Yɛnŋɛlɛ yɔn sɛnrɛ yofɔ
ABAKUKI
wi sɛwɛ we
Sɛwɛ wi nawa sɛnrɛ
Laga ki sɛwɛ ŋa wi ni, we yaa ki yan fɔ Yɛnŋɛlɛ yɔn sɛnrɛ yofɔ Abakuki wo naa Yɛnŋɛlɛ li ni, pe yɛn na sɛnrɛ yuun na taa pe yɛɛ yeri. Jɔlɔgɔ kagala naa kambasinnde nda Abakuki wìla pye na yaan naa yɛɛ mari, tìla wi jatere wi piri wi na. A wì si kɔngɔri ti wogo na Yɛnŋɛlɛ li yɛgɛ sɔgɔwɔ. A Yawe Yɛnŋɛlɛ lì suu yɔn sogo, ma yo fɔ li yaa Babilɔni tara woolo pe yirige mbe pe wa Zhuda tara woolo pe na, mbe pe jɔlɔ. Ɛɛn fɔ, a Abakuki wì si Yawe Yɛnŋɛlɛ li pye ma yo fɔ Babilɔni tara woolo poro kapyere to tijanga naa ma wɛ Zhuda tara woolo poro woro to na. Kona, a Yɛnŋɛlɛ lì sho fɔ poro fun li yaa ka jɔlɔgɔ wa pe na.
Yɛnŋɛlɛ làa ki yo maga filige Abakuki wi kan, fɔ ki mɔnɔ o mɔnɔ, li yaa kali kiti wi kɔn. Làa yariyanga naga wi na ma yo wigi sɛnrɛ ti yɔnlɔgɔ fɔ:
Katugu ki yariyanga ki kala li yaa pye wagati ŋa wì kɔn ma tɛgɛ wo ni.
Li pyewagati wì yɔngɔ tɔɔn, yagbolo ma.
Ali na li kaa mɔni, mali sige;
katugu li yaa pye mbeli yɛɛ yɔn fili jate, ki ka kaa ma kɔɔn shyɛn.
Li pyewagati wi se mɔ.
Wele, lere ŋa wi maa wi yɛɛ gbogo, wi woro ma sin wa wi kotogo na.
Ɛɛn fɔ lesinŋɛ wi yaa yinwege ta wi tagawa pi fanŋga na (2.3-4).
Sɛwɛ wi yɛn ma kɔɔnlɔ yɛgɛ ŋga na
Abakuki wìla kɔngɔri Yɛnŋɛlɛ li yɛgɛ sɔgɔwɔ, a lùu yɔn sogo 1.1–2.6a
Kapege pyefɛnnɛ pe yaa ka pe sara wi ta 2.6b-20
Abakuki wìla Yɛnŋɛlɛ li sɔn 3.1-19
1
1 Kala na Yɛnŋɛlɛ làa naga li yɔn sɛnrɛ yofɔ Abakuki wi na, loli na yɛɛn.
Yɛnŋɛlɛ yɔn sɛnrɛ yofɔ wìla kɔngɔri
Yɛnŋɛlɛ li yɛgɛ sɔgɔwɔ
ma yo li kala la pye
2 E, Yawe Yɛnŋɛlɛ, mi yaa ma yeri sa gbɔn wagati wiwiin mala saga?
Ɛɛn fɔ ma si woro na nuru na yeri.
Mi yɛn na gbele naga yuun fɔ lewɛlɛwɛ kapyere tì toro,
ɛɛn fɔ mɛɛ si we shɔ.
3 Yiŋgi na, a mà si ti mi yɛn na kapere ti yaan?
Yiŋgi na, a ma si pyeri na kambasinnde ti wele?
Jɔlɔgɔ naa lewɛlɛwɛ kapyere to mi yɛn na yaan.
Maara ti yɛn wa, kendige ki yɛn na woo lagapyew.
4 Ki kala na, lasiri wi woro na jate,
pe woro na kasinŋge piin.
Lepee wi ma tanga ta lesinŋɛ wi na.
Pe ma kiti wi kɔn yagbolo na.
Yɛnŋɛlɛ li yɔn sogomɔ sɛnrɛ:
Babilɔni tara fɛnnɛ pe yaa pan
mbe to Izirayɛli woolo pe na
5 Yawe Yɛnŋɛlɛ lì yo fɔ:
Ye ye yɛngɛlɛ ke kan cɛngɛlɛ ke na ye wele jɛŋgɛ,
ki yaa to ye yɔn na, mbe ye nawa wɔ;
katugu mi yaa kala la pye ye sɔnlɔ ki na,
na lere wa kali yɛgɛ yo ye kan, ye se taga ki na.
