15
Elifazi wi sɛnyoro shyɛn woro:
Wì yo lepee wi yaa jɔlɔgɔ ta
1 Kona Elifazi ŋa wìla yiri wa Tema ca, wì si sɛnrɛ ti lɛ ma Zhɔbu wi pye fɔ:
2 Naga yɛn ma, ki yɛn ma yala kajɛnŋɛ wi lere yɔn sogo jɛnmɛ ni, mba pi yɛn go fu paa tifɛlɛgɛ yɛn le?
Naga yɛn ma, wi maa fuŋgbolo li yin yɔnlɔ yirisaga tifɛlɛgɛ wɛrɛgɛ ko ni, mbe sila para wi le?
3 Naga yɛn ma, wi maa para mboo yɛɛ shɔ tɔnli fu sɛnrɛ ni wi le,
nakoma sɛnwara ni wi le?
4 Mboro wo na, mbaa fyɛ Yɛnŋɛlɛ li yɛgɛ, ko mboro yɛn na jogo,
leele paa jatere piin Yɛnŋɛlɛ wogo ki na yɛnrɛwɛ ni, ko ma yɛn na jogo.
5 Ma kajɔgɔrɔ to tɔ̀ɔn yɔn ki le ki sɛnrɛ nda ti yowo pi ni;
tijinliwɛ pee fɛnnɛ pe sɛnrɛ yolɔmɔ po mà fɔrɔgɔ mbaa para.
6 Ma yɛɛra yɔn ko kila ma jɛrɛgi, mi ma!
Ma yɛɛra yɔn sɛnrɛ to tì sɛnrɛ ti jan ma na.
7 Naga yɛn ma, mboro pe keli ma se sɛnwee piile pe ni fuun pe na wi le?
Pe keli ma mboro se, mɛɛ kaa jɛn ma tinndiye poro da wi le?
8 Naga yɛn ma, maa pye Yɛnŋɛlɛ li ni wa li gbogolomɔ pi ni, mali ŋgundo kagala ke logo wi le?
Mà kajɛnmɛ pi ni fuun pi shɔ maa ta ma yɛɛ nuŋgba woo wi le?
9 Yiŋgi ma jɛn, na woro sigi jɛn?
Kagala yɛgɛ jɛnmɛ pipiin pi yɛn ma yeri, na pi woro we yeri?
10 Yinzifire fɛnnɛ yɛn we ni, lelɛŋgbaara yɛn we ni,
mbele pè lɛ jɛŋgɛ ma to wi na.
11 Kotogo sogowo mba Yɛnŋɛlɛ lì kan ma yeri,
konaa sɛnjɛndɛ nda fuun tì yo ma kan, to sɔɔn yɛnlɛ ti bere!
12 Yiŋgi na, a mà si nawa ŋgban ma?
Yiŋgi na, a ma nɛɛ we kanli ma?
13 Mà kɔnrɔ ta Yɛnŋɛlɛ li ni,
fɔ maga sɛnrɛ cɛnlɛ nda ti yirige wa ma yɔn!
14 Sɛnwee pyɔ wi yɛn yiŋgi, mbe suu yɛɛ pye mbe yo wi yɛn kpoyi?
Wo ŋa jɛlɛ wì se, wi mbe ya pye sinŋɛ mɛlɛ?
15 Wele, Yɛnŋɛlɛ lii taga li mɛrɛgɛye kpoyi pe na yɛrɛ,
ali naayeri wi woro kpoyi li yɛgɛ na yɛrɛ,
16 pee ka logo sɛnwee pyɔ, ŋa wi yɛn yaritijaanga, ma jɔgɔ,
wo ŋa wi maa kambasinŋge ki piin maga pye paa wi tɔnwɔɔ yɛn.
17 Koni logo na yeri, mi yaa ta yɛgɛ yo ma kan!
Ŋga mì jɛn, mi yaa ki sɛnrɛ yo ma kan.
18 Ŋga kajɛnmbɛlɛ pè yo,
ko ŋga pè logo pe tɛlɛye pe yeri, pee ka lara wa ki ni.
