14
Yeremi ka Ala daari sanji ko ra
1 Matigi Ala ka kuma min lase Yeremi ma sanjinabariya ko ra, o le ye nin ye:
2 «Zuda bɛ maɲumankokasi kɛra,
o ta duguw benbenna;
mɔgɔw jusu kasinin sigisiginin bɛ dugu ma;
kasikan le bɛ bɔra Zeruzalɛmu dugu kɔnɔ.
3 Matigicɛw bɛ o ta baaradenw ci ka taga ji ɲini;
olugu bɛ taga kɔlɔnda ra, nka o tɛ ji sɔrɔ.
O bɛ sekɔ ni o ta minan lakolon ye,
o kɔnɔnɔfirinin ni o jigi tigɛnin bɛ o kun datugu ka sekɔ ka na.
4 Dugukolo jara fɔ k’a pɛrɛnpɛrɛn,
sabu sanji tɛ benna jamana kɔnɔ.
Sɛnɛkɛbagaw jigi tigɛra,
fɔ o bɛ o kun datugu.
5 Hali minanmuso bɛ den woro kongo kɔnɔ ka taga k’a to yi,
sabu bin tɛ yi.
6 Kongofaliw bɛ lɔlɔ fara kongoriw kunna,
ka to ka fɔɲɔ mina i ko kongowuruw;
o ɲadenw baraka banna
sabu bin tɛ yi.»
7 Mɔgɔw ko:
«E, Matigi Ala, hali ni an ta terenbariya ka an jaraki,
an dɛmɛ i tɔgɔ kosɔn!
An ta lanabariya bonyara,
an ka jurumun kɛ, ka i hakɛ ta.
8 Ele le ye Izirayɛli jigi ye,
ele le ye a bɔsibaga ye a degu wagatiw ra.
Mun kosɔn i bɛna kɛ jamana kɔnɔ i ko lonan,
i ko dugutagabaga min bɛ na su kelen dɔrɔn si, ka taga?
9 Mun kosɔn i bɛ kɛ i ko mɔgɔ min dabari bɛɛ banna,
i ko kɛrɛkɛcɛfari min tɛ se ka mɔgɔ kisi?
O bɛɛ n’a ta, Matigi Ala, i bɛ an cɛ ra,
ele tɔgɔ le bɛ an na;
i kana ban an na!»
Ala ma sɔn ko Yeremi ye daariri kɛ mɔgɔw ye
10 Matigi Ala bɛ min fɔ nin mɔgɔw ma, o ye, ko: «Can ra, yaala ka di o ye. O sen tɛ to yɔrɔ kelen na; o kosɔn Matigi Ala tɛ o fɛ tuun. Sisan kɔni, a bɛna a hakiri to o ta terenbariyaw ra, ka o ta jurumunw hakɛ bɔ o ra.»
11 Matigi Ala k’a fɔ ne ye tuun ko: «I kana daariri kɛ nin mɔgɔw ye ko ne ye koɲuman kɛ o ye.
12 Hali ni o ka sun don ka ne daari, ne tɛna o kasikan lamɛn. Ni o ka saraka jɛnitaw* ni siman sarakaw* bɔ ne ye, ne tɛna sɔn o ra. Ne bɛna o halaki ni kɛrɛkɛmuru, ni kɔngɔ, ni banajuguw ye.»
13 Ne ko: «E, Dunuɲatigi Ala, a flɛ, ciraw b’a fɔra o ye ko: ‹Kɛrɛ tɛna ben aw kan, kɔngɔ fana tɛna ben aw kan, sabu Ala bɛna hɛra ɲanaman le di aw ma nin yɔrɔ ra yan.› »
14 Matigi Ala ka ne jaabi ko: «Ciraw bɛ faninya le fɔra ne tɔgɔ ra. Ne ma o ci, ne ma foyi fɔ o ye, ne ma kuma don o da ra; faninya sikow, ani kuma gbansanw, ani mɔgɔlafirikuma minw bɛ bɔ o yɛrɛ ta miiriya ra, o bɛ o cirayakumaw le fɔra aw ye.
15 O kosɔn nin cira minw bɛ kumana ne tɔgɔ ra k’a sɔrɔ ne ma o ci, k’a fɔ ko kɛrɛ tɛna kɛ nin jamana ra, walama kɔngɔ, Matigi Ala bɛ min fɔ o ciraw kama, o ye nin ye: Kɛrɛkɛmuru ni kɔngɔ le bɛna o ciraw halaki.
16 O bɛ o cirayakumaw fɔra mɔgɔ minw ye fana, kɔngɔ ni kɛrɛkɛmuru bɛna olugu faga ka o suw benben Zeruzalɛmu dugukɔnɔsiraw ra; olugu yɛrɛ o, o ta musow o, o dencɛw o, o denmusow o, mɔgɔ tɛna sɔrɔ ka o si su don. Ne bɛna o ta juguya ben o yɛrɛ kan.»
Yeremi ka yafamadaari kɛ
17 Nin kuma fɔ o ye, ko:
«Ne ɲaji ye jigi su ni tere,
a kana lɔ ka ye,
sabu kojuguba benna ne ta dugumɔgɔw kan,
banajuguba dɔ le benna o kan.
18 Ni ne ka taga kongo kɔnɔ,
kɛrɛkɛmuru ka minw faga, olugu suw bɛ yi;
ni ne ka don dugu kɔnɔ,
kɔngɔ ka minw mina fɔ ka o halaki, olugu bɛ yi.
Ciraw, ani sarakalasebagaw bɛ yaala jamana kɔnɔ,
nka o tɛ foyi faamu nin kow ra.»
19 Mɔgɔw ko:
«E, Ala, yala i banna Zuda jamana ra pewu le wa?
Yala Siyɔn dugu lɔgɔ bɔra i ra le wa?
Mun kosɔn i ka tɔɔrɔ ben an kan,
k’a to fla tɛ sɔrɔra an ta tɔɔrɔ ra?
An tun bɛ hɛra le makɔnɔna,
nka a ma na ɲa;
an tun bɛ an ta tɔɔrɔw nɔgɔyawagati le makɔnɔna,
nka o nana kɛ jatigɛba le ye.
20 E, Matigi Ala, an lɔra an ta juguya ra,
ani an bɛmaw ta terenbariya;
sabu an ka jurumun kɛ ka i hakɛ ta.
21 A kɛ i tɔgɔ kosɔn, i kana ban an na;
i kana i ta masasiginan nɔɔrɔman mafiyɛnya!
I hakiri to an na, i kana an ni i ta jɛnɲɔgɔnya cɛn.
22 Siya tɔw ta batofɛn gbansanw bɛɛ ra,
o ra juman kelen le bɛ se ka sanji laben?
Yala sankolo bɛ se ka sanji lana a yɛrɛ ma wa?
Ele tɛ wa, ele Matigi Ala, an ta Ala?
An jigi bɛ i kan,
sabu ele le bɛ nin kow bɛɛ kɛbaga ye.»