25
Bilidadi wi sɛnyoro taanri woro:
Wì yo sɛnwee wi se ya pye kpoyi
Yɛnŋɛlɛ li yɛgɛ na
1 Kona, Bilidadi ŋa wìla yiri wa Shuwa tara, wì si sɛnrɛ ti lɛ, mɛɛ Zhɔbu wi pye fɔ:
2 «Tegere ti yɛn Yɛnŋɛlɛ lo woro, a li yɛn sunndo kɔngɔ yaraga;
li ma ti yɛyinŋge ma pye wa naayeri lara ti ni.
3 Naga yɛn ma, ambɔ wi mbe ya mbeli maliŋgbɔɔnlɔ ŋgbeleye yi jiri?
Ambɔ wi yɛn laga, ŋa li yanwa pi woro na gbɔɔn wi na?
4 Sɛnwee pyɔ wo mbe ya mbe sin mɛlɛ Yɛnŋɛlɛ li yɛgɛ na?
Sɛnwee ŋa jɛlɛ wì se, wo mbe ya pye kpoyi mɛlɛ?
5 Wele, yeŋge ki yɛrɛ woro ma filige Yɛnŋɛlɛ li yɛgɛ na,
wɔnŋgɔlɔ ke yɛrɛ woro fyɔngɔ fu li yɛgɛ na;
6 pee ka logo sɛnwee pyɔ, wo ŋa wi yɛn paa fyɛngɛ yɛn,
sɛnwee wi woro yaraga ka, na ndɔŋgɔ ma.»