14
Viittha ya afwalume na okholiwa wa Loothi
Wakathi aya opo Amirafeele aari mfwalume wa Shinaari, Ariyookho mfwalume wa Elazaari, Ketorilameeri mfwalume wa Elamu, na Titaali mfwalume wa Koyiimu, khulankhaza olawa wuumanana viittha Peera mfwalume wa Sotooma, Piirisha mfwalume wa Komoora, Shinaapu mfwalume wa Aatima, Shemeepere mfwalume wa Zeboyimu, na mfwalume wa sitati ya Peela, yaari wiitthiwaaye Zowaari. Afwalume apa athaanu khuwaakusanya anajanka aya nttapo la Siitimu (liiyiyeeyo ntthatta la maati majiphwaani). Mfwalume Ketorilameeri, aawaashinttiye afwalume apale athaanu khwa nyaakha khumi na miwiri, ila mwaakha wakhuumi na ttaatthu aya khunzukuluwelaza.
Mwaakha wakhuumi na nne Ketorilameeri khuta vamote na afwalume apale aaphakanyeyaniyeeyo, khuwaashintta Arefayi o'Ashiteroothi-Karinayimu, Azuuzimu o'Haamu, na Aheemi o'Shave-Kiriyatayimu. Theenya khuwaashintta Ahoori omwaako wa Seyiiri, khuwiikarisa mpakha Paraani ohali yaaziyeewo yaara. Arutaka khuviraza Kateeshi waari wiittheliwakaawo Emishipathi, khuwaattapwattha atthu ooshi a nti wa Amalekiita na theenya Amoori aari wiikhalaaye nti wa Hazaazoni-Tamara.
Aphano khulankha mfwalume wa Sotooma, mfwalume wa Komoora, mfwalume wa Atima, mfwalume wa Zeboyimu, na mfwalume wa sitati ya Peela (eti yaari wiitthiwaaye Zowaari), khulankha olawa wuumanisa viittha nttapo la Siitimu. Aari wuumanaza na Ketorilameeri mfwalume wa Elamu, Titaali mfwalume wa Koyiimu, Amirafeele mfwalume wa Shinaari, na Ariyookho mfwalume wa Elazaari. Aari afwalume athaanu aari wuumananaaye afwalume wane. 10 Nttapo la Siitimu laarina milipu za waatta za piriniisi. Wakathi aari otthiraavo afwalume a Sotooma na Komoora, anajanka aya eetta okwela mmilipu, apale akinoko aya khutthirela nnyaako. 11 Afwalume apale wane aashinttiyeeyo khuthuula maali zooshi za Sotooma na Komoora na vitthu-zooja zaya khulawaza. 12 Na theenya khunthuula Loothi, mwaana wa ttwiiye Eburamu na mali zawe zooshi, mwaasa aya ye aari wiikhala Sotooma.
Eburamu onimuusuru Loothi
13 Aarivo mwinyi mmote oosurukhiyeeyo, ye khulawa khumweeleza zooshi Eburamu Mwiibereewu, aari wiikhalaaye kharipu na miitthi miwulu-miwulu za Manre Mmori. Manre na attwiize, Sikhoole na Aneeri, aari atthu oosiilana na Eburamu. 14 Asiiliyeevo Eburamu oriwa ntuuluwe akholiwa, khuwaathuula alume miiya ttatthu na khumi na wanaane aawaakhupaliyeeyo, oovokoliwa vaje vawe, khusala aweekarisa afwalume apale wane mpakha nti wa Daani. 15 Ye khuwaawanya alume apale khuntti-khuntti, khuumanisa viittha osikhu mpakha owaashintta maatuwi aya, khuweekarisa mpakha nti wa Hoopa, phantte ya kashikhazini ya Tamaashiku. 16 Khuwaanyakanya maali zooshi aathuuliyeeyo, khunthuula Loothi ntuuluwe na mali zawe, vamote na aakha na atthu akinoko aakholiweeyo khuwaarutisa.
Melikiseetekhi onimparikhiya Eburamu
17 Wakathi Eburamu anshinttiyeevo mfwalume Ketorilameeri na afwalume aaphakanyeyaniyeeyo, mfwalume wa Sotooma khusala alawa ompokherela nttapo la muuttho Shaawe liniittheliwaaye “Nttapo la Mfwalume”. 18 Aarivo mfwalume wa nti wa Salemu, aari wiitthiwaaye Melikiseetekhi*. Khutiisa phaawu na viinyu. Ye aari haakhimu wa tiini ya Nluku Nwulu wa Pinkuuni, 19 khumparikhiya Eburamu araka:
 
“Aparikhiyiwe Eburamu
ti Nluku Nwulu wa Pinkuuni,
otu ompiye pinku na vathi.
20 Woottitthimisiwa eeye Nluku Nwulu wa Pinkuuni,
otu awinkhiyeeyo owaashintta
maatuwi awo.”
 
Aphano, Eburamu khulaza lifunku lakhuumi khwa zooshi epile aataniyeezo, khumwinkha Melikiseetekhi.
 
21 Mfwalume wa Sotooma khumuuza yoori: “Miiyo okinkhe atthu paasi. Maali zooshi osalane weeyo.”
22 Eburamu khunjipu mfwalume araka: “Kalansa makhono aka kinlanselaka Nnyizinku, Nluku Nwulu wa Pinkuuni ompiye pinku na vathi, 23 na kinlapha yoori akinsalana hatha etthu yaawo, wala luuzi wala nliiza wa jampali, ohiri nawiikhala, olupa yoori ‘Eburamu kanreelisa’. 24 Miiyo khina etthu moote kintakhaaye, yoohiiyi etile ajiiye atthu aka. Ila apale aaphakanyeyiyeeyo na-miyo, Aneeri, Sikhoole na Manre, apa ana ya wiiyana lifunku laya”.
* 14:18 Kwa luuka ya Meebereewu, nzina nttho lina maana a “mfwalume aka ti wa shariya”