6 Mi yaa Kalide tara fɛnnɛ pe yirige mbe pe wa ye na,
poro mbele paa lere yinriwɛ ta, ma pye lewɛlimbɛlɛ.
Pe yɛn na tara ti yanri na toro lagapyew,
na leele pe tara lara ti shoo pe yeri, to nda ti woro pe woro.
7 Pe yɛn fyɛrɛ yaraga, ma pye sunndo kɔngɔ ni.
Poro jate poro pe ma pe kakɔnndɛgɛŋgɛlɛ naa pe fanŋga ki tɛgɛ pe yɛ.
8 Pe shɔnye pè wege ma wɛ kamɛɛlɛ na.
Pè wɛli ma wɛ dabaala mbele pe maa yanri yɔnlɔkɔgɔ pe na.
Pe wotoroye mbele shɔnye maa tilele pe yɛn na yeni na paan.
Pe yɛn na paan, ma yiri lege.
Pe yɛn na tinri na paan
paa yɛgɛ ŋga na yɔn ma to yaraga na maga lɛ.
9 Pe yɛn na paan pe ni fuun, mbe pan mbe tipege pye.
Pe yɛgɛ sin na wele wa pe yɛɛ yɛgɛ na kee perew.
Pe yɛn na mbele pè yigi kasopiile pe gbogolo lɛgɛrɛ paa taambugɔ yɛn.
10 Ki leele poro pe maa tɛgɛ wunlumbolo pe na,
na kundigile pe tifaga.
Pe maa tɛgɛ malaga sigecara ti ni fuun ti na.
Pe ma tara gbogolo lugusara, mbe lugu ti na mbe cara ti shɔ.
11 Pe ma toro mbe jɔgɔwɔ pye paa tifɛliŋgbɔgɔ yɛn, mbe sila kee pe konɔ.
Pe yɛɛra fanŋga ko ki yɛn pe yɛnŋɛlɛ le.
Yɛnŋɛlɛ yɔn sɛnrɛ yofɔ wìla kɔngɔri
naa fɔnŋgɔ Yɛnŋɛlɛ li yɛgɛ sɔgɔwɔ,
ma yo li kala la pye
12 E, Yawe Yɛnŋɛlɛ, na Yɛnŋɛlɛ, na Yɛnŋɛlɛ kpoyi,
mboro ma yɛn wa maga lɛ wa fafafa; ma se ku.
Yawe Yɛnŋɛlɛ, mà Kalide tara fɛnnɛ pe tɛgɛ mbe kiti kɔn we na.
Yawe Yɛnŋɛlɛ, mboro ŋa ma yɛn na walaga ŋga ki yɛn nala go singi,
mà ki leele pe tɛgɛ pe jɔlɔgɔ wa we na.
13 Ma yɛn fyɔngɔ fu, ma woro na jaa mbaa kapege ki wele.
Pe yɛn na leele mbele jɔlɔ, ma se yɛnlɛ mbaa ki jɔlɔgɔ ki wele.
Yiŋgi na, a mà si pyeri na javafɛnnɛ pe wele?
Yiŋgi na, a mà si pyeri ma lepee wi yaga wi yɛn na lere ŋa wi yɛn ma sin ma wɛ wo jate na wi jɔlɔ?
14 Ma yɛn na sɛnweele pe piin paa kɔgɔje ŋgbanra ti yɛn,
paa yaara nda ti maa fulolo lara na ti yɛn, to nda fɔ woro ti na we.
15 Kalide tara fɛnnɛ pe yɛn na leele pe ni fuun pe yinri, paa yɛgɛ ŋga na pe ma kaa ŋgbanla yigi njegenɛ ni we.
Pe ma pe tile pe mɛrɛ ti ni, mbe pe gbogolo wa ti nawa.
Kona, pe mɛɛ la yɔgɔri nayinmɛ ni.
16 Kona, pe mɛɛ saara wɔ pe mɛrɛ ti yeri,
mbe wusuna nuwɔ taan sogo pe ŋgbanra yigimɛrɛ ti mɛgɛ ni,
katugu to fanŋga na pe ma ŋgbanra nda yanlaga ni ti lɛgɛrɛ yigi,
pe yaakara ti ma pye tanra.
17 Naga yɛn ma, pa pe yaa koro mbaa yaara yinri suyi pe mɛrɛ ti ni yɛɛn le?
Naga yɛn ma, pa pe yaa koro mbaa cɛngɛlɛ sanŋgala ke tɔnri yɛɛn, pe se ke yinriwɛ ta le?