2
ናጋራ ፓጹሳ
(2:1-3)
1 ህንተኖ፥ ዬላይ ባይና አሳቶ፥ አነ እትፐ ሺቅተ፤
2 ጫርኩ ፑኒደ አፍያ ሱላዳን ቤናን ደኢደ፥ ያሽያ መꬍና ጎዳ ሀንቁ ህንተ ቦላ ዎናን ደእሽን፥ መꬍና ጎዳ ሀንቁዋ ሱሉዋ ጋላሳይካ ህንተ ቦላን ጋከናን ደእሽን፥ መꬍና ጎዳኮ ስምተ።
3 ህንተኖ፥ ጋድያን ደእያ አሽከቶነ አ አዛዙዋ ኦꬅያ ኡባ ገደ፥ መꬍና ጎዳ ኮይተ፤ ጽሎተꬃ ኮይተ፤ ቃይ አሽከተꬃካ ኮይተ። ያቶፐ፥ ኦን ኤሪ፥ መꬍና ጎዳ ሀንቁዋ ጋላስ ህንተና ቆሲደ አሻነንቶነ።
እስራኤልያ ዩሹዋን ደእያ ካዉተꬃቱዋ ኩንደꬃ
(2:4-15)
4 ጋዛ ካታማይ ኦናና፤ አስቃሎና ካታማይካ መላ ግዳናዋ፤ አሽዶዳ ካታማ አሳይ ሴታ ጋላስ ጎደታና፤ ኤቅሮና ካታማይካ ꬎቆለታናዋ።
5 ህንተኖ፥ አባ ዶናን ደእያ ፕልስጼማ አሳቶ፥ ህንተንቶ አየ አና! ኔኖ፥ ፕልስጼማቱ ደእያ ካናነ ቢታዉ፥ መꬍና ጎዳ ፕርዳይ ነ ቦላን ዬ። ታን ኔና ꬋይሳና፤ ኔናን እት አሳይነ አተና።
6 አባ ዶናን ደእያ ህንተ ቢታይ መህያ ሄምያ ሳ፥ ሄንꬃንቻቱ ደኢያሳነ መህያ ዉድያ ባሉዋ ግዳናዋ።
7 አባ ዶናይ ይሁዳ አሳፐ አቴዳዋንቶ ላታ ግዳናዋ፤ ሄዋን ኡንቱንቱ ሄመታና። ሳአይ ቃምያ ዎደ ኡንቱንቱ አስቃሎና ካታማን ደእያ ጎለቱዋን አቃና፤ አያዉ ጎፐ፥ መꬍና ጎዳይ ኡንቱንቱ ጾሳይ ኡንቱንቱዋ ቆፓና፤ እ ኡንቱንታ ዛሪደ እሻልሳና።
8 ኡባፐ ዎልቃማ መꬍና ጎዳይ፥ እስራኤልያ ጾሳይ፥ ሀዋዳን ያጌ፤ “ታን ሞኣባ አሳ ቅሊጩዋነ አሞና አሳ ቦርያ ስሳድ። ኡንቱንቱ ታ አሳ ቅሊጬድኖ፤ ኡንቱንቱ ቢታ ቦላንካ ኦቶረቴድኖ።
9 ሄዋ ድራዉ፥ ታ ደኡዋ ሱንꬃን ጫቃይ፥ ሞኣበ ሶዶማዳን ሀናና፤ አሞና አሳይካ ጋሞራ አሳዳን ሀናና። ኡንቱንቱ መꬍናዉ ማጽንያ ቦክያ ኦላነ አጉንꬃይ ማዬዳ ባዙዋ ግዳናዋ። ታ አሳፐ አቴዳዋንቱ ኡንቱንቱ ዱሬታ ቦንቃናዋንታ፤ ኡንቱንቱ ቢታካ ላታናዋንታ” ያጌ።
10 አሞናነ ሞኣበ አሳይ ኡባፐ ዎልቃማ መꬍና ጎዳ አሳ ቦላ ቅሊጪድነ ኦቶረቲደ ሃሳዬዳ ድራዉ፥ ኡንቱንቱ ቦላ ሀ መቱ ጋካናዋ።
11 መꬍና ጎዳይ ኡንቱንቱን ያየቴዳዋ ግዳናዋ፤ ቢታን ደእያ ጾሳቱዋ ኡባ እ ꬋይሳና፤ ቃይ ሳኣን ደእያ ካዉተꬃቱዋን ደእያ አሳይ ኡባይ ባረ ደእያ ሳን ደእያ ሳን አዉ ጎይናና።
12 ህንተኖ፥ ቶጵያ አሳቶ፥ ህንተካ ታ ማሻን ሀይቃና።
13 መꬍና ጎዳይ ባረ ኩሽያ ሁጲሳ ባጋ ዛሪደ የዳና፤ አሶረ ቢታ ꬋይሳና። ቃይ ናናዌ ካታማካ መላ ባዙዋዳን፥ መላ ሳኣ ኦꬃና።
14 ዉዲነ ዶአቱ ኡባይ አ ግዶን አላጻና፤ ጉቱነ ቁጻርሳይ አ ኮለቴዳ ግምበቱዋ ግዶን ደአና፤ ኡንቱንቱ ኮሻይ ማስኮትያናነ ፐንግያና ስሰታና። ጎለቱ ኬጸቴዳ ዝጋይ ካሎታና።
15 ሀ ካታማይ፥ “ታና! ታፐ አትና፥ ሀራይ ባዋ” ያጊደ ኦቶረቲደ ደኤዳዋ፤ ሽን እ ሀእ ዶአቱ ጌሱ መላ ሳኣ ግዴዳ። አ ምይያና አꬍያ ኡባይ ዳሮፐ ማላለቲደ፥ ባረንቱ ኩሽያ ጾርሲደ፥ “ባርቼ!” ጋና።