5
Elifazi wì yo Zhɔbu wi jɔlɔgɔ
kì yiri wo jate yeri
1 Koni yeri ma wele! Ambɔ wi yaa ta mbɔɔn yɔn sogo?
Mɛrɛgɛkpoyi wiwiin ma yaa yeri wi pan wɔɔn saga?
2 Naŋgbanwa pi ma lembige ki gbo,
kɔnrɔ tandorogo ki ma kambajɛnŋɛ wi gbo.
3 Mìla lembige ki yan kila jiti na kee yɛgɛ,
le ki yɔngɔlɔ nuŋgba ke ni, a mì sigi sege woolo pe daŋga ma yo fɔ:
4 Yɛnŋɛlɛ sa ti sagafɔ ka ka ta ki piile pe na,
kiti mbe to pe na, lere ka ka ta mbe yere pe ni mbe pe shɔ!
5 Yarilire nda pè kɔn, Yɛnŋɛlɛ sa ti fuŋgo yɛn mbele na, pe pan peri ka pew!
Ali yarilire nda wa wuuro ti sɔgɔwɔ, pe ti ni fuun ti koli!
Yɛgɛ mbatinwɛ fɛnnɛ poo kɛɛ yaara ti koli!
6 Jɔlɔgɔ kila fi mbe yiri wa tara paa tige yɛn,
tege ŋga sɛnwee wi na, kila fi wa tara paa yan yɛn.
7 Ɛɛn fɔ sɛnwee wi ma se mbaa jɔlɔ,
paa yɛgɛ ŋga na kasɔn ma fugu kparira ma yiri wa naayeri.
8 Mi wo na, ndɛɛ mi ja pye mboro, mi jɛn nala kala li le Yɛnŋɛlɛ lo kɛɛ;
mi jɛn nala kala li yɛgɛ yo lo kan.
9 Yɛnŋɛlɛ li maa kagbɔgɔlɔ piin, ŋgele kè toro sɛnwee wi jatere pyege na;
li maa kafɔnŋgɔlɔ ŋgele piin ke se ya jɛn mbe kɔ.
10 Lo li ma ti tisaga ki ma pan laga tara ti na,
lo li ma ti tɔnmɔ pi ma pan mbe wasege ki yinŋgi.
11 Li ma mbele pè pe yɛɛ tirige pe yirige naayeri,
li ma mbele yɛsanga gbɔn pe na pe yirige mbe pe shɔ.
12 Tijinliwɛ pee fɛnnɛ pè kagala ŋgele kɔn mbe pye, li ma ke jɔgɔ;
ŋga fuun pè yɔn kɔn na piin ki ma jɔgɔ pe kɛɛ.
13 Li ma kajɛnmbɛlɛ pe yigi pe yɛɛra tijinliwɛ pee pi ni,
mbe nambara fɛnnɛ pe kakɔnndɛgɛŋgɛlɛ ke jɔgɔ fyɛlɛgɛ na.
14 Diwi wi ma ye pe na yɔnlɔ na;
yɔnlɔ ŋgbanga na, pe maa talitali na toro ma mbe yo yembinɛ li.
15 Ɛɛn fɔ Yɛnŋɛlɛ li ma fyɔnwɔ fɔ wi shɔ ki leele pe yɔn sɛnpere ti kɛɛ,
mbe pe shɔ mbe pe wɔ wa fanŋga fɛnnɛ pe kɛɛ.
16 Li ma jigi tagasaga kan ŋa wi fanŋga kì kɔ wi yeri,
ɛɛn fɔ li ma tipere pyefɛnnɛ pe yɔnrɔ ti tɔn pe na.
17 Ki kala na, Yɛnŋɛlɛ li ka lere ŋa jɛrɛgi mboo le konɔ, fɛrɛwɛ yɛn ki fɔ wi woo;
Yɛnŋɛlɛ na yawa pi ni fuun fɔ maga ka je li yɛrɛwɛ sɛnrɛ ti na.
18 Katugu lo li ma sɛnwee wi wɛlɛgɛ, lo li mɛɛ wi sagbanra ti fɔ;
lo li maa pye wi maa yaa, lo li mɛɛ wi sagala.
19 Jorowo kagala kɔgɔlɔni mbe gbɔn ma na, ɛɛn fɔ Yɛnŋɛlɛ li yaa ma shɔ ke ni fuun ke ni;
ali na li kɔlɔshyɛn wolo ka pan, la mbe taga lo na, jɔlɔgɔ se gbɔn ma na.
20 Fuŋgo sanga ni, li yaa ma shɔ kunwɔ pi kɛɛ,
malaga sanga ni, li yaa ma shɔ tokobi wi kɛɛ.
21 Yɛnŋɛlɛ li yaa ma shɔ lepeele pe lesangara sɛnrɛ ti kɛɛ,
na jɔgɔwɔ ka pan sanga ŋa ni, ma se ka fyɛ.
22 Ma yaa kaa tɛgɛ jɔgɔwɔ sanga naa fuŋgo sanga ni, mbege yan fɔ ki woro yaraga ka,
ma se kaa fyɛ yan woŋgaala pe yɛgɛ;
23 katugu sinndɛɛrɛ se ka pye wa ma kɛɛrɛ ti ni,
yan woŋgaala pe yaa ka pye yɛyinŋge na ma ni.
24 Ma yaa kaga yan fɔ yɛyinŋge ki yɛn wa ma go,
na maga ka sa ma yaayoro ti wele wa ti kasaga, ma yaa ki yan fɔ ka kpɛ si la wa ti ni.
25 Ma yaa kaga yan fɔ ma setirige piile pe yɛn na lege,
fɔ ma sege woolo pe yɛn na lege paa yan ŋga wa wasege ki yɛn.
26 Ma yaa ka lɛ mbe tin yinwege ki na si jɛn mbe ku pɔɔn le wa fanga ki ni,
paa yɛgɛ ŋga na pe ma kaa yarilire pɔgɔlɔ gbogolo yarilire kɔnsanga ni.
27 Wele, wè ki kala li cancan jɛŋgɛ mali wele, pa li si yɛn ma.
Mboro ma daga mbege logo, mbɔɔn yɛɛ kala yɔn li ni.