29
Jɔlɔgɔ yɛn Zheruzalɛmu ca ki wogo
1 Jɔlɔgɔ yɛn Ariyɛli laga ki wogo, jɔlɔgɔ yɛn Ariyɛli laga ki wogo!
Davidi wìla saa maliŋgbɔɔnlɔ cɛnsaga kan ma ca ŋga yɔn tɔn we.
Yɛlɛ o yɛlɛ, ye maa ye shɛrɛgɛ fɛtiye pe piin.
2 Konaa ki ni fuun, mi yaa Ariyɛli laga ki jori;
gbeere naa yɛntunwɔ pi yaa ka pye wa.
Mi yaa ka ca ki tɛgɛ paa saara sogoworo ti maa woo saraga wɔsaga ŋga na ki yɛn.
3 Mi yaa ka maliŋgbɔɔnlɔ cɛnsaga kan mbe ye yɔn tɔn kɛɛ ki ni fuun na;
mi yaa maliŋgbɔɔnlɔ ŋgbeleye tɛgɛtɛgɛ mbe ye maga,
mi yaa lugusara gbegele ca ki mbogo ki na mberi yagara ye mɛgɛ ni.
4 Ye yaa ka to bugu bugu bugu,
ye sɛnpaara ti yaa kaa yinrigi ndɛɛ ye yɛn tara;
ye sɛnyoro ti yaa kaa tigi ndɛɛ ti yɛn na yinrigi wa taambugɔ ki ni;
ye magala li yaa kaa yinrigi wa tara ti nɔgɔna paa gboo yinnɛ wolo yɛn,
ye sɛnyoro ti yaa kaa yinrigi wa tara ti nɔgɔna paa kalɛgɛrɛ sɛnrɛ yɛn.
5 Ye juguye janwa wi yaa ka pye paa gbanŋgban yɛn;
ki lewɛlimbɛlɛ janwa wi yaa ka pye paa yan waga yɛn, ŋga tifɛlɛgɛ ki maga lɛ.
Ki kagala ke yaa ka fo mbe pye yɔnlɔ nuŋgba li ni.
6 Yawe Yɛnŋɛlɛ na yawa pi ni fuun fɔ li yaa ka ye saga;
li yaa ka yɛnŋɛlɛ gbaanra pye, naa tara tigilemɛ ni, naa tinmɛ gbɔɔ ni,
naa tisagbɔgɔ konaa tifɛliŋgbɔgɔ ni, konaa kasɔn yinnɛ ni, na li yɛn na sorogi.
7 Cɛngɛlɛ woolo lɛgɛrɛ mbele pàa pye na malaga gbɔɔn Ariyɛli laga woolo pe ni,
poro mbele fuun pàa yiri ma to pe na,
ma to poro naa pe malaga sigeyinrɛ ti na ma pe jori,
pe yaa ka kɔ mbe wɔ wa paa wɔɔnrɔ yɛn, paa yariyanra yɛn yembinɛ.
8 Ki yaa ka pye paa fuŋgo fɔ wa yɛn, ŋa wi yɛn na wɔɔnrɔ wɔnlɔ maga yan ndɛɛ wi yɛn na nii,
ɛɛn fɔ na wi ka ka yɛn, wi mɛɛ ki yan fɔ wi lara ti yɛn waga.
Nakoma ki yaa ka pye paa lere wa yɛn, ŋa wɔgɔ wì yigi, a wi nɛɛ wɔɔnrɔ wɔnlɔ maga yan ndɛɛ wi yɛn na woo,
ɛɛn fɔ na wi ka ka yɛn, wi mɛɛ wi yɛɛ yan wi yɛn ma te wɔgɔ ki kɛɛ, yagbolo lì waga wi na.
Ki pyelɔmɔ nuŋgba pi na fun, cɛngɛlɛ woolo lɛgɛrɛ mbele pe yɛn na malaga gbɔɔn Siyɔn yanwiga ki ni,
pa pe yaa ka pye ma.
Yɛnŋɛlɛ woolo
pe kagala kɔrɔ mbajɛnmɛ
9 Yaa kawa, ki to ye yɔn na;
ye pye fyɔɔnlɔ, yaga kaa yaan.
Pe yɛrɛ tila kanŋgi pe na, ma si yala duvɛn ma pe wɔ;
pe yɛn na tanri na gbali, ma si yala sinmɛ wɛlɛwɛ ma pe wɔ.
10 Katugu Yawe Yɛnŋɛlɛ lì ye jatere wi tɔn ye na;
lì yoro Yɛnŋɛlɛ yɔn sɛnrɛ yofɛnnɛ ye yɛngɛlɛ ke tɔn ye na,
lì yoro yariyanra yanfɛnnɛ ye yɛrɛ ti tɔn paraga ni.
11 Koni, kagala ŋgele fuun kè naga ye na, ke yɛn ye yeri paa sɛlɛgɛ sɛwɛ wa nawa sɛnrɛ yɛn, nda pè sɛlɛgɛ sɛwɛ wi migili ti na, maa yɔn tɔn maa mara tɛgɛrɛ ni. Na ma kaa kan sɛwɛ jɛnfɔ wa yeri mbe yo wuu kara, wi yaa ma yɔn sogo mbe yo fɔ: «Mi se ya mboo kara, katugu wi yɔn ki yɛn ma tɔn, ma mara tɛgɛrɛ ni.»
12 Nakoma, na pe ka ki sɛlɛgɛ sɛwɛ wi kan sɛwɛ mbajɛɛn wa yeri mbe yo fɔ: «Ki yaga maga sɛwɛ ŋa wi kara.» Wi yaa ki fɔ wi yɔn sogo mbe yo fɔ: «Mi si sɛwɛ jɛn.»
13 We Fɔ wì yo fɔ: «Ki leele mbele pe maa fulo na tanla nala gbogo pe yɔn ko ni win,
pe maa na gbogo pe yɔn sɛnrɛ to ni win,
ɛɛn fɔ wa pe nawa jatere wo ni, pe yɛn ma lali na ni.
Na yɛgɛ fyɛrɛ nda ti yɛn pe ni, to ti yɛn ŋgasegele ŋgele pe ma fɔrɔgɔ ma jɛn sɛnwee piile pe yeri koro cɛ.
14 Ki kala na, ye wele, mi yaa koro mbaa kafɔnŋgɔlɔ naa kagbɔgɔlɔ piin,
mbe ti kaa tuun ki leele mbele pe yɔn na;
kajɛnmbɛlɛ pe kajɛnmɛ pi yaa kɔ,
tijinliwɛ fɛnnɛ pe tijinliwɛ pi yaa yiri waga.»
15 Jɔlɔgɔ yɛn pe wogo,
leele mbele pe maa pe kagala ŋgele pè kɔn ma tɛgɛ mbe pye ke lara fɔ lege Yawe Yɛnŋɛlɛ li na,
poro mbele pe maa pe kapyegele ke piin wa diwi wi ni,
na yuun fɔ: «Ambɔ wi yɛn na we yaan? Ambɔ wi we jɛn?»
16 Ye ta ma pye kagala pirifɛnnɛ!
Naga yɛn ma, ki daga paa cɔgɔ fanrifɔ wi jate paa joro ti yɛn wi le?
Naga yɛn ma, yaraga ŋga pè gbegele, ki daga mbege gbegelefɔ wi pye mbe yo fɔ: «Mboro ma mala gbegele wi le?»
Nakoma cɔgɔ ki daga mbege yo ki gbegelefɔ wi kan mbe yo fɔ: «Tijinliwɛ woro ma ni wi le?»
Yɛnŋɛlɛ li yaa ka li woolo pe jatere
wi kanŋga pe na
17 Naga yɛn ma, ye sigi jɛn wi le?
Sanni wagati jɛnri ni, Liban tara ti yaa kanŋga mbe pye tire kɛrɛ,
ki tire kɛrɛ ti yaa kanŋga mbe pye kɔlɔgɔ.
18 Ko pilige ko ni, nuŋgbojiile pe yaa kaa sɛwɛ wi sɛnrɛ ti nuru.
Fyɔɔnlɔ pe yaa ka yiri wa wɔwɔ pi ni, wa diwi wɔlɔ li ni; pe yaa kaa yaan pe yɛngɛlɛ ke ni.
19 Mbele pè pe yɛɛ tirige, ka yaa ka koro mbaa tari pe yɔgɔrimɔ pi na Yawe Yɛnŋɛlɛ li fanŋga na;
sɛnwee piile pe sɔgɔwɔ, mbele pe yɛn fyɔnwɔ fɛnnɛ ma wɛ, pe yaa kaa nayinmɛ nii Izirayɛli woolo Yɛnŋɛlɛ kpoyi li kala na.
20 Katugu lewɛlimbɛlɛ se ka pye wa naa,
mbele pe maa tɛgɛ Yɛnŋɛlɛ na pe yaa ka kɔ;
mbele pàa pye na leele pe pɛɛlɛ mbe kapege pye pe na, pe yaa ka kɔ mbe wɔ wa;
21 poro mbele pàa pye na baga leele pe na ma yo pè kapege pye wa kiti kɔnsaga,
na pɛŋgɛlɛ nii ca ki kiti kɔnfɛnnɛ pe na, na pe punŋgu wa ca ki mbogo yeyɔngɔ ki na,
na lesinmbele pe tanga ki shoo pe yeri go fu.
22 Ki kala na, Yawe Yɛnŋɛlɛ na làa Abirahamu wi go shɔ,
pa lì yo yɛɛn Zhakɔbu setirige woolo pe kan fɔ:
«Koni, Zhakɔbu setirige piile pe se ka fɛrɛ shɔ naa,
pe se ka go sogo naa.»
23 Katugu na pe piile paga kanla kɛɛ yɔnlɔ tunŋgo ki yan wa pe yɛɛ sɔgɔwɔ sanga ŋa ni,
pa pe yaa lanla mɛgɛ ki jate fɔ ki yɛn kpoyi,
mi ŋa Zhakɔbu Yɛnŋɛlɛ na li yɛn kpoyi pe yaa lanla jate,
mbaa mi ŋa Izirayɛli woolo Yɛnŋɛlɛ na gbogo.
24 Mbele pe jatere wìla pye na pe punŋgu, pe yaa tijinliwɛ ta;
mbele pàa pye na kɔngɔri, pe yaa nagawa ta.