3
ዉርሰꬃ ጋላሳቱዋን ሀናናዉ ደእያ ኢታ የዋቱዋ
1 ሽን ዉርሰꬃ ጋላስ ዋይስያ ዎዲ ያናዋ አኬካ።
2 አያዉ ጎፐ፥ አሳይ ባረና ሲቅያዋንታ፥ ሻሉዋ ሲቅያዋንታ፥ ጬቀትያዋንታ፥ አይያዋንታ፥ ቦርያዋንታ፥ ባረና የሌዳዋንቶ አዛዘተናዋንታ፥ ጋላተናዋንታ፥ ጌሻተꬃይ ባይናዋንታ፥
3 ሲቁ ባይናዋንታ፥ ስገተናዋንታ፥ ዝግርሳንቻቱዋ፥ ባረና ናገናዋንታ፥ ኬከናዋንታ፥ ሎኦባ ዶሰናዋንታ፥
4 ኡባ ኤርከ ግያዋንታ፥ ድርቢያዋንታ፥ ኦቶሩዋን ሱገትያዋንታ፥ ቃይ ጾሳፐ አꬂደ፥ እሻሉዋ ዶስያዋንታ ግዳና።
5 ኡንቱንቱ ጾሳዉ ጎይንያዋ ማላቲኖ፤ ሽን አ ዎልቃ ካዴድኖ። ሄዋንቱ ማላ አሳቱዋኮ ሺቆፓ።
6-7 አያዉ ጎፐ፥ ኡንቱንቱፐ እቱ እቱ አሳ ጎልያ ገሊደ፥ ናጋራይ ዴጼዳዋንታ፥ ዱማ ዱማ አሙዋን ሱገትያዋንታ፥ ኡባ ዎደ ታማሪደ፥ ቱማተꬃ ኤራ አካናዉ ሙለ ዳንዳይቤና ዳቡራንቻ ማጫዋንታ ባለꬂኖ።
8 ያኔስነ ያምባሬስ ሙሴ የዉዋ ጳልቆዋዳን፥ ሄዋዳን ቃይ ሀዋንቱ፥ ሱረ ቆፋይ ባይናዋንታ አማኑዋን ኩንዴዳዋንቱ፥ ቱማተꬃባ ጳልቂኖ።
9 ሽን ያኔሳ ኤያተꬃይነ ያምባሬሳ ኤያተꬃይ ቃይ ቆንጬዳዋዳን፥ ኡንቱንቱ ኤያተꬃይካ አሳ ኡባዉ ቆንጫና ድራዉ፥ ኡንቱንቱ ካሰዋፐ አꬊደ ድጭክኖ።
ዉርሰꬃ ዞርያ
10 ሽን ኔን ታ ትምርትያ፥ ታ ሀኖታነ ታ ቆፋ፥ ታ አማኑዋነ ታ ዳንዳያ፥ ታ ሲቁዋነ ታ ገንጩዋ፥
11 ታ የደሳነ ታ ዋይያ በኣዳ። አንጾክያነ፥ እቆንዮነነ ልስጽራ ግያ ካታማቱዋን ታና ጋኬዳባነ ታን ዳንዳዬዳ የደሳ ኤራሳ። ጎዳይ ታና ሄ ኡባፐ አሼዳ።
12 ቱማተꬃን ክርስቶስ የሱሳን ጾሳ ማላቲደ ደአናዉ ዶስያ ኡባይ የደርሰታና።
13 ሽን ኢታ አሳቱነ ባለꬅያዋንቱ ሀራቱዋ ባለꬂደነ ባረንቱ ሁጰዉ ባሊደ፥ ካሰፐ ኢት ኢት ቢኖ።
14 ሽን ኔን ሄ ቱማተꬃ ኦፐ ታማሬደንቶነ ኤራደ፥ ኔን ታማሬዳዋንነ ኤሬዳዋን ምናደ ደአ።
15 ኔን ጉꬃ ናአተꬃፐ ዶማደ ክርስቶስ የሱሳ አማናደ፥ አቶተꬃይ ቤትያ አꬌዳ ኤራ እማናዉ ዳንዳይያ ጌሻ ማጻፋቱዋ ኤራዳ።
16-17 ጾሳ ማጻፋ ኡባን ጾሳ አያናይ ደኤ። ቃይ ሄ ማጻፋቱ ጾሳዉ ኦꬅያ አሳይ ኩመንꬃነ ሎኦ ኦሱዋ ኡባዉ ጊጌዳዋ ግዳና ማላ፥ ቱማተꬃ ታማርሳናዉ፥ ባላ ሴራናዉ፥ ባይዙዋ ሱርሳናዉነ ጽሎተꬃ ደኦ ዞርያ እማናዉ ማዲኖ።