33
Jɔgɔwɔ pyefɔ wi jɔlɔgɔ kala
1 Mboro ŋa ma yɛn na jɔgɔwɔ pi piin, mbe sigi ta pe fɔɔn jɔgɔ gbɛn,
mboro ŋa ma yɛn na java wi piin, mbe sigi ta pe fɔɔn java gbɛn,
jɔlɔgɔ yɛn ma wogo!
Na maga ka jɔgɔwɔ pi pye mbe kɔ sanga ŋa ni,
pe yaa kɔɔn jɔgɔ fun;
na maga ka java wi pye mbe sa kɔ sanga ŋa ni,
pe yaa kɔɔn java fun.
2 E, Yawe Yɛnŋɛlɛ, we yinriwɛ ta,
we jigi wi yɛn mboro na.
Ki yaga maa fanŋga kaan we yeri pilige pyew,
konaa maa we shoo we jɔlɔgɔ sanga ni.
3 Na ma ka tinmɛ gbɔɔ yirige, leele pe maa fee;
na ma ka yiri mbe yere, cɛngɛlɛ ke ma gbɔn ma jaraga.
4 Juguye pe yɛn na pe kɛɛ yaara ti koli pe yeri paa yɛgɛ ŋga na gbatɔ ma kaa yarilire ka we,
pe yɛn na gbinri ti na paa kambɛɛrɛ lɛgɛrɛ yɛn.
5 Yawe Yɛnŋɛlɛ li yɛn yaraga pyew ki go na,
katugu li yɛn ma cɛn wa naayeri,
lì kaselege konaa kasinŋge ki ni ti leŋge wa Siyɔn ca lagapyew ki ni.
6 Yoro mbele ye yɛn we Fɔ wi woolo, ye yinwege piliye yi ni fuun yi ni, wi yaa la ye go singi;
tijinliwɛ po naa kajɛnmɛ pi ni, ti yɛn yarijɛndɛ nda ti ma shɔwɔ kan lere yeri;
mbaa fyɛ Yawe Yɛnŋɛlɛ li yɛgɛ ko ki yɛn ye yarijɛndɛ sɔnŋgbanga woro re.
Yawe Yɛnŋɛlɛ li yaa li woolo
pe saga
7 Ye wele, nambala kotogofɛnnɛ pe yɛn na jɔrɔgi wa ca nawa koŋgolo ke ni,
pitunmbolo mbele pàa kari sa yɛyinŋge ki lagaja pe yɛn na paan na gbele ŋgbanga.
8 Koŋgbɔrɔ tì koro waga,
lere kpɛ woro na toro wa koŋgolo ke ni naa.
Jɔgɔwɔ pyefɔ wì yɔn finliwɛ pi jɔgɔ,
wì sɛrɛfɛnnɛ pe tifaga,
wii lere wo wa kpɛ jate.
9 Kunwɔ kayaŋga to wa tara ti ni, tì tɔngɔ.
Liban tara tì fɛrɛ shɔ, tire ti yɛn na waga,
Sarɔn tara tì pye paa gbinri yɛn,
Bazan tara tire naa Karimɛli yanwira tire ti ni tì yangara ma wo.
10 Yawe Yɛnŋɛlɛ lì yo fɔ: «Koni mi yaa yiri mbe kala la pye,
koni mi yaa yiri mbe yere,
ee, koni mi yaa na gbɔgɔwɔ pi naga.
11 Kagala ŋgele yè kɔn ma tɛgɛ mbe pye, ke yɛn paa yan waga yɛn,
na kaga ka pye sanga ŋa ni, ke yaa pye paa yan sigire yɛn;
ye yɔn tifɛlɛgɛ ki yaa pye paa kasɔn yɛn mbe ye sogo.
12 Cɛngɛlɛ woolo pe yaa ka sogo, mbe pye paa cɔnrɔ fire yɛn,
nakoma paa wuuro yɛn nda pè kɔn ma wa kasɔn, ti yɛn na sori.»
13 Yoro mbele ye yɛn wa lege, ye nuŋgbolo jan ye kapyegele ŋgele mì pye ke sɛnrɛ logo,
yoro mbele ye yɛn na tɔɔn, yawa mba pi yɛn na ni ye daga mboo jɛn.
14 Kapere pyefɛnnɛ pe sunndo wi yɛn na kɔɔn pe na wa Siyɔn ca,
mbele pe woro na fyɛ Yɛnŋɛlɛ li yɛgɛ pe yɛn na seri fyɛrɛ ti kala na.
