23
Balamu ka dugawu kɛ Izirayɛlimɔgɔw ye
1 Balamu k’a fɔ Balaki ye ko: «Sarakabɔnan wolonfla lalaga ne ye yan, ka misitoran wolonfla ni sagajigi wolonfla fana labɛn ne ye.»
2 Balamu ka min fɔ, Balaki ka o kɛ. Balaki ni Balamu ka misitoran kelen ni sagajigi kelen kɛ saraka ye sarakabɔnan bɛɛ kelen kelen kan.
3 Balamu k’a fɔ Balaki ye ko: «Lɔ i ta sarakaw kɔrɔ yan, ne bɛna taga ɲa fɛ dɔɔnin. A bɛ se ka kɛ ko Matigi Ala bɛna a yɛrɛ yira ne ra; o ra ni a ka min yira ne ra, ne bɛna o fɔ i ye.» Balamu tagara lɔ tintin dɔ kan.
4 Ala nana a yɛrɛ yira Balamu na. Balamu k’a fɔ a ye ko: «Ne ka sarakabɔnan wolonfla lalaga, ka misitoran kelen ni sagajigi kelen kɛ saraka ye sarakabɔnan bɛɛ kelen kelen kan.»
5 Matigi Ala ka kuma don Balamu da ra, k’a fɔ a ye ko: «Sekɔ ka taga Balaki fɛ; ne ka kuma min don i da ra, i bɛ taga o fɔ a ye.»
6 Balamu sekɔra ka taga Balaki fɛ; a tagara Balaki lɔnin sɔrɔ a ta saraka kɔrɔ, ale ni Mohabu kuntigiw bɛɛ.
7 Balamu k’a ta cirayakuma fɔ; a ko:
«Balaki le ka ne lana ka bɔ Aramu,
Mohabu masacɛ le ka ne lana ka bɔ terebɔyanfan kuruyɔrɔw ra.
A ko: ‹Na Yakuba ta mɔgɔw danga ne ye,
na kumajuguw fɔ Izirayɛlimɔgɔw ma.›
8 Ayiwa, Ala ma mɔgɔ min danga, ne bɛ se ka o danga cogo di?
Matigi Ala ma kumajugu fɔ mɔgɔ min ma, ne bɛ se ka kumajugu fɔ o tigi ma cogo di?
9 Ne bɛ o yera faraw kunna,
ne ɲa bɛ o ra kongoriw kunna.
Siya dɔ lo, min siginin bɛ a danna;
o tɛ o yɛrɛ jate ko o ni siya tɔw ye kelen ye.
10 Jɔn le bɛ se ka Yakuba ta mɔgɔw jate, minw ka ca i ko kɛnkɛnmugu?
Jɔn le bɛ se ka hali o tarancɛ ta tarancɛ jate?
Ala y’a to ne ye sa nin mɔgɔɲumanw sacogo ra,
ka ne labancogo ni o labancogo kɛ kelen ye.»
11 Balaki k’a fɔ Balamu ye ko: «Ele ka mun le kɛ ne ra tan? Ne ka ele wele ko i ye na ne juguw danga, ele nana kɛ dugawu camanba le kɛ ye o ye!»
12 Balamu k’a jaabi ko: «O tuma ni Matigi Ala ka kuma min don ne da ra, ne man kan ka jija ka o le fɔ wa?»
Balamu ta dugawu flanan
13 Balaki k’a fɔ Balamu ye ko: «Na, an ye taga yɔrɔ wɛrɛ, i bɛna to yɔrɔ min na ka nin mɔgɔw ye. I bɛna dɔw ye, nka i tɛna o bɛɛ ye. I bɛ to o yɔrɔ ra ka o danga ne ye.»
14 A ka Balamu wele ka taga ni a ye Sofimu yɔrɔ ra, Pisiga kuru kunna. A ka sarakabɔnan wolonfla lalaga o yɔrɔ ra tuun, ka misitoran kelen ni sagajigi kelen kɛ saraka ye o sarakabɔnanw bɛɛ kelen kelen kan.
