawo.”
 
13 Nawiisha ottakhulana Yaakhumpa, Nluku khulawa.
14 Yaakhumpa khweemesa nripu la mawe vahali attaaphale aattakhulaniyeevo Nluku. Khwiitthela viinyu nripu laya ntthile na khuvaaza mafuttha. 15 Ye khutthaja nzina la Beetele puuro yaya etile aari ottakhulanaavo Nluku.
Ovokoliwa wa Bejami na ofwa wa Rakeele
16 Yo khulankha Beetele, nalelo ahinafiye Efwarata Rakeele khwiiyana tafwawuthi khuluyeene ya woona olwaaza asaleelaka ompattha mwaana. 17 Oonaka olwaaza channu, mwaatani khumuuza yoori: “Ohoove! Weeyo wampattha mwaana nkina theenya wanlume.” 18 Ettaka oshakhi ahinattiye phuumu, khuntthaja nzina mwaana otule la Benooni, ila papaawe na-ye khuntthaja nzina la Bejami§.
19 Aphano Rakeele khufwa khulawa khuzikhiwa tarikhi ya Efwarata (yiiyiye Belemu). 20 Yaakhumpa khutthaavo alama ya nshuhuti vakhapuri ya Rakeele, mpakha leelo eti liwaapho.
21 Ezirayeele khulankha khuvikana korofwa ya Eeteri khulawa khweemesa heema zawe.
22 Siikhu moote, Ezirayeele eekhalaka nti otthuupule, mwanawe Ruubeni khulawa khulalana Biila, mwiitthwaana otule aari muukha nkina wa papaawe, ila hapari epile khumfiyela papantthu. Ezirayeele aarina aana khumi na awiri.
Aana a Yaakhumpa
23 Aana aavokoleliweeyo Liiya ti Yaakhumpa pi apa: wamwanzo ti Ruubeni, alottiwaka ti Simiyooni, Leevi, Yuuda, Esakhaari na Zabulooni.
24 Aana aavokoleliweeyo Rakeele: ti Yuusufu na Bejami.
25 Na-ye aana a Biila karumeya wa Rakeele pi apa: Daani na Nafitaali.
26 Aana a Ziilipa karumeya wa Liiya pi apa: Gaati na Asheeri.
Aari atthaapo aana a Yaakhumpa awaapatthiyeeyo nti wa Paata-Araamu.
27 Aphano Yaakhumpa khurutela wa papaawe nti wa Manre kharipu na Kiriyati-Aarapa wiiyiye Heporooni, ohali aari wiikhalaawo Eburahiima na Esiyaakha. 28 Esiyaakha eekhaliye nyaakha miiya na thamaaniini. 29 Afwa ari wa wuuluvala arina nyaakha za waatta, aanaawe Ezawu na Yaakhumpa khunzikha.
* 35:8 Alooni-Pakuuti maana aya muutthi zaakwisiweevo mishozi 35:17 mwaatani: pariteera 35:18 Benooni maana aya mwaana woopattikhana na tafwawuthi § 35:18 Bejami maana aya mwanaka wa nkhono-nlume.