97
ጾሳይ ኡባፐ ቦላ
1 መꬍና ጎዳይ ካዉቴዳ።
ሳኣን ደእያ አሳይ ናሸቶ፤
ሃኮ ሃꬃን ዶደቶ ሳን ደእያ አሳቱካ ናሸትኖ።
2 ሻሪነ ꬍጵ ጎ ꬉማይ አ ዶዴዳ።
ጽሎተꬃይነ ቱማተꬃይ አ ካዉተꬃ አራታዉ ባሶ።
3 ታማይ አፐ ስንꬃና ቤ፤
አ ዶዴዳ ሞርከቱዋ ጹጌ።
4 አ ዋልቃንꬃይ ሳኣ ፖእሴ፤
ቢታይ ሄዋ በኢደ ኮኮሬ።
5 መꬍና ጎዳ ስንꬃን፥ ሳኣ ኡባ ጎዳ ስንꬃን
ዎጋ ደረቱ ኤሳ ሙቃዳዳን ሙሺኖ።
6 ሳሎቱ አ ጽሎተꬃ አዋዪኖ፤
አሳይ ኡባይ አ ቦንቹዋ በኤ።
7 ዎርዶ ጾሳቶ ጎይንያዋንቱነ
ሄ ጎኤና ኤቃቱዋን ጬቀትያዋንቱ ኡባይ ዬላትኖ።
ጾሳቱ ኡባይ ጾሳዉ ጉልባትኖ።
8 አቤት መꬍና ጎዳዉ፥ ጽዮነ አሳይ፥
ነ ጽሎ ፕርዳ ስሲደ ናሸቴ፤
ይሁዳ ካታማቱዋ አሳይካ ሀሹ ጌ።
9 አቤት መꬍና ጎዳዉ፥ ኔን ሳኣ ኡባፐ ꬎቃሳ፤
ጾሳቱዋ ኡባፐ ኔን ꬎቁ ጋሳ።
10 መꬍና ጎዳ ሲቅያዋንቱ ኢታ እጽተ።
እ ባረዉ አማነትያ አሳቱዋ ሸምፑዋ ናጌ፤
ቃይ ኡንቱንታ ኢታቱዋ ኩሽያፐ አሼ።
11 ጽሎቶ ፖኡ ፖኤ፤
ዎዛና ሱረቶ ናሸቻይ ደኤ።
12 ህንተኖ ጽሎቶ፥ መꬍና ጎዳን ናሸትተ፤
አ ጌሻ ሱንꬃ ጋላትተ።