8
Atubesi Ebangenahb Ba Feere Kehnge A Ejira
1 Atubesi abangenahb ba a, a ane ba abing ebo wob go awer nya ebangenahb ba mehle go Babilon jo feere kehnge aname ngare nyi ntula Ataseses jo fili edi:
2 Go ebangenahb ji Finehas, Gersom; go ebangenahb ji Itama, Daniel; go ebangenahb ji Devid, Hatusi,
3 ji lohng ebangenahb ji Sekanaya; go ebangenahb ji Parosi, Jakaraya, fvfo ane ba bo ko bo abing jolo aneblum atahl asehma, a aneblum awubu;
4 go ebangenahb ji Pahati Moab, Eliehoenayi mmona Jerahiya, a aneblum atahl awubu ba jolo a ne;
5 go ebangenahb ji Jatu, Sekaniya ji mmona Jahajiyel, a aneblum atahlku ba jolo a ne;
6 go ebangenahb ji Adin, Ebed mmona Jonatan, a aneblum atahl abal, aneblum awubu ba jolo a ne;
7 go ebangenahb ji Elam, Jesaya mmona Ataliya, a aneblum atahl ara, aneblum awubu ba jolo a ne;
8 go ebangenahb ji Safatiya, Jabadiya mmona Mayikel, a aneblum atahl ani ba jolo a ne;
9 go ebangenahb ji Joab, Obadiya mmona Jehiyel, a aneblum atahl awubu, a aneblum elku era ba jolo a ne;
10 go ebangenahb ji Bani, Selomiti mmona Josifiya, a aneblum atahl anehkeni ba jolo a ne;
11 go ebangenahb ji Bebayi, Jekaraya mmona Bebayi, a eltahl aneblum anehkeni ba jolo a ne;
12 go ebangenahb ji Ajigad, Johanan mmona Hakatan, a aneblum atahl alon, aneblum awubu ba jolo a ne;
13 go ebangenahb ji Adonikam, bo ji gohro ba, Elifeleti, Jewuyel, Semaya a aneblum atahl ara ba jolo a bo;
14 go ebangenahb ji Bikvayi, Utayi, a Jakur, aneblum atahl ara, aneblum awubu ba jolo a bo.
Ejira Yehke anebe Levi Ba bahke Jo lim Eltum Etahk Esowo
15 N kehm ba kono bo go efabalahb ji kpˈ fabe asongo go Ahava. E re ekv o nfung na era. N kehm jo feede go ellong ane a ellong abalimajom, nnea Levi awohng awohng o jolem.
16 Owo n kehm lungu Elieja, Ariyel, Semaya, Elnatan, Jarib, Elnatan, Natan, Jekaraya, a Mesulam bo ji jolo atubesi, a Joiarib abola Elnatan bo ji jolo anebe ngbere,
17 n fere tum bo tv Eddo, ntubesi no li go Kasifia. N tongo bo ji bo bahke song tong Eddo a akunu enye, a alokeltum go etahk Esowo ji li Kasifia, re bo ko abalimeltum ba ka-r ba bahke jo lim eltum go etahk Esowo ebahre.
18 Tib nnoobo ebo bi Esowo ebahre bi jolo anahre, bo ko Serebiya ba ka-r, á jolo etingi nne no fuumu no, á lohng go ebangenahb ji Mahli mmona Levi, ji mmona Isreel. Bo tob ko abon ba nlum ba Serebiya ba, a abonanyehn, bo kpee jolo elku aneblum ara;
19 a Hasabaya, a Jesaya ji lohng go ebangenahb ji Merari, a abonanyehn, a abon abonanyehn ba nlum, bo kpee jolo aneblum eltahl.
20 Bo tob ko alokeltum go etahk Esowo, aneblum atahl ewubu ajehng, ane ba Devid a ane ba atubesi ane ebe ma yehke, re bo jo kak anebe Levi ebo. Bo kpee bo nyono abing ebo kpee go awer.
Ejira Tv Ane Go Njal Abade a Ero Akake
21 O ebgba alahb bi Ahava, n tiingi bo re wahr jiin njal, eji e lꞌrede elnahre go esamahr Esowo ebahre. E kake ero bahb Esowo re á baab-r go mbang, a abon ebahre, a nsol kpee nyi e kpi no.
