Ejira
EZR - Ekajuk Unicode New Testament
1
Sairus Yake anebe Isreel Ba bo bobo Ebta Feere Kehnge
1 Go ngbokambang elya ni Sairus ntula Pesia, eji alum nya Jehova lˈlohko jol go nseenge nya Jeremaya bungu no, Jehova melle eltim ni Sairus ntula Pesia re á tiingi go ege nfam ejahbe, fere nyon nwer.
2 Ji ji a ji Sairus ntula Pesia bungu no: <<Jehova Esowo bi li go ejahbetul ma-m ka ajahbe atul kpee nya li njini. Á ma-m yehke re me n si etahk Esowo ka-e go Jeusalem ji li go Juda.
3 Nne ewe awohng awohng go egahne ellong, nong Esowo ebe jol a ne, nong á tahm go Jeusalem ji li go Juda, fere song si etahk Jehova Esowo bi Isreel, Esowo bi li go Jeusalem.
4 Edi ajehng ajehng ji anebe Isreel ba bo bobo bo go ebta lene no, nong afono ejahbe bao ka bo asilva, a agul, a nsol eljen ebo, atohkondi, a ayare nya elkoro nya bo bahke koko si etahk Esowo go Jeusalem.
5 Owo atubesi abangenahb nya Juda, a Benjamin, go abalimajom, a anebe Levi, nne awohng awohng no Esowo me-e kooro go eltim, toobo ebjing tahm go song si etahk Jehova go Jeusalem.
6 Aneb ebjing ebo kpee kake bo ebo, ka bo nsol nyi bo ko asilva a agul lim, a nsol eljen ebo, a atohkondi, nsol nyi sahb kˈkim ekun, budu a ayare elkoro kpee.
7 Asehnge sehnge ntula Sairus yehke nsol ba ka, nyi jolo go etahk Jehova, nyi ntula Nebukadneja yehke go etahk Jehova go Jeusalem tahm a nya, nya á rodo song bum go etahk esowo ebe.
8 Sairus ntula Pesia tongo Mitredati ji jolo nkuuru akpohko, re á fange nsol nyia, fere faake kak Sesbaja ji ntubesi anebe Juda go abo, ye ji jolo ntubesi no anebe Juda.
9 Nsol nyi a nyi bo ka bo: nkpingi agul jolo eltahl ewubu, nkpingi asilva jolo atahltahl nkpel ebal atahl awubu, agbangngbang asilva jolo eltahl a ngbangngbang esehmwubu,
10 akpeeke nya agul jolo eltahl ekpeeke ebwubu, akpeeke asilva nya jolo njad ebal jolo atahltahl ekpeeke ebwubu, a nsol eltul nyako nya jolo atahltahl nkpel ebal atahl awubu.
11 Nsol kpee nyi agul abola asilva jolo nsol atahltahl nkpel ewubal a nsol atahl awubu, Sesbaja ko go Babilon ba a nya go Jeusalem, a ane ba feere no kehnge.