7
Zhɔbu wi yɔn sogomɔ sanmba:
Wi yɛn naa kayaŋga
ki yɛgɛ yuun Yɛnŋɛlɛ li kan
1 Sɛnwee wi yinwege laga tara ti na, ki yɛn ma ŋgban paa sorodashe tunŋgo yɛn;
wi yinwege piliye yi yɛn jɔlɔgɔ ni paa tunmbyee ŋa pe maa sara wi woyo yi yɛn.
2 Wi yɛn paa kulo yɛn wa yɔnlɔ ki na, ŋa wi yɛn na yinmɛ jɛnri lagajaa,
wi yɛn paa tunmbyee yɛn, ŋa wì jori wi sara wi na naa singi.
3 Ki pyelɔmɔ nuŋgba pi na, na tasaga ki pye jɔlɔgɔ maga lɛ yeyɛn lɛgɛrɛ ni,
yembinɛ o yembinɛ tege ki yɛn na na.
4 Na mi ka sinlɛ yembinɛ, mi mala yɛɛ yewe fɔ: «Mi yaa yiri wagati wiwiin?»
Yembinɛ li ma tɔnlɔ na yɛgɛ na,
mi ma koro na waa na kanŋgi wa na sinlɛsaga fɔ mbe sa laga ki laga.
5 Fyɛnrɛ ye na wire ti lagapyew ki ni, mari kurukuru paa fɛnrɛgɛ waga yɛn,
na witige kila kɔɔnlɔ sagbanra na finriwɛ yinrigi.
6 Na yinwege ki yɛn na koo fyɛlɛgɛ na paa yɛgɛ ŋga na gbɛrɛ tifɔ wi lola wi maa tooro we,
ki yɛn na koo, jigi tagasaga fun ki yɛn na koo!
7 E, Yɛnŋɛlɛ, ma jatere wi tɛgɛ ki na fɔ na yinwege ki yɛn paa tifɛlɛgɛ yɛn;
mi se fɛrɛwɛ po yan yɛnlɛ ni naa fyew.
8 Mboro ŋa maa na wele, ma yɛngɛlɛ ke se kanla yan naa;
ma yaa kaa na lagajaa ma yɛngɛlɛ ke ni, ɛɛn fɔ ma se kanla yan.
9 Yɛgɛ ŋga na kambaaga ki ma toro ma kɔ saw,
ki pyelɔmɔ nuŋgba pi na, lere na kari wa kuulo tara mbe sɔngɔrɔ naa.
10 Wi se ka sɔngɔrɔ mbe pan wa wi go naa,
wìla pye ma cɛn mbele ni, pe ma fɛgɛ wi na.
11 Ki kala na, mi se ya mbanla yɔn ki tɔn;
mbanla ta na jatere wì piri na na, mi daga mbe para,
mbanla ta na nawa pì tanga na na, mi yaa na kayaŋga ki sɛnrɛ yo.
12 Naga yɛn ma, muwi mi yɛn kɔgɔje we lee nakoma kɔgɔje wi yarifɛlɛgɛ ye,
fɔ a ma nɛɛ na kɔrɔsi ma saa gbɔn ma?
13 Na mi ka sinlɛ mi maa ki sɔnri wɔnlɔwɔ po yaa na kotogo ki sogo na na,
fɔ wa na sinlɛsaga, na kayaŋga ki mbe mbɔnrɔ na na.
14 Kona, ma ma fyɛrɛ wa na na wɔɔnrɔ tijangara ni,
mbe yariyanra naga na na, nda ti maa na sunndo wi kɔɔn.
15 Ki kala na, ndɛɛ mala sere wa na yɔlɔgɔ ma wɔnwɔn pi kɔn na na, mala gbo ko mbe ja mbɔnrɔ na na,
kunwɔ po mbɔnrɔ na na, na kajeere ti ni fuun ti yiri funwa na yɛɛn ko na.
16 Yinwege ki la kì kɔ na na ma, mi se koro yinwege na fɔ sanga pyew!
Na yaga yɛyinŋge na ma, katugu na yinwege piliye yi woro yaraga ka.
17 Sɛnwee wi yɛn yiŋgi, a wi kala li si gbɔgɔ ma yeri ma,
yiŋgi na, a ma nɛɛ jatere piin wi wogo na ma?
18 Fɔ pinliwɛ pyew ma ma pan mboo kɔn mbe wele,
konaa wagati pyew ma maa wa ma wele mboo kala li jɛn.
19 Ma yaa ma yɛgɛ ki laga na na wagati wiwiin?
Ma yaa na yaga mbe wogosaga jɛnri ta mbe cɛnrɛ yɔli wagati wiwiin?
20 Na kaa pye mi kapege pye, yiŋgi mi pye ma na, sɛnwee piile welefɔ?
Yiŋgi na, a ma nɛɛ na gbɔɔn?
Na kala li yɛn tuguro ma go na wi le?
21 Yiŋgi na ma se si ya mbanla kapere ti kun ma yɛɛ ni,
konaa mbanla kajɔɔgɔ ki kala yaga na na?
Sanni jɛnri mi yaa ku mbe sinlɛ wa taambugɔ ki ni,
ma yaa kanla lagaja, ɛɛn fɔ mi se pye wa naa.