15
ታን ቡርጩኩዋ አባ ቤኣድ
1 ታን ሳሉዋን ሀራ ዎልቃማነ ማላልስያ ማላ በኣድ። ጾሳ ሀንቁ ኡንቱንቱ ቦላን ፖለትያ ድራዉ፥ ዉርሰꬃ ላፑ ቦሻና ደእያ ላፑ ኪታንቻቱ ደኢኖ።
2 ቃይካ ታን ቡርጩኩዋ አባ ማላትያዋ ታማና ዋላከቴዳዋ በኣድ። ቃይ ዶኣ፥ አ ምስልያነ አ ሱንꬃ ፓይዱዋ ጾኔዳዋንታ በኣድ። ጾሳይ ኡንቱንቶ እሜዳ ዲꬃቱዋ ኦይቂደ፥ ቡርጩኩዋ ማላትያ አባ ማታን ኡንቱንቱ ኤቄድኖ።
3 ኡንቱንቱ፥ ጾሳ ኦሳንቻ ሙሴ ማዝሙርያነ ዶርሳ ማዝሙርያ ሀዋዳን የጼድኖ።
“ጎዳዉ፥ ኡባፐ ዎልቃማ ጾሳዉ፥
ነ ኪታይ ግታነ ማላልስያዋ።
አሳ ዛርያ ኡባ ካተዉ፥
ነ ኦጊ ጽሉዋነ ቱሙዋ።
4 ጎዳዉ፥ ነዉ ያየናዌነ
ነ ሱንꬃ ቦንቼናዌ ኦኔ?
አያዉ ጎፐ፥ ጌሻይ ነ ጻላላ።
አሳ ዛርያ ኡባይ ዪደ፥
ነ ስንꬃን ጎይናና፤
አያዉ ጎፐ፥ ነ ጽሎ ኪታይ
ኡባዉ ቆንጬዳ”
ያጊደ የጺኖ።
ላፑ ቦሻና ደእያ ላፑ ኪታንቻቱዋ
5 ሄዋፐ ጉይያን፥ ታን ሳሉዋን ደእያ ጌሻ ጎሊ ዶየቶዋ ሄዌካ ማርካተꬃ ዱንካንያ በኣድ።
6 ላፑ ቦሻና ደእያ ላፑ ኪታንቻቱ ጌሻ ጎልያፐ ከሴድኖ። ኡንቱንቱ ጶሊደ ቦጽያ ላይኑዋ ማዩዋ ማዬድኖ፤ ባረንቱ ትራ ዎርቃ ዳንጩዋን ዩሽ አꬂደ ቃቼድኖ።
7 ደኡዋን ደእያ ኦይዱ መታቱዋፐ እቱ፥ መꬍ መꬍናዉ ጋካናዉ ደእያ ጾሳ ሀንቁ ኩሜዳ ላፑ ዎርቃ ከረቱዋ ላፑ ኪታንቻቶ እሜዳ።
8 ጾሳ ቦንቹዋፐነ አ ዎልቃፐ ዬዳ ጩዋይ ጌሻ ጎልያ ኩሜዳ። ላፑ ኪታንቻቱ አሄዳ ላፑ ቦሻቱ ፖለታና ጋካናዉ፥ ጌሻ ጎልያ ኦንነ ገላናዉ ዳንዳይቤና።