15 O kɔ, Balamu k’a fɔ Balaki ye tuun ko: «Lɔ i ta sarakaw kɔrɔ yan, ne bɛ taga Ala ta kuma lamɛn.»
16 Matigi Ala nana a yɛrɛ yira Balamu na. A ka kuma don Balamu da ra; a k’a fɔ a ye ko: «Sekɔ Balaki fɛ, ne ka kuma min don i da ra, i ye taga o fɔ a ye.»
17 Balamu sekɔra ka taga Balaki fɛ; a tagara Balaki lɔnin sɔrɔ a ta saraka kɔrɔ, ani Mohabu kuntigiw. Balaki k’a ɲininka ko: «Matigi Ala ka mun le fɔ?»
18 Balamu k’a ta cirayakuma fɔ; a ko:
«Balaki, wuri ka ne lamɛn!
E, Sipɔri dencɛ, i toro malɔ ne ye!
19 Ala tɛ i ko mɔgɔw, k’a fɔ ko a bɛ faninya tigɛ.
A tɛ i ko adamaden, k’a fɔ ko a bɛ ko kɛ, ka nimisa.
Yala Ala bɛ ko dɔ fɔ, ni a tɛ a kɛ wa?
A bɛ ko layiri ta, ni a tɛ a dafa wa?
20 A flɛ, Ala ko ne ye dugawu le kɛ o ye.
A ka dugawu mina, ne fana tɛ se k’a yɛlɛma.
21 Ala ma terenbariya si ye Yakuba ta mɔgɔw ra;
a ma kojugu si kɔrɔsi Izirayɛlimɔgɔw ra.
Matigi Ala, o ta Ala bɛ ni o ye.
O ɲagaritɔ b’a fo ni masaya fori ye.
22 Ala le ka o labɔ Misiran.
A bɛ baraka don o ra i ko sigin ta baraka.
23 Subagaya tɛ se ka foyi kɛ Yakuba ta mɔgɔw ra;
lagbɛri tɛ se ka foyi kɛ Izirayɛlimɔgɔw ra.
Ni wagati latigɛnin sera, Ala bɛ min kɛ,
o bɛ fɔ Yakuba ta mɔgɔw ye, Izirayɛlimɔgɔw.
24 Siya dɔ lo, min bɛ wuri i ko jaraba,
ka wuri ka pan i ko jaracɛ.
A tɛ la, fɔ a ye a ta sogo minaninw domu,
fɔ a ye a ta sogo faganinw jori min.»
25 Balaki k’a fɔ Balamu ye ko: «Ni i tɛ se ka o danga, o to yi; nka i fana kana dugawu kɛ o ye!»
26 Balamu ka Balaki jaabi ko: «Ne m’a fɔ i ye wa, ko: ‹Ni Matigi Ala ka fɛn o fɛn fɔ ne ye, ko ne bɛ o le kɛ?› »
Balamu ta dugawu sabanan
27 Balaki ko Balamu ma ko: «Na, ne bɛ taga ni i ye yɔrɔ wɛrɛ tuun. A bɛ se ka kɛ ko Ala bɛna sɔn k’a to i ye nin mɔgɔw danga ne ye o yɔrɔ ra.»
28 Balaki tagara ni Balamu ye Pehɔri kuru kunna, yɔrɔ min ɲasinna kongokolon ma.
29 Balamu k’a fɔ Balaki ye ko: «Sarakabɔnan wolonfla lalaga ne ye yan, ka misitoran wolonfla ni sagajigi wolonfla fana labɛn ne ye.»
30 Balamu ka min fɔ, Balaki ka o kɛ. O kɔ, a ka misitoran kelen ni sagajigi kelen kɛ saraka ye sarakabɔnan bɛɛ kelen kelen kan.