2
ወዶራታ:
1 ታን፥ “ሳሮና ግያ ሳኣን ዶልያ ጪሻነ፥
ዎምባን ዶልያ ሎኦ ጪሻ ማላ” ያጋዱ።
ዎዳላይ:
2 ኤ ታ ሲቃታ ማጫ አሳ ግዶን ጼልያ ዎደ፥
አጉንꬃ ግዶን ቤትያ ሎኦ ጪሻ ማላታዉ ያጌዳ።
ወዶራታ:
3 ታ ሲቁ ሀራ ዎዳላቱዋ ግዶን ጼልያ ዎደ፥
ዎራን ደእያ አፕልያ ግያ ምꬃ ማላቴ፤
ታና ሎይꬅ ናሸችና፥ አ ኩዋ ግዶን ኡታድ፤
አ አይፊ ሚና፥ ታና ሎይꬅ ማልኤ።
4 እ ታና ቁማ ምያ አኮ ዉይግያ ገልሴዳ፤
ባረ ሲቁዋ ባንድራዳን ታ ቦላ ꬎቁ ꬎቁ ኦꬄዳ።
5 ታን አ ሲቁዋን ኦከታደ ሀርጌዳ ድራዉ፥
ዛቢብያ አይፍያ ታና ምዚደ ምንስተ፤
አፕልያ ታና ምዚደ፥ ታ ዎልቃ ኩንꬅተ።
6 ባረ ሀድርሳ ኩሽያ ታና ቦርኮትሴዳ፤
ባረ ኡሸቻ ኩሽያን ታና ቆሜዳ።
7 ህንተኖ የሩሳላመ ያላጋ ማጫ አሳዉ፥
ሲቁ ባረዉ ዶሲደ ደንዳና ጋካናዉ፥
አ ህንተ ቤጎና ማላ፥
ታን ህንተና ገንኤቱዋንነ ባዙዋ ዶገቱዋን ጫላይ።
ሲቁ ኡባ የዉዋ ሎይꬄ
(ስቁዋ 2:8—3:5)
8 ስስተ፥ ሄዌ ታ ሲቁዋ ኮሻ! በእተ ደርያና ፕሪደ፥
ዞዘቱዋ ቦላና ጾንገቲደ ጋኬዳ!
9 ታ ሲቁ ዉሻ ማላ፤ ዎይ ገንእያ ማራ ማላቴ።
በእተ፥ እ ኑ ጎልያ ድርሳ ማታን ኤቄዳ፤
ማስኮትያና ጎለ ጼሌ፤
ጋርዱዋ ጋርሳናካ ሉጻይ ጼሌ።
10 ታ ሲቁ ታና ሀዋዳን ያጌ፤ ታ ሲቃቴ፥ ደንዳ!
ታ ማላንቻቴ፥ ሃያ! እትፐ አነ ቦይተ።
11 በአ፥ ባልጉ አꬌዳ፤ እራይካ ኤቄዳ።
12 ቢታን ጪሻይ ጪሼዳ፤ የꬃ የጽያ አግናይካ ጋኬዳ፤
ሀራጵያ የꬃይ ኑ ቢታን ስሰቴ።
13 ባላሲ አይፍያ ዶሜዳ፤ ዎይኒ ጪሼዳ፤
አ ጪሻ ሳዉ ቢታን ቶሹኩ ጌ።
ሄዋ ድራዉ፥ ታ ሲቃቴ፥ ደንዳ፤ ታ ማላንቻቴ፥ ሃያ፤
አነ እትፐ ቦይተ ያጌ ያጋዱ።
ዎዳላይ:
14 ኔን አፉዋ ዶና ዛላ ዛአን ቆሰቴዳ ሀራጳት ማላ፤
አነ እት ገደ ታና ነ ሶምኡዋ በሳ፤ ነ ኮሻካ ስሳ።
አያዉ ጎፐ፥ ነ ኮሻይ ታና ቃረꬄ፤
ነ ሶምኡካ ዳሮ ሎኤ ያጌዳ።
የሩሳላመ ዎዶሮቱ:
15 ኑ ዎይኒ ጪሼዳ፤ ሄዋ ድራዉ፥
ኑ ዎይንያ ግዱዋ ባይዝያ ዎራካናቱዋ፥
ሄ ቄር ዎራካናቱዋ ጲርያ ዎꬂደ ኦይቂተ ያጌድኖ።
ወዶራታ:
16 ታ ሲቁ ታዋ፤ ታንካ አኖ፤
ጪሻ ግዶን እ ባረ ዉድያ ሄሜ።
17 ቃማ ꬉማይ ቃረታናዉ፥ ዎንታ ጫርኩ ጫርካናዉ፥
ታ ሲቆዉ፥ ገንእያዳን ዎይ ያላጋ ዶግያዳን፥
አፎትያ ደርያና ዎጻደ ሃ ስማ ያጋዱ።