22 Jol-m ejum ndon re me m bahb ntul bade nsoja, a ane ba kpo fing ebvankang, bo ji bahk-r baabe go esamahr anebekv ebahre go mbang, tib eji e ma tohko tong ntul re, <<Nnoobo ebo bi Esowo bahre kun nne awohng awohng no kpꞌkunu ekpu go ege, wo erakatahng eje li a ane kpee ma me-e ten>>.
23 Ano wo e bade njal kak ero, bahb Esowo ebahre bade ejum jia, fvfo á faange ero ebahre.
Ayare Nya Li ka Etahk Esowo
24 N kehm yehke atubesi abalimajom, ewubu ane abal, bo jolo Serebiya, Hasabaya, a ane awubu bako ba jolo abonanyehn ebo,
25 fvfo n dumu nsol ka bo, ayare nya asilva, agul a ajoobo nsol nyako, nya ntul, atubu elle ebe, a atubesi, a anebe Isreel kpee ba jolo o ma ka go eltum etahk Esowo ebahre.
26 N dumu nsol nyia kpee kehm faake kak bo go abo, ana wo jolo no: asilva jolo 22100 (ekilo atahltahl nkpel atahl abal a nkpel elku nkpel atahl alon), (nsol asilva nyako (3400 Atahltahl nkpel enehkeni atahl awubu) nya agul jolo 3400 atahltahl nkpel enehkeni atahl awubu.
27 ekpeeke agul na eltahl, ekun ebe bahke rehnge akpohko agul atahltahl nkpel ebal atahl awubu. Anobo nobo nsol na abal nya bo ko abron nya bo ma dohk, jo nob ana agul.
28 N kehm tongo abalimajom baa re, <<Wahn, a nsol nyia kpee, bo ma-n rod ka Jehova ana nsol nyi li saang. Asilva a agul, nya li nsol nyi ane ka go eboa eltim ka Jehova Esowo bi babnso ejahne.
29 Baaben nsol nyia nobnob, tete wahn song dumu go ekpꞌkpa etahk ji Jehova go Jeusalem, go esamahr atubesi abalimajom, anebe Levi, a anebkul mfam ba Isreel.
30 Owo abalimajom, a anebe Levi kehm koko asilva a agul, a nsol nyehko nyi li saang nyi bo ma dumu re bo sol tahm a nya go etahk Esowo ebahre ji li Jeusalem.
Anebe Isreel Feere Kehnge go Jeusalem
31 Go ewuba nfung ebal mi ngbokambanga nnyahng, owo e mehle go ebgba bi Ahava asongo go Jeusalem. Ebo bi Esowo ebahre jolo anahre, jo baab-r fere tahr-r yehke go elwo ni anebekv ebahre, a abi ane go mbang.
32 Ano wo e rehnge nobnob go Jeusalem, owo e re ekv nfung era.
33 Eji ma rehng nfung eni nyi e rehnge Jeusalem, e kehm dumu asilva, agul, a nsol nyako nyi li saang, kehm faake kak Meremoti mmona Yuraya nlimanjom. Elieja mmona Finehas jolo o a ne, a anebe Levi fvfo, Jojabad mmona Jesua, a Noadiya mmona Binuyi.
34 Ejum ajehng ajehng bo nyˈnyon kak ana go nfange no, fere dumu. Ellubu ene kpee bo nyˈnyon ngare nyio.
35 Owo ane ba ma kehnge eju, kehm ba kehme ajom lim nya bo kpo jahm fi ka Esowo bi Isreel: Ewubu a nlum nfong ebal ka Isreel kpee, nkom atahl ani a nkom elku anyehng, abon ekom atahl ara abon ekom elku ebal. Bo wulu ewubu efahmbul ebbal tib go esi ajom nya abiafem. Nyaa kpee jolo njom nyi bo kpo jahm fi ka Jehova.
36 Bo tob ka atubesi ane ba ntul jehke bo adi adi, a ane ba kpo fili erohko ji erede aya ma Yufritis ejehke ji ntul, bo ba jo tob ane, a etahk Esowo.