5
Shɔfɔ ŋa wi yaa ka se
wa Betilɛɛmu ca
1 Yawe Yɛnŋɛlɛ lì yo fɔ:
«Mboro Betilɛɛmu Efirata ca,
Mboro ŋa ma yɛn Zhuda tara cara ti ni fuun jɛɛlɛ le,
lere wa yaa yiri wa ma ni na kan,
ŋa wi yaa kaa Izirayɛli woolo pe yɛgɛ sinni.
Wi setirige ki lɛsaga kì lali wa, maga lɛ wa wagati titɔnlɔwɔ ŋa wì toro wi ni, maga lɛ wa fafafa.
2 Ki kala na, Yawe Yɛnŋɛlɛ li yaa ka li woolo pe le pe juguye pe kɛɛ,
fɔ sa gbɔn wagati ŋa jɛlɛ ŋa wi daga mbe pyɔ se, wi sa se.
Kona, wi sefɛnnɛ mbele pe yaa ka koro go na kulowo po puŋgo na,
pe yaa ka sɔngɔrɔ mbe pan Izirayɛli woolo sanmbala pe kɔrɔgɔ.
3 Ki kundigi wi yaa ka yiri, mbaa wi woolo pe yɛgɛ sinni
Yawe Yɛnŋɛlɛ li fanŋga ki ni,
Yawe Yɛnŋɛlɛ, wi Yɛnŋɛlɛ li gbɔgɔwɔ pi ni.
Kona, wi woolo pe yaa ka pye yɛyinŋge na,
katugu wi mɛgɛ ki yaa ka gbɔgɔ mbe gbɔn fɔ wa tara ti kɔsaga ki na.
4 Wo wi yaa ka pan yɛyinŋge ki ni.
Na Asiri tara fɛnnɛ paga ka pan mbe to we tara ti na,
mbe ye wa wunluwɔ yinrɛ ti ni,
we yaa kundigile yirige wa mbe wa pe na,
we yaa yɛkeele yirige mbe wa pe na.
5 Ki kundigile pe yaa ka cɛn Asiri tara ti go na pe tokobiye pe fanŋga na,
pe yaa ka cɛn to nda Nimirɔdi tara ti go na pe shɔrinaye pe fanŋga na.
Na Asiri tara fɛnnɛ paga ka pan mbe ye laga we tara ti ni,
ki kundigi wo wi yaa ka we shɔ pe kɛɛ.»
Yɛnŋɛlɛ li yaa ka fanŋga le
Izirayɛli woolo mbele
pe yaa ka koro go na pe ni
6 Kona, Zhakɔbu setirige piile mbele pe yaa ka koro go na, pe yaa ka pye wa cɛngɛlɛ lɛgɛrɛ ke sɔgɔwɔ,
paa fɔɔngɔ yɛn ŋga ki ma yiri wa Yawe Yɛnŋɛlɛ li yeri,
paa tisaga yɛn ŋga ki ma pan yan na.
Kila ki jigi wi taga lere na,
kila sila yaraga ka jaa sɛnwee yeri.
7 Zhakɔbu setirige piile mbele pe yaa ka koro go na,
pe yaa ka pye wa cɛngɛlɛ ke sɔgɔwɔ,
wa cɛngɛlɛ lɛgɛrɛ ke sɔgɔwɔ.
Pe yaa ka pye,
paa jara yɛn woŋgaala pe sɔgɔwɔ wa kɔlɔgɔ,
paa jara yirifɔnŋɔ yɛn simbaŋgbelege sɔgɔwɔ.
Wi ka toro laga ŋga fuun na,
wi ma to wi kagboro ti na mari kɔɔnlɔ kɔɔnlɔ.
Lere kpɛ se ya mberi shɔ wi yeri.
8 Izirayɛli woolo, ye yiri ye winfɛnnɛ pe kɔrɔgɔ,
ye ye juguye pe ni fuun pe tɔngɔ ye pe kɔ.
Yɛnŋɛlɛ li yaa ka yarisunndo
ti kɔ mberi wɔ wa
9 Yawe Yɛnŋɛlɛ lì yo fɔ:
«Pilige ka wa na paan, mi yaa ka ye shɔnye mbele pe maa kee malaga na pe kɔ mbe pe wɔ wa,
mi yaa ka malaga gbɔnwotoroye pe jɔgɔ pew.
10 Mi yaa ka ye tara cagbɔrɔ ti tɔngɔ,
mbe ye malaga sigecara ti jaanri.
11 Mi yaa ka lekara ti kɔ mberi wɔ wa ye sɔgɔwɔ;
jɛlɛfɛnnɛ se ka pye wa ye sɔgɔwɔ.
12 Mi yaa ka ye yarisunndo naa ye yaara yanlɛrɛ nda pè tɛ ti kɔ mberi wɔ wa ye sɔgɔwɔ;
ye kɛɛ yaara nda yè gbegele ye kɛyɛn yi ni,
ye se kaa fɔli ti yɛgɛ sɔgɔwɔ mbaa ti gbogo.
13 Mi yaa ka ye yarisunŋgo Ashera ki tiyagala ke kɔlɔgi, mbe ke wɔ wa ye sɔgɔwɔ,
mbe ye cagbɔrɔ ti tɔngɔ.
14 Cɛngɛlɛ ŋgele kee yɛnlɛ mbe logo na yeri,
wa na naŋgbanwa gbɔɔ pi ni, mi yaa kayaŋga gbɔgɔ wɔ ke ni.»