11
Rod akpohko enya kak, wo jen ajoobo are
1 Ro abred enya kak go alahb;
l'kang afung gbalee, a bahke ma bel nsehng.
2 Kak akpohko enya go are na asehma, jol kak rehng anehkeni;
a nehme kahn ebi erem bi bahke gboko tub ejahbe.
3 Akparesemsem l'jol alahb alahb,
kpo na elahb wohngo go ndi.
Jol afii eti gbo feere go ejang aboblum afii ejang ebobkal, edi j'nehm ji gbo no, o wo kpo noongo
4 Mbahmgbe awohng awohng no kp'kahn ejang ji elfeb kpo lohng ba kp'kahn ngare nyi á l'k'bahme nosl enye;
mbahmgbe awohng awohng no kp'kahne bade akparesemsem kpo kahn ngare nyi ki fuumu re á fv nsol enye.
5 Ana a kil elkahne mbang nyi nfeb kpo sehng,
afii ana nne kpo jini go ala nnyehn,
ano wo a l'k'ma kahn eltum ni Esowo, ye ji li Nlima nsol kpee.
6 Bahm nsol ndi enya go ngare efungfu,
fvfo ngare elgung, non abo enya k're ekv,
tib a nehme kahn nsol nyi bahke nobo, ma nyao nya njii, afii nyako nya,
afii fundiki abbal abbal bahke nobo.
Buumu Nne no lim-a no eji a kpeka njangkun
7 Ellennge kp'yebe,
nne kpo bel eyebe eltim re amahr enye nyehn njul.
8 Jol afii ne kahnge aya tvv,
nong bo bel elgeere aya nyao kpee.
Wo nong bo buumu afung nya ejannge, tibre afung nyao bahke bahke jolo gbalee.
Ejum ajehng ajehng ji kp'bake ejumjum lohngem.
9 Wahn ji li ajangkun, jo belen eyebatahng eji ń li ajangkun,
fvfo nong ntim enyahne jo ka-n eyebatahng go afung nya n li ajangkun.
Jo toonen abang nya nltim enyahne
a ejum ajehng ajehn ji amahr enyahne nyehne no.
Wo kahnen re go nsol nyia kpee,
Esowo bahk-n lungu elam.
10 Ano wo wahnge fuumu no re wo yehke egbiingi eltim go ega eltim,
fere rod atongtong nya ngubjing enya ro go,
tibre eljolo ejangkun a eljolo eko eko, ejumjum lohngem.