Pe yɛn na pe yɛɛ piin fɔ: «We ni, ambɔ wi mbe ya koro le ki kasɔn ŋgbanli ŋga ki se figi ki tanla?»
15 Lere ŋa wi maa tanri kasinŋge ki na,
lere ŋa wi maa kaselege sɛnrɛ yuun,
lere ŋa wi ma je tɔnli pee na,
lere ŋa wi ma je yarikanra nda pe ma shɔ mbe tɔn kaselege ki na ti na,
lere ŋa wi maa nuŋgbogolo ke tɔn, jaŋgo wiga ka ta mbaa legbogo sɛnrɛ nuru,
lere ŋa wi maa yɛngɛlɛ ke tɔn, jaŋgo wiga ka ta mbaa kapege pyewe pi yaan yɛnlɛ ni,
16 ko lerefɔ wo wi yaa ka cɛn wa naayeri lara ti ni,
waara lara nda ti yɛn fanŋga ni, to ti yaa pye wi larasaga ye;
yaakara ti yaa la kaan wi yeri,
tɔnmɔ fun pi se kɔ wi yeri.
Zheruzalɛmu ca ki yaa ka shɔ
17 Ye yaa ka wunlunaŋa wo naa wi tiyɔnwɔ pi yan yɛngɛlɛ ni,
ye yaa ka tara ti yan naa ti gbemɛ pi ni fuun pi ni.
18 Ye yaa ka nawa to ye fyɛrɛ kagala ŋgele kè toro faa ke na.
Ye yaa kaa yewe mbaa yuun fɔ: «Sɛwɛ yɔnlɔgɔfɔ ŋa wi maa nizara penjara ti jinri wi yɛn se yeri?
Nizara shɔfɔ wi yɛn se yeri?
Sanŋgazoye titɔnlɔmbɔlɔ kɔrɔsifɔ wi yɛn se yeri?»
19 Ye se ka ki leele mbele pe yɛn yɛɛ nagawa ni pe yan naa;
ki leele mbele pe sɛnrɛ ti logowo pi yɛn ma ŋgban, ye se ya mberi jɛn;
ki leele mbele pe sɛnrɛ ti yɛn ma piri, ye se ya mberi logo mbe wali ti na.
20 Ye Siyɔn ca ki wele, we maa we shɛrɛgɛ fɛtiye pe piin ca ŋga ni koyi;
ye yaa ka Zheruzalɛmu ca ki yan, ki ca ŋga ki yɛn pɔw we;
ki paara yinrɛ ti se ka kɔlɔgi mbe wɔ wa ti yɔngɔlɔ ke ni,
paara yinrɛ ti kankanŋgagala ke se ka kɔlɔgi naa,
ti pɔmanda ti se ka kɔɔnlɔ naa.
21 Pa Yawe Yɛnŋɛlɛ li yaa li gbɔgɔwɔ pi naga we na wa ki laga ki na;
ki yaa pye laga ŋga gbaanla tugbɔmbɔlɔ yɛn wa konaa laforo tugbɔɔrɔ ni.
Maliŋgbɔɔnlɔ tɔnmɔkɔɔrɔ se kaa tooro wa,
tɔnmɔkɔɔrɔ tugbɔɔrɔ ti se kaa tooro wa fun.
22 Katugu Yawe Yɛnŋɛlɛ lo li yɛn we yɛgɛ sinvɔ we,
Yawe Yɛnŋɛlɛ lo li yɛn we yɛkelewe we,
Yawe Yɛnŋɛlɛ lo li yɛn we wunluwɔ we,
lo li yaa we shɔ.
23 Yoro Asiri tara fɛnnɛ wele, ye tɔnmɔkɔrɔ gbeŋge ki manda tì yɔgɔrɔ,
tɔnmɔkɔrɔ ki parigbɔgɔ ki ma pɔ tiyala titɔɔnlɔ na na, manda ti woro ma pɔ ma ŋgban li na,
tii ya mbaa tɔnmɔkɔrɔ ki parigbɔgɔ ki tile naa, mbege kan ki yɛngɛ tifɛlɛgɛ ki na.
Kì pye ma, pe yaa ka pe kɛɛ yaara ti lɛgɛrɛ koli mberi yɛɛlɛ pe yɛɛ na;
ali jejɔgɔlɔ fɛnnɛ pe yaa ka sa yaara ta koli fun.
24 Zheruzalɛmu ca woolo wa kpɛ se ka yo fɔ: «Mi woro ŋgbaan.»
Leele mbele pe yɛn ma cɛn wa Zheruzalɛmu ca, pe kambasinnde ti yaa ka kala yaga pe na.