30
Zhɔbu wi sɛnrɛ
puŋgo woro sannda:
Wi yɛn na para wi nala yinwege
ki sɛnrɛ na
1 Ɛɛn fɔ koni, mbele pe yɛn na kɔrɔgɔ jɛɛnlɛ, poro pe yɛn na tɛgɛ na na,
poro mbele pe teele mi sila pye na pe jate yaraga ka,
mi sila yɛnlɛ yɛrɛ mbe pe pinlɛ na pyɔɔnlɔ pe ni pe taga na yaayoro ti puŋgo na, mbaa ti kɔrɔsi.
2 Naga yɛn ma yɛrɛ, yiŋgi ki leele pe fanŋga kɛɛ ki mbe ya yɔn na kan san?
Poro mbele pe fanŋga kìla kɔ pe ni makɔ we.
3 Fyɔnwɔ po naa fuŋgo ki ni, tìla pe fanŋga ki kɔ pe ni,
pàa pye na yanri na yaakara jaa wa lawaga ki ni,
wa tara nda tɔnmɔ woro wa, konaa laga ŋga ki yɛn ma tijanga.
4 Pàa pye na yanwɛrɛ ti kologi wa tipire ti nɔgɔ,
tipigile ninde to tìla pye pe yaakara re.
5 Pàa pe purɔ ma pe yirige wa pe woolo pe sɔgɔwɔ,
pàa pye na jɔrɔgi pe na, paa yɛgɛ ŋga na pe maa jɔrɔgi yoo na.
6 Kìla pye, pe ma saa koro yanwira were ta ni,
naa waliwere konaa tara were ta ni.
7 Leele pàa pye na pe gbeere ti nuru wa tipire ti sɔgɔwɔ,
pe ma saa gbogolo pe yɛɛ na wa wuuro ti sɔgɔwɔ.
8 Pàa pye lejagala naa lewee cɛnlɛye,
mbele pàa gbɔn, ma pe purɔ, ma pe yirige wa tara ti ni.
9 Koni, muwi paa na mɛgɛ ki koo wa pe yuuro ti ni,
pe yɛn nala sɛnrɛ yuun wa pe baro pyege ki ni.
10 Mi la kɔ pe na, fɔ a pè pe yɛɛ laga na na,
pe yɛrɛ na singi mbe cɛnrɛ surugu wa na yɛgɛ sɔgɔwɔ.
11 Katugu Yɛnŋɛlɛ lìlan sandiga maŋga ki sanga mala go sogo;
leele pee pe yɛɛ yigi na ni naa.
12 Lejagala pèle yiri na kɔrɔgɔ mbe ta mbe baga na na,
pe yɛn nala jele li lee mbe ta mbanla jan,
pe yɛn na tuun na na mbe ta mbanla tɔngɔ.
13 Pè konɔ pyew li tɔn na na,
pe yɛn nala tɔngɔsaga jaa,
pe ni wa kpɛ woro na sagawa jaa.
14 Mbogo ŋga kìla pye mala maga nala go singi, pège furu,
pè toro wa ki wege ki ni mbogo sinndɛɛrɛ nda tì toori ti na, na paan na kɔrɔgɔ.
15 Fyɛrɛ gbɔrɔ yɛn nala yinri;
na gbɔgɔwɔ pì kɔ paa yɛgɛ ŋga na tifɛlɛgɛ ma kaa kari yaraga ni we,
na fɛrɛwɛ pì kari ma wɔ wa paa kambaara yɛn.
16 Koni, mila kee kusaga,
jɔlɔgɔ piliye gbɔn na na.
17 Yembinɛ, yama pi maa na kaa fɔ wa na kajeere ti na,
yama pila na kaa win, pila ya sinlɛ.
18 Yɛnŋɛlɛ lìlan yigi na yaripɔgɔ ki na li fanŋga ki ni fuun ki ni,
lìlan yɔlɔgɔ ki fyɛnri na na paa derege ŋga ki yɔlɔgɔ ma lere yigi ki yɛn.
19 Lìlan jan wa fɛnrɛgɛ ki ni,
mì pye paa gbanŋgban naa cɔnrɔ yɛn.
20 E Yɛnŋɛlɛ, mi maa gbele nɔɔ yinri mala saga, ɛɛn fɔ maa na yɔn sogo;
mi ma yere ma yɛgɛ sɔgɔwɔ mbɔɔn yɛnri, ɛɛn fɔ maa yɛnlɛ mbanla wele.
21 Mà pe na ni fɔ tipege,
mà to na na ma fanŋga ki ni fuun ki ni.
22 Mà ti a tifɛlɛgɛ kìlan lɛ ma kari na ni,
a tisaga tifɛlɛgɛ kìlan lɛ na mari na ni kɛɛ ki ni fuun ki na.
23 Mìgi jɛn ma yo ma yɛn na kee na ni wa kunwɔ pi ni,
wa lere pyew wi karisaga ki ni.
24 Ɛɛn fɔ lere ŋa wila kee kuwele, wii daga mboo kɛɛ ki yirige mbɔɔn yɛnri wi le?
Naga yɛn ma, lere ŋa jɔlɔgɔ gbɔn wi na, wo si daga mbɔɔn yeri maa saga wi le?
25 Naga yɛn ma, mi sila pye na gbele ja mbele pàa pye na jɔlɔ pe ni wi le?
Naga yɛn ma, na nawa pi sila pye ma tanga na na fyɔnwɔ fɛnnɛ pe kala na wi le?
26 Mìla pye na fɛrɛwɛ singi, ɛɛn fɔ, a kapege si pan;
mìla pye naga singi yanwa mbe yiri na na, ɛɛn fɔ, a diwi si tɔn na na.
27 Na nawa pì wɔ na na kɔnlɔ fu,
maga lɛ ki jɔlɔgɔ ŋga kì to na na.
28 Mi yɛn na tanri na nawa pi ni pì tanga na na, yɔnlɔ yanwa woro wa mbe nayinmɛ kan na yeri;
mi ma kaa yiri ma yere wa janwa wi sɔgɔwɔ, mbe gbele ŋgbanga mbe yo panla saga.
29 Na jatere piriwɛn gbeere ti kala na, mì pye paa dabaala pe sefɔ yɛn,
konaa ma pye paa kɔnrɔsogolo wi pinlɛyɛnlɛ yɛn.
30 Na wire tì wɔ na na tititi fɔ na fogolo,
witiwɛrɛwɛ pìlan kajeere ti gbo na na.
31 Na ŋgɔni wì koro koni na gbɔɔn kunwɔ yuuro na,
na wele lì koro na wiin kunwɔ gbelefɛnnɛ yuuro na.