3
Zheruzalɛmu ca woolo
pe sila Yɛnŋɛlɛ li sɛnrɛ ti lɛ
1 Mboro ca ŋga mà yiri ma je, mboro ca ŋga ma yɛn fyɔngɔ ni, mboro ca ŋga ma yɛn leele jɔlɔfɔ,
jɔlɔgɔ yɛn ma wogo.
2 Katugu ca woolo pe sila logo Yɛnŋɛlɛ li yeri.
Pe sila yɛnlɛ mbe yɛrɛwɛ sɛnrɛ logo.
Pe sila yɛnlɛ mbe pe jigi wi taga Yawe Yɛnŋɛlɛ li na.
Pe sila fulo Yɛnŋɛlɛ li tanla mbe sagawa lagaja.
3 Ca ki teele pe yɛn paa jaraye yɛn, mbele pe yɛn na kuunru fuŋgo ki kɛɛ.
Ki kiti kɔnfɛnnɛ pe yɛn paa kombokara yɛn, nda ti maa yanri yɔnlɔkɔgɔ yɛgɛ ni,
ti ma ti yaritaga ki ka, tila ka yaga ki goto pinliwɛ ni.
4 Ki Yɛnŋɛlɛ yɔn sɛnrɛ yofɛnnɛ pe yɛn yɛɛ gbɔgɔwɔ ni, ma pye leele fanlafɛnnɛ.
Ki saraga wɔfɛnnɛ pe ma yaara nda ti yɛn kpoyi ti tɛgɛ fyɔngɔ ni,
Pe maa lasiri wi jogo.
5 Ma si yala, Yawe Yɛnŋɛlɛ li yɛn ma sin wa pe sɔgɔwɔ, wa Zheruzalɛmu ca ki ni,
laa kambasinŋge kpɛ pye.
Pinliwɛ pyew li maga naga kpeŋgbeleŋgbe ma yo li yɛn ma sin,
laa wa mbe la ki wogo ki na.
Ɛɛn fɔ, lere ŋa wi woro ma sin, wila fɛrɛ ta wi kapyege ki ni.
6 Yawe Yɛnŋɛlɛ lì yo fɔ:
«Mì cɛngɛlɛ kele tɔngɔ ma ke kɔ,
ma pe malaga sigesanŋgazoye pe jɔgɔ.
Mì pe ca nawa koŋgolo ke jɔgɔ ma ke yaga waga,
lere kpɛ woro na toro wa ke ni.
Mì pe cara ti tɔngɔ,
lere woro wa ti ni, lere se cɛn wa ti ni naa.
7 Kona, a mì silan yɛɛ pye fɔ:
‹Ndɛɛ na woolo pe jɛn naa fyɛ na yɛgɛ,
mbaa na yɛrɛwɛ sɛnrɛ ti nuru,
mi se jɛn na pe cɛnsaga ki tɔngɔ.
Sɛnrɛ nda mìla yo pe mɛgɛ ni, mi se jɛn na ki kala la pye pe na.
Ɛɛn fɔ pè fyɛɛlɛ mbaa pe katijangara ti ni fuun ti piin.› »
8 Kona, a Yawe Yɛnŋɛlɛ lì sho fɔ:
«Ki kala na, yanla sige.
Pilige ŋga mi yaa yiri ye kɔrɔgɔ mbe kiti kɔn ye na,
yaa ki singi;
katugu mìgi kɔn maga tɛgɛ mbe cɛngɛlɛ ke gbogolo laga nuŋgba,
mbe wunluwɔ pi gbogolo, mbanla naŋgbanwa gbɔɔ naa na kɔnrɔ tandorogo ki kayaŋga wɔ pe ni;
katugu na naŋgbanwa ndorogo kala li yaa tara ti ni fuun ti sogo.»
Yɛnŋɛlɛ li yaa kali woolo
pe tangalɔmɔ pi kanŋga
9 «Kona, mi yaa ka leele pe sɛnyogo ki kanŋga, mbe pe sɛnyoro ti pye fyɔngɔ fu,
jaŋgo pe ni fuun paa yɛnri mi ŋa Yawe Yɛnŋɛlɛ na yeri,
mbaa tunŋgo piin na kan jatere nuŋgba ni.
10 Na gbɔgɔfɛnnɛ, poro mbele pe yɛn na woolo mbele pe yɛn ma jaraga,
pe yaa ka yiri fɔ wa Etiyopi tara gbaanla pe puŋgo na, mbe pan yarikanra ni na kan.
11 Ko pilige ko ni, Izirayɛli, na woolo, kafaara nda yè pye ma yiri ma je na na,
ye se ka fɛrɛ shɔ ti kala na naa;
katugu mbele pe yɛn ma yin yɛɛ gbɔgɔwɔ ni na yɔgɔri,
mi yaa ka pe wɔ wa ye sɔgɔwɔ.
Kona, ye se kaa ye yɛɛ gbogo naa, wa na yanwiga kpoyi ki na.
12 Leele mbele pe yɛn tege na, ma pye fanŋga fu fɛnnɛ,
poro mi yaa ka yaga laga ye sɔgɔwɔ;
pe yaa ka pe jigi wi taga mi ŋa Yawe Yɛnŋɛlɛ na na.
13 Izirayɛli woolo mbele pe yaa ka koro go na, pe se kaa kambasinŋge piin naa;
pe se kaa finlɛlɛ.
Leele fanlasɛnrɛ se kaa yinrigi wa pe yɔn;
ɛɛn fɔ pe yaa kaa nii, mbaa wogo yɛyinŋge na,
lere kpɛ se ka ti paa fyɛ.»
Zheruzalɛmu ca
ki yaa ka yinmɛ ta naa
14 Siyɔn ca woolo, yaa yuuro koo yɔgɔrimɔ ni!
Izirayɛli woolo, yaa jɔrɔgi nayinmɛ ni!
Zheruzalɛmu ca woolo, yaa yɔgɔri!
Yaa nayinmɛ nii ye kotogo ki ni fuun ni!
15 Yawe Yɛnŋɛlɛ, làa yo li yaa kiti ŋa kɔn ye na, lùu kɔ maa laga ye na.
Lì ye juguye pe laga lali ye ni.
Yawe Yɛnŋɛlɛ, Izirayɛli tara wunluwɔ we, wi yɛn ye ni.
Yee daga mbaa fyɛ jɔlɔgɔ wogo na naa.
16 Ko pilige ko ni, pe yaa kaga yo Zheruzalɛmu ca ki kan fɔ:
«Siyɔn ca woolo, yaga ka fyɛ,
ye wire tiga ka fanla ye na.
17 Yawe Yɛnŋɛlɛ, ye Yɛnŋɛlɛ li yɛn ye ni.
Li yɛn maliŋgbɔɔn kotogofɔ, ŋa wi maa cew kaan ye yeri.
Li yɛn ma yin nayinmɛ ni yoro kala na.
Naa ye yɛn mali ndanla ki kala na, li yaa yinwefɔnŋgɔ kan ye yeri.
Li yaa la yɔgɔri mbaa nayinmɛ nii ye kala na.»
18 Yawe Yɛnŋɛlɛ lì yo fɔ:
«Mbele pe yɛn yɛsanga ni, ma lali fɛti gbogolomɔ pi ni,
poro mbele pàa saa cɛn ma lali mboro Zheruzalɛmu ca ma ni,
poro mbele fɛrɛ gbɔrɔ pe yigi, na pe dingi paa tugugbɔrɔ yɛn
mi yaa pe yeri mbe pe gbogolo laga nuŋgba.
19 Ko sanga wo ni, mbele fuun pe yɛn na ye jɔlɔ,
mi yaa jɔlɔgɔ wa pe na.
Mi yaa ka jejɔgɔlɔfɛnnɛ pe sagala;
pè mbele purɔ ma pe yirige, mi yaa sɔngɔrɔ mbe pan pe ni.
Na woolo pè fɛrɛ shɔ tara nda fuun ni,
mi yaa ti paa pe sɔnni konaa paa pe gbogo wa ti ni.
20 Ko sanga wo ni, mi yaa sɔngɔrɔ mbe pan ye ni wa ye tara,
mi yaa ye gbogolo laga nuŋgba.
Mi yaa ti ye mɛgɛ ki yiri konaa paa ye sɔnni tara na cɛngɛlɛ ke ni fuun ke sɔgɔwɔ.
Yoro jate ye yaa kaga yan, na mi ka ka ye cɛnlɔmɔ pi kanŋga we.»
Yawe Yɛnŋɛlɛ, lo lì yo ma.