16
ይሁዳይነ እስራኤሊ ኦለቴድኖ
(1 ካታ. 15:16-22)
1 አሳይ ካተቴዳ ሀታማነ ኡሱፑንꬃ ላይꬃን እስራኤልያ ካቲ ባእሽ ይሁዳ ቦላ ዎራጄዳ፤ ይሁዳ ካትያ አሳኮ ኦንነ ገለናዳንነ ከሰናዳን ተአናዉ ራማ ካታማ ዩሹዋ ምንሲደ ግምቤዳ።
2-3 ሄዋ ጋሱዋን ካቲ አስ መꬍና ጎዳ ጌሻ ጎልያነ ባረ ካትያ ጎልያ ሚሻ ምንጅያ ሳኣፐ ዎርቃነ ብራ አኬዳ። አኪደ ዳማስቆ ካታማን ደእያ ሶርያ ካትያ በንሀዳዳዉ ሀዋዳን ያጊደ የዴዳ፤ “ካሰ ታ አቡናነ ነ አቡና ጫቀቴዳዋዳን፥ አነ ታናናነ ኔናና ጫቀቶይተ። በአ፥ ታን ነዉ ብራነ ዎርቃ የዳድ። እስራኤልያ ካቲ ባእሽ ባረ ኦላንቻቱዋ ታ ጋድያፐ ከሳና ማላ፥ ኔን ካሰ አናና ጫቀቴዳ ጫቁዋ ኮላ” ያጌዳ።
4 በንሀዳድ ካቲ አሳይ ጌዳዋ ማዪደ፥ ባረ ኦላ ጋዳዎቱዋ እስራኤልያ ካታማቱዋ ኦላናዉ የዴዳ። ኡንቱንቱ አይኖ፥ ዳናነ አቤል-ቤትማእካ ጌተትያ ካታማቱዋነ ንፍታሌማ ጋድያን ደእያ ሻሉዋ ምንጅያ ካታማቱዋ ኡባ ጾኔድኖ።
5 ባእሽ ሄዋ ስሲደ፥ ራማ ካታማ ግምቢያዋ አግ ባሼዳ።
6 ሄዋፐ ጉይያን፥ ካቲ አሳይ ይሁዳ አሳ ኡባ ሺሼዳ፤ አሳይ ባእሽ ካሰ ያን ጎኤትያ ሹቻነ ምꬃ ራማፐ ኬዜድኖ። እ ገባአነ ምጽጳ ጌተትያ ካታማቱዋ አን ምንሲደ ግምቤዳ።
ካቲ አሳይ ትምቢትያ ኦድያ ሀናና ቃሾ ጎለን የጌዳ
7 ሄ ዎደ ትምቢትያ ኦድያ ሀናን ይሁዳ ካትያ አሳኮ ዪደ፥ “ኔን ሶርያ ካትያን አማነታደ፥ መꬍና ጎዳን፥ ነ ጾሳን፥ አማነታቤና ድራዉ፥ ሶርያ ካትያ ኦላንቻቱ ነ ኩሽያፐ ከስ አኬድኖ።
8 ቶጵያ አሳቱነ ሊብያ አሳቱ፥ ጮራ ፓራ ጋረቱነ ፓራቱ ደእያ ዳሮ ኦላንቻቱዋ ግድክኖየ? ሽን ኔን መꬍና ጎዳን አማነቴዳ ድራዉ፥ ጾሳይ ኡንቱንታ ነ ኩሽያን አꬅ እሜዳ።
9 አያዉ ጎፐ፥ ባረ ኩመንꬃ ዎዛናፐ ጾሳን አማነትያ አሳ ምንꬃናዉ መꬍና ጎዳ አይፊ ሳኣ ቦላን ኡባሳ ጼሌ። ኔን ሀ የዉዋን ኤያዳ፤ ሄዋ ድራዉ፥ ሀቼፐ ዶምና፥ ኔፐ ኦላይ ሻከተና” ያጌዳ።
10 አሳይ ትምቢትያ ኦድያዋ ቦላ ዳሮ ሀንቀቴዳ፤ ቃሾ ጎለን የጌዳ። ቃይ አሳይ ሄ ዎደ አሳፐ አማሬዳዋ መቶꬄዳ።
ካትያ አሳ ሀይቁዋ
(1 ካታ. 15:23-24)
11 አሳይ ኦꬄዳባይ ኮይሮፐ ዉርሰꬃ ጋካናዉ ይሁዳ ካተቱነ እስራኤልያ ካተቱ ታርክያ ማጻፋን ጻፈት ኡቴዳ።
12 አሳይ ካተቴዳ ሀታማነ ኡዱፑንꬃ ላይꬃን ገድያ ሳከቴዳ፤ አዉ ሳኩ ሎይꬅ ዳሮፐካ፥ እ አክማቱዋ ኮዬዳፐ አትና፥ መꬍና ጎዳ ኮይቤና።
13 አሳይ ባረ ካተቴዳ ኦይታማነ እተንꬅያ ላይꬃን ሀይቂደ፥ ባረ ማይዛን ጋከቴዳ።
14 ኡንቱንቱ አ አሃ ዱፉዋን ዱማ ዱማ ሽቱነ ሳዉ ደእያ ግሱዋ ቦላ ዎꬄድኖ። ኡንቱንቱ አ ቦንቾ ዳሮ ምꬃ ዶሪደ፥ ታማ ኤꬂደ፥ ዳሮፐ ዬኬድኖ። አሳይ ባረዉ ዳዊታ ካታማን ሹቻ ዎጪደ ጊግሴዳ ዱፉዋን አ ሞጌድኖ።