18
Bilidadi wi sɛnyoro shyɛn woro:
Wì yo lepee wi kɔwɔ pi ma tijanga
1 Kona, Bilidadi ŋa wìla yiri wa Shuwa tara wì si sɛnrɛ ti lɛ, mɛɛ zhɔbu wi pye fɔ:
2 Ye yaa ki sɛnlɛgɛrɛ nda ti yowo pi yaga sanga wiwiin?
Ye jatere ta, ko puŋgo na, wee jɛn we para.
3 Yiŋgi na we sila we yɛɛ piin paa yaayoro yɛn?
Yiŋgi na ye sila ki yaan ndɛɛ we yɛn lembire?
4 Zhɔbu, mboro ŋa mà nawa ŋgban, fɔ a ki naŋgbanwa pila ma jɔlɔ,
naga yɛn ma, mboro yɛn naga jaa dunruya wo mbe koro waga mboro kala na wi le?
Konaa walaga ki yiri wa ki yɔngɔlɔ nuŋgba ke ni wi le?
5 Ee, lepee wi fitanla yanwa pi yaa ka figi,
wi gbɔngɔlɔ kasɔn yinnɛ li yaa figi.
6 Yanwa pi yaa kɔ wa wi go ki ni,
wi fitanla ŋa wi maa yanwa yinrigi wi kan, wi yaa figi.
7 Wìla pye na tanri fanŋga ni, koni wi tangala li yaa yinŋgi;
kagala ŋgele wì kɔn ma tɛgɛ mbe pye, koro ke yaa wi jan.
8 Katugu mɛrɛ yaa wi tɔɔrɔ ti yigi,
wi yɛn na kee saa yɛɛ le wa mɛrɛ ti ni tuu yigi.
9 Pɛnɛ yaa wi yigi wi yeŋgbele li na,
mana yaa wi tɔlɔgɔ ki yigi mbege gbɛrɛ.
10 Wi yigimana li yɛn ma pɛri ma lara wa tara ti ni,
pɛnɛ yɛn ma pɛri wa wi konɔ li ni.
11 Fyɛrɛ kagala yaa kaa sunndo kɔngɔ waa wi na kɛɛ ki ni fuun ki na,
koro ke yɛn naa tuuro tɔnri.
12 Fuŋgo ki yaa wi fanŋga ki kɔ,
jɔlɔgɔ ki yɛn le wi tanla.
13 Yama pi yɛn naa sɛlɛgɛ ki nii na kee;
yambewe yɛn naa wire ti ni fuun ti nii na kee.
14 Wi yɛn ma cɛn wi paraga go ŋga ni yɛyinŋge na, pe yaa kaa tilele mboo wɔ wa ki ni,
pe yaa kaa tilele mbe kari wi ni wa wunluwɔ ŋa wi maa fyɛrɛ waa wi yeri.
15 Wi paraga go ki yaa koro waga, lere wa yɛgɛ wi yaa ye wa ki ni,
pe yaa kiribi wo wi cɛnsaga ki na.
16 Kona wi yaa pye paa tige yɛn, ŋga kì ku, a ki ninde tì waga wa tara,
a njere tì waga wa naayeri.
17 Lere se ka nawa to wi na naa laga tara ti ni,
wi mɛgɛ ki se ka yeri laga ka kpɛ ni naa.
18 Pe yaa wi wɔnrɔgɔ mboo wɔ wa yanwa pi ni, mboo wa wa diwi ni,
pe yaa wi purɔ mboo wɔ laga dunruya wi ni.
19 Pyɔ nakoma pishyɛnwoo se ka koro wi puŋgo na, wa wi woolo pe sɔgɔwɔ,
wi lere wa kpɛ se ka koro yinwege na wa wi go ki ni.
20 Yɔnlɔ tosaga kɛɛ woolo pe yaa kaa kawa wi tɔngɔkala li wogo na,
yɔnlɔ yirisaga kɛɛ woolo pe yaa kaa fyɛ mbaa seri.
21 Pa lepee wi go ki ma kɔ yɛɛn;
lere ŋa wii Yɛnŋɛlɛ jɛn, pa wi laga ki ma cɛn yɛɛn.