19 Ki sanga wi ni Yɛnŋɛlɛ làa tara ti kan poro nuŋgba yeri;
nambanŋa kpɛ sila pan mbe pinlɛ pe ni gbɛn, mbe pe go jɔgɔ.
20 Lepee wi maa yinwege ki ni fuun ki pye wa jɔlɔgɔ ki ni;
yɛgɛlɛ ŋgele kè kan lepee wɛlɛwɛ wi yeri, ke yɔn ki yɛn ma jiri ma jɛn.
21 Magaŋgala ŋgele ke maa fyɛrɛ waa, koro ke maa yiin wa wi nuŋgbogolo ke ni;
yɛyinŋge sanga ni, jɔgɔwɔ pyefɔ wa yaa to wi na.
22 Wi se taga ki na mbe yo fɔ wi mbe ya shɔ, mbe wɔ wa ki diwi wi ni,
tokobi wi yɛn naa pɛɛlɛ mboo gbo.
23 Wi maa yanri na toro faa, naa yaakara ti lagajaa,
wìgi jɛn ma yo pilige ka yɛn ma tɛgɛ naa singi.
24 Jɔlɔgɔ naa jatere piriwɛn yɛn na sunndo kɔngɔ waa wi na,
ti yɛn na fanŋga taa wi na,
paa yɛgɛ ŋga na wunlunaŋa wa naa wi maliŋgbɔɔnlɔ ma gbɛgɛlɛ mbe sa to malaga na;
25 katugu wùu kɛɛ ki yirige Yɛnŋɛlɛ li na,
wì soro ma yere ma Yɛnŋɛlɛ na yawa pi ni fuun fɔ li sige.
26 Wùu go ki liri ma yiri na kee sa to Yɛnŋɛlɛ li na,
naa yɛɛ go singi wi tugurɔn sigeyaraga lirige ki ni.
27 Wìla tɔrɔ, fɔ a wi yɛgɛ kila yɛngɛlɛ,
wìla gbɔgɔ fɔ ma liri.
28 Ɛɛn fɔ cara nda tì jɔgɔ, pa wi yaa ka sa cɛn wa ti ni,
mbaa wɔnlɔ wa yinrɛ nda lere woro wa ti ni, nda tila tuunri we.
29 Ki lerefɔ wi se koro mbe pye penjagbɔrɔ fɔ fyew,
wi yarijɛndɛ lɛgɛrɛ ti se yere;
wi kɛɛ yaara ti se lɛgɛ mbe jaraga mbe gbɔn tara ti lagapyew.
30 Wi se ka shɔ mbe wɔ wa kunwɔ pi diwi wi ni;
wi yaa pye paa tige yɛn, ŋga kasɔn yinnɛ ki njere tunmɔɔrɔ ti waga,
Yɛnŋɛlɛ li yɔn tifɛlɛgɛ ki yaa wi lɛ mbe kari wi ni lege.
31 Wiga kaa jigi wi taga nambara wi na mboo yɛɛ puŋgo;
katugu nambara wo wi yaa ka sɔngɔrɔ wi na, mbe pye wi tɔnli.
32 Ki kagala ke yaa pye mbe yɔn fili sanni wi kupilige ki sa gbɔn;
wi yaa pye paa tige njege yɛn, ŋga ki se fun naa fyew.
33 Wi yaa pye paa ɛrɛzɛn tirige pire mbalɛndɛ yɛn, nda tila kɔɔn na tuun;
nakoma paa oliviye tige yɛn, ŋga ki fyɛɛnrɛ tila kaanla na tuun.
34 Lere ŋa wila la fyɛ Yɛnŋɛlɛ li yɛgɛ, wi go ki yaa koro waga piile fu;
leele mbele pe maa yarikanra shoo leele pe yeri na nii, kasɔn ki yaa ka pe yinrɛ ti sogo.
35 Pe ma tipege ki jate wa pe nawa,
mbe kambasinŋge pye,
ko maga kan pe ma pe yɛɛ puŋgo.