9
Zhɔbu wìla Bilidadi wi yɔn sogo:
Wì yo Yɛnŋɛlɛ lo li yɛn
fanŋga ni ma wɛ
1 Kona, a Zhɔbu wì si Bilidadi wi yɔn sogo ma yo fɔ:
2 Kaselege ko na, mìgi jɛn ma yo ŋga mà yo, pa ki yɛn ma;
ɛɛn fɔ sɛnwee wì mbe ya mbe sin mɛlɛ Yɛnŋɛlɛ lo yɛgɛ na?
3 Na maga yo ma yaa kendige wɔ Yɛnŋɛlɛ li ni,
na li ka yewige waga kele (1 000) yewe, lere se ya mbe yɔn sogomɔ nuŋgba kan yɛrɛ.
4 Kajɛnmɛ pi yɛn Yɛnŋɛlɛ lo woo, yawa si yɛn li ni fɔ jɛŋgɛ;
ambɔ wi mbe ya yere mbeli sige mbe koro mbajɔlɔwɔ?
5 Lo li ma yanwira ti kɔlɔgi wa ti yɔngɔlɔ ke ni, ti yɛrɛ naga jɛn,
na li ka nawa ŋgban, li mari jaanri.
6 Li ma tara ti tigile mari yirige wa ti nɔgɔ ki na,
li mari nɔgɔna cɛnyaara ti yɛgɛyɛgɛ.
7 Li ma para yɔnlɔ ki ni mbe yo kiga ka yiri, yɔnlɔ kila yiri;
li ma wɔnŋgɔlɔ ke yɔn tɔn kaa ya yiri.
8 Lo nuŋgba li ma naayeri fowaga ki sanga maga jaraga;
li maa tanri kɔgɔje wi tɔnmɔ mba pi maa yinrigi na tuun pi go na.
9 Lo lì wɔnŋgɔlɔ ke cɛnlɛ pyew ke da;
yɔnlɔparawa kamɛŋgɛ kɛɛ wɔnŋgɔlɔ, naa wɔnndaanla pe ni,
naa Ŋgonɔ gbɔgɔ pire konaa yɔnlɔparawa kalige kɛɛ wɔnŋgɔlɔ ke ni.
10 Li maa kagbɔgɔlɔ piin, ŋgele sɛnwee jatere se ya jɛn;
li maa kafɔnŋgɔlɔ piin, ŋgele ke se ya jiri mbe kɔ.
11 Wele, li ma toro na tanla, ɛɛn fɔ mi seli yan,
li ma yiri le na tanla ma kari, mila pye ki jɛnmɛ.
12 Li ka yaraga ŋga yigi fanŋga na, ambɔ wi mbe ya mbege shɔ?
Ambɔ wi mbe ya mbeli pye fɔ: «Yiŋgi maa piin yɛɛn?»
13 Na Yɛnŋɛlɛ li ka nawa ŋgban, lere se ya mbeli naŋgbanwa pi sogo;
kɔgɔje nawa yaripere to naa ti pinlɛyɛɛnlɛ sanmbala pe ni, ti maa ti yɛɛ go sogo li yɛgɛ sɔgɔwɔ.
14 Mi wo na, mbe ya mbeli yɔn sogo mbe yo mɛlɛ?
Sɛnrɛ titiin mi yaa ta mbe yo li ni?
15 Ali na mi ka pye sinŋɛ, mi se ya mbeli yɔn sogo;
lo na li yɛn na kiti kɔnfɔ, mbe ya mbeli yɛnri lilan yinriwɛ ta ko cɛ.
16 Na mi kali yeri, ali na li kanla yɔn sogo,
mi se ya taga ki na yɛrɛ mbe yo li nuŋgbolo jan ma logo na yeri.
17 Li yɛn nala tɔngɔlɔ li tifɛliŋgbɔgɔ ki ni,
li yɛn na jɔlɔgɔ lɛgɛrɛ waa na na go fu.
18 Li woro nala yari mbe wɔn mbe tigi;
li yɛn nala nawa pi tanga na na fɔ jɛŋgɛ.
19 Na mi ka yo mi yaa ki pye fanŋga kala, lo fanŋga ko ki yɛn ma gbɔgɔ;
na mi ka yo mi yaa kari li ni kiti kɔnsaga, ambɔ wi yaa we yeri ki kiti wi na?
20 Ali na kaa pye mi yɛn ma sin, na yɔn ko ki yaa kiti wi jan na na;
ali na kaa pye na nawa pi yɛn ma filige na na, na yɔn sɛnrɛ ti yaa na jɛrɛgi.
21 Naga yɛn ma, na nawa pi yɛn ma filige na na kaselege le? Mi si jɛn yɛrɛ.
Na yinwege ki la kì kɔ na na.
22 Ki ni fuun ki yɛn na yɛgɛ na nuŋgba, ki kala na mì yo fɔ:
«Yɛnŋɛlɛ li ma lere ŋa wi nawa pi yɛn ma filige wi na wo naa lepee wi ni pe tɔngɔ tɔngɔlɔmɔ nuŋgba na.»
23 Na kapege ka ka fo mbe to lere ŋa wi yɛn jɛrɛgisaga fu wa na mboo gbo,
Yɛnŋɛlɛ li maa tɛgɛ wi yɛsanga kala li na.
24 Na tara ta ka ye lepee wa kɛɛ wi cɛn ti go na, Yɛnŋɛlɛ lo li ma ti kiti kɔnfɛnnɛ pe ma pe yɛngɛlɛ ke tɔn kaselege ki na.
Na lo ma, ambɔ mbe ya mbe ko pye?
25 Na yinwege piliye yi yɛn na tooro na fyɛɛlɛ ma wɛ fevɔ ŋa wì wege wi na,
na yinwege ki yɛn na koo, na mi fa fɛrɛwɛ pi yan yɛnlɛ ni.
26 Na yinwege piliye yi yɛn na tooro fyaw fyaw paa gbɛgɛwɛ tɔnmɔkɔrɔ yɛn, ŋga kì tifaga,
paa yɔn yɛn, ŋa wi ma tigi fyɛlɛgɛ na yaraga ŋga wi yaa lɛ ki na.
27 Ali na mi ka yo fɔ mi yaa fɛgɛ na kayaŋga ki na,
mbanla yɛsanga ki yaga, mbaa yɔgɔri,
28 na jɔlɔgɔ ki maa fyɛrɛ waa na na;
katugu mìgi jɛn ma yo Yɛnŋɛlɛ li sege jate mbe yo mi yɛn jɛrɛgisaga fu.
29 Muwi mi yaa pye jɔgɔfɔ we;
yiŋgi na mbe sila na yɛɛ tege jaga?
30 Ali na mi ka woli nɛzhi ŋa wì yan wi tɔnmɔ pa ni,
mbanla kɛyɛn yi jogo tafilan ni yi laga,
31 konaa ki ni fuun, ma yaa kanla piligi naa wa fɛnrɛgɛ ki ni,
mi yaa pye mbe tijanga na yaripɔrɔ ti yeri.
32 Yɛnŋɛlɛ li woro sɛnwee paa mi yɛn,
jaŋgo mbeli yɔn sogo,
mi se ya mbeli yeri kiti kɔnsaga.
33 Kasuluwo woro mi naa lo ni we sɔgɔwɔ,
ŋa wi yaa kɛɛ taga we nii shyɛn we na mbe we kala li yɛgɛ wɔ.
34 Yɛnŋɛlɛ ligi yaga lilan gbɔnrɔ ti yaga ma li kanŋgala li ni,
fyɛrɛ kagala ŋgele li yɛn na waa na na, ke ka kaa na sunndo wi kɔɔn naa.
35 Kona mi jɛn na ya mbaa para li ni, mi se jɛn naa fyɛ li yɛgɛ;
ɛɛn fɔ ki woro ma, mi koro na